- ప్రపంచకప్ వివాదంపై ఐఎఫ్ఏబి కీలక ప్రకటన
న్యూయార్క్: 2026 ప్రపంచ కప్లో అర్జెంటీనాకు అనుకూలంగా రిఫరీ నిర్ణయాలు ఉన్నాయా లేదా అనే దానిపై చర్చ జరుగుతున్న సమయంలో కీలక ప్రకటన వెలువడింది. స్విట్జర్లాండ్ ఆటగాడు బ్రిల్ ఎంబోలోకు ఇచ్చిన రెడ్ కార్డ్ నిర్ణయం సరైంది కాదని ఫుట్బాల్ చట్టాల రూపక సంస్థ (ఐఎఫ్ఏబి) స్పష్టం చేసింది. లియోనెల్ మెస్సీ నాయకత్వంలోని అర్జెంటీనా జట్టు ఫైనల్కు చేరే క్రమంలో రిఫరీ నిర్ణయాలపై పలు విమర్శలు వచ్చాయి. అర్జెంటీనాకు అనుకూలంగా రిఫరీలు వ్యవహరించారంటూ ఈజిప్ట్, స్విట్జర్లాండ్ జట్లు కూడా ఆరోపణలు చేశాయి. క్వార్టర్ ఫైనల్లో అర్జెంటీనాతో జరిగిన మ్యాచ్లో 72వ నిమిషంలో ఎంబోలోకు రెండో ఎల్లో కార్డు చూపించారు. అతడు నకిలీ ఫౌల్ చేశాడని భావించిన రిఫరీ, విఏఆర్ సమీక్ష అనంతరం అతడిని మైదానం నుంచి పంపించారు. అయితే ఈ నిర్ణయం సరైనది కాదని ఐఎఫ్ఏబి వెల్లడించింది.
ఆ సమయంలో మ్యాచ్ 1-1తో సమంగా ఉండగా ఎంబోలో రెడ్ కార్డ్ పొందాడు. ఆ తర్వాత అదనపు సమయంలో అర్జెంటీనా 3-1తో విజయం సాధించి సెమీఫైనల్కు చేరుకుంది. రెడ్ కార్డ్ మ్యాచ్ ఫలితాన్ని ప్రభావితం చేసిందని స్విట్జర్లాండ్ ఆరోపించింది.
ఈ ఘటన అర్జెంటీనా మిడ్ఫీల్డర్ లియాండ్రో పరేడెస్, ఎంబోలో మధ్య జరిగిన ఘర్షణతో ప్రారంభమైంది. మొదట పరేడెస్కు పసుపు కార్డు చూపించగా, విఏఆర్ జోక్యంతో ఫౌల్ జరగలేదని, ఎంబోలోనే తప్పు చేశాడని రిఫరీ నిర్ణయాన్ని మార్చారు. అయితే ఇలాంటి సందర్భాల్లో ‘మిస్టేకన్ ఐడెంటిటీ’ (తప్పుగా ఆటగాడిని గుర్తించడం) నిబంధనను వర్తింపజేయలేమని ఐఎఫ్ఏబి స్పష్టం చేసింది. ఈ నిబంధన కేవలం కార్డు పొందిన ఆటగాడు సరైన వ్యక్తేనా అనే విషయాన్ని సరిచేయడానికి మాత్రమే ఉపయోగించవచ్చని తెలిపింది. స్విట్జర్లాండ్ కోచ్ మురత్ యాకిన్ స్పందిస్తూ, “రిఫరీ నిర్ణయం తప్పు. ఈ నిబంధన మా మ్యాచ్ను ప్రభావితం చేసింది” అని అసంతృప్తి వ్యక్తం చేశారు. విఏఆర్ నిబంధనలు, మ్యాచ్ అధికారుల నిర్ణయాలపై సమీక్ష కొనసాగుతోందని ఐఎఫ్ఏబి తెలిపింది. ఈ సంస్థలో ఫిఫాతో పాటు ఇంగ్లాండ్, స్కాట్లాండ్, వేల్స్, నార్తర్న్ ఐర్లాండ్ ఫుట్బాల్ సంఘాల ప్రతినిధులు సభ్యులుగా ఉంటారు.
కామెంట్లు (0)