ఆసియా క్రీడల్లో నీరూ ధండాకు స్వర్ణం

నగోయా : భారత షూటర్‌ నీరూ ధండా ఆసియా క్రీడలు–2026లో మహిళల వ్యక్తిగత ట్రాప్‌ విభాగంలో స్వర్ణ పతకం సాధించారు. మంగళవారం జరిగిన ఫైనల్‌లో 26 పాయింట్లతో అగ్రస్థానంలో నిలిచిన ధండా.. ఆసియా క్రీడల్లో భారత్‌కు ఐదో స్వర్ణాన్ని అందించారు. క్వాలిఫికేషన్‌తో పాటు ఫైనల్‌లోనూ ఆమె అగ్రస్థానంలో నిలవడం విశేషం. వర్షపు పరిస్థితుల్లోనూ ధండా సంయమనంతో షూటింగ్‌ కొనసాగించారు. ఎనిమిది మంది షూటర్ల ఫైనల్‌లో తొలి సిరీస్‌లో ఐదు లక్ష్యాలనూ ఛేదించి బలమైన ఆరంభం ఇచ్చారు. రెండో సిరీస్‌లో ఒక లక్ష్యాన్ని తప్పినప్పటికీ వెంటనే పుంజుకున్నారు. మూడో రౌండ్‌లో పూర్తి స్కోరు సాధించి తిరిగి అగ్రస్థానానికి చేరుకున్నారు. నాలుగు సిరీస్‌లు పూర్తయ్యే సమయానికి 20 షాట్‌లలో 19 లక్ష్యాలను ఛేదించారు. 25 షాట్‌ల అనంతరం చైనాకు చెందిన సన్‌ యునాంగ్‌పై 23–21 ఆధిక్యంలో ఉన్న ధండా, చివరి దశలోనూ ఒత్తిడికి లోనుకాకుండా స్వర్ణాన్ని ఖాయం చేసుకున్నారు. సన్‌ యునాంగ్‌, కువైట్‌కు చెందిన హజార్‌ అబ్దుల్మాలిక్‌ చెరో 21 పాయింట్లతో నిలిచారు. అంతకుముందు జరిగిన మహిళల ట్రాప్‌ టీమ్‌ ఈవెంట్‌లోనూ ధండా రజత పతకం సాధించారు. ఆషిమా అహ్లావత్‌, మనీషా కీర్‌లతో కలిసి భారత్‌ 328 పాయింట్లు సాధించి రెండో స్థానంలో నిలిచింది. చైనా 346 పాయింట్లతో స్వర్ణం, కువైట్‌ 325 పాయింట్లతో కాంస్యం సాధించాయి. టీమ్‌ ఈవెంట్‌లో ధండా 125 పాయింట్లకు 118 పాయింట్లు సాధించి భారత్‌ తరఫున అత్యుత్తమ ప్రదర్శన కనబరిచారు. జులైలో ఇటలీలోని లోనాటోలో జరిగిన ఐఎస్‌ఎస్‌ఎఫ్‌ ప్రపంచకప్‌లో మహిళల ట్రాప్‌ విభాగంలో తన తొలి స్వర్ణాన్ని సాధించిన ధండా, తాజాగా ఆసియా క్రీడల స్వర్ణంతో ఈ ఏడాదిని ఘనంగా ముగించారు. భారత ఆర్మీ మార్క్స్‌మ్యాన్‌షిప్‌ యూనిట్‌కు చెందిన నాయిబ్‌ సుబేదార్‌ అయిన ధండా, గతంలో ఆసియా ఛాంపియన్‌షిప్‌ టైటిల్‌ను కూడా గెలుచుకున్నారు. ధండా వ్యక్తిగత స్వర్ణంతో ఆసియా క్రీడల్లో భారత్‌ పతకాల సంఖ్య 47కి చేరింది. ఇందులో ఐదు స్వర్ణాలు, 21 రజతాలు, 21 కాంస్య పతకాలు ఉన్నాయి.