జావెలిన్‌ త్రో, షూటింగ్‌లోనూ పతకాలు
ఆసియా పారా గేమ్స్‌ 2026లో భారత క్రీడాకారులు సత్తా చాటుతున్నారు. రెండో రోజు పోటీల్లోనూ పతకాల వేటను కొనసాగిస్తూ పలు క్రీడాంశాల్లో పతకాలు సాధించారు. అథ్లెటిక్స్‌లో దీప్తి జీవాంజి స్వర్ణ పతకంతో మెరవగా, జావెలిన్‌ త్రో, షూటింగ్‌, పారా పవర్‌లిఫ్టింగ్‌, టేబుల్‌ టెన్నిస్‌లో భారత క్రీడాకారులు పతకాలు దక్కించుకున్నారు. దీంతో భారత్‌ పతకాల సంఖ్య 20 దాటింది.
దీప్తి రికార్డు స్వర్ణం
మహిళల 400 మీటర్ల టీ20 ఫైనల్లో దీప్తి జీవాంజి 56.36 సెకన్లలో లక్ష్యాన్ని చేరుకుని స్వర్ణ పతకాన్ని కైవసం చేసుకుంది. ఈ క్రమంలో కొత్త రికార్డును నెలకొల్పింది.
జావెలిన్‌ త్రోలో రజతం, కాంస్యం
పురుషుల జావెలిన్‌ త్రో ఎఫ్53/ఎఫ్54 ఫైనల్లో ప్రదీప్‌ కుమార్‌ రజత పతకాన్ని సాధించగా, ఆయుష్‌ వర్మ కాంస్య పతకాన్ని గెలుచుకున్నాడు. దీంతో ఈ విభాగంలో భారత్‌కు రెండు పతకాలు లభించాయి.
షూటింగ్‌లో మానిష్‌ నర్వాల్‌కు రజతం
పురుషుల 10 మీటర్ల ఎయిర్‌ పిస్టల్‌ ఎస్‌హెచ్‌1 ఫైనల్లో భారత షూటర్‌, రెండు పారాలింపిక్‌ పతకాల విజేత మానిష్‌ నర్వాల్‌ రజత పతకాన్ని సాధించాడు. ఈ ఫలితంతో లాస్‌ ఏంజెలెస్‌ 2028 పారాలింపిక్స్‌కు భారత్‌కు కోటా స్థానం కూడా లభించింది.
పారా పవర్‌లిఫ్టింగ్‌లో తొలి పతకం
పారా పవర్‌లిఫ్టింగ్‌లో అశోక్‌ 192 కిలోల బరువును ఎత్తి రజత పతకాన్ని కైవసం చేసుకున్నాడు. ఆసియా పారా గేమ్స్‌ చరిత్రలో ఈ క్రీడాంశంలో భారత్‌కు ఇదే తొలి పతకం కావడం విశేషం.
టేబుల్‌ టెన్నిస్‌లో భవీనా పటేల్‌కు కాంస్యం
టోక్యో పారాలింపిక్స్‌ పతక విజేత భవీనా పటేల్‌ మహిళల సింగిల్స్‌ క్లాస్‌ 4-5 విభాగంలో కాంస్య పతకాన్ని సాధించింది. దీంతో భారత్‌ ఖాతాలో మరో పతకం చేరింది.
తొలిరోజు 11 పతకాలతో పతకాల పట్టికలో నాలుగో స్థానంలో నిలిచిన భారత్‌.. రెండో రోజు కూడా అదే జోరును కొనసాగిస్తోంది. భారత అర్చరీ క్రీడాకారిణి శీతల్‌ దేవి స్వర్ణ పతకంపై ఆశలు రేకెత్తిస్తుండటంతో, పతకాల సంఖ్య మరింత పెరిగే అవకాశం ఉంది.
కామెంట్‌లు (0)