- ప్రత్యేక బస్సుల్లో సాధారణ ఛార్జీలే
- 8,500 మంది కాంట్రాక్టు సిబ్బందికి ప్రమాద బీమా
-ఇపిఎఫ్ హయ్యర్ పెన్సన్ సమస్యపరిష్కారానికి కృషి
- ఎపిఎస్ఆర్ టిసి జాయింట్ మేనేజింగ్ డైరెక్టర్ ఎం శివప్రసాద్
ప్రజాశక్తి-అమరావతి బ్యూరో : దసరా పండుగ, తిరుమల నవరాత్రి బ్రహ్మోత్సవాల సందర్భంగా ప్రయాణికుల రద్దీని దృష్టిలో ఉంచుకుని ఆంధ్రప్రదేశ్ రాష్ట్ర రోడ్డు రవాణా సంస్థ 5,261 ప్రత్యేక బస్సులను నడిపేందుకు ఏర్పాట్లు చేశామని ఎపిఎస్ఆర్ టిసి జాయింట్ మేనేజింగ్ డైరెక్టర్ (జెఎండి)ఎం శివప్రసాద్ తెలిపారు. ప్రత్యేక బస్సుల్లో సాధారణ ఛార్జీలే వసూలు చేస్తామని, ఎలాంటి అదనపు భారం ఉండదని స్పష్టం చేశారు. విజయవాడ ఆర్ టిసి హౌస్ లో సోమవారం నిర్వహించిన విలేకరుల సమావేశంలో ఆయన మాట్లాడారు. హైదరాబాద్, బెంగళూరు తదితర నగరాల నుంచి స్వస్థలాలకు వచ్చేవారికి, పండుగ సెలవుల అనంతరం తిరిగి వెళ్లేవారికి ప్రత్యేక సర్వీసులు ఏర్పాటు చేస్తున్నట్లు చెప్పారు. ప్రయాణికుల రద్దీని బట్టి అదనపు బస్సులు నడుపుతామన్నారు.తిరుమల,తిరుపతి మధ్య రవాణా కోసం 425 బస్సులను సిద్ధం చేశామన్నారు. వీటిలో తిరుపతి జిల్లా నుంచి 369, ఇతర జిల్లాల నుంచి 56 బస్సులు ఉన్నాయని, వీటిలో 100 విద్యుత్ బస్సులు, అదనపు డ్రైవర్లు, కండక్టర్లను సిద్ధం చేసి శిక్షణ ఇచ్చామన్నారు. సంస్థలో 750 విద్యుత్ బస్సులను ఈ ఏడాది డిసెంబరు 31 నాటికి అందుబాటులోకి తీసుకురావాలని లక్ష్యంగా పెట్టుకున్నామని స్పష్టం చేశారు. 300 విద్యుత్ బస్సుల కొనుగోలు ప్రక్రియ పూర్తయిందని, అదనంగా 1,450 బస్సులను సమకూర్చేందుకు చర్యలు చేపట్టామన్నారు. 500 వాయు ఇంధన బస్సుల సమీకరణకు టెండర్ల ప్రక్రియ పూర్తయిందన్నారు. రానున్న కాలంలో వివిధ రకాలుగా సుమారు 3,000 కొత్త బస్సులను అందుబాటులోకి తేవాలని ప్రణాళిక రూపొందించామన్నారు. మహిళలకు ఉచిత ప్రయాణ పథకం అమలుతో రద్దీ పెరిగిందని, కొన్ని సమయాల్లో బస్సుల్లో ప్రయాణికుల సంఖ్య సామర్థ్యాన్ని మించుతోందని తెలిపారు. ఈ సమస్యకు కొత్త బస్సుల సమీకరణే శాశ్వత పరిష్కారమన్నారు. కండక్టర్ల కొరత పరిష్కారానికి ఇతర రాష్ట్రాల విధానాలను పరిశీలిస్తున్నామని, ప్రభుత్వ ఆదేశాల మేరకు నిర్ణయం తీసుకుంటామని చెప్పారు. ప్రయాణికులతో డ్రైవర్లు, కండక్టర్లు మర్యాదగా వ్యవహరించాలని, బస్సు నిలిపే చోట ప్రయాణికులు ఉన్నప్పుడు నిర్లక్ష్యంగా వెళ్లిపోతే చర్యలు తీసుకుంటామని హెచ్చరించారు. అర్హులైన వృద్ధులు చెల్లుబాటు అయ్యే గుర్తింపు పత్రాలను డిజిటల్ రూపంలో చూపించి ప్రయాణ సౌకర్యం పొందవచ్చన్నారు. సంస్థలో పనిచేస్తున్న సుమారు 8,500 మంది కాంట్రాక్టు సిబ్బందికి ప్రమాద బీమా కల్పించే అంశంపై భారతీయ స్టేట్ బ్యాంకుతో చర్చలు జరుపుతున్నట్లు తెలిపారు. ప్రమాదవశాత్తు మరణం, శాశ్వత వైకల్యం సంభవిస్తే రూ.30 లక్షల వరకు బీమా రక్షణ కల్పించేలా చర్యలు తీసుకుంటున్నామన్నారు. విధి నిర్వహణలో మృతి చెందిన డ్రైవర్ జెట్టి శివ కుటుంబానికి సంస్థ తరఫున సహాయం అందిస్తామని పేర్కొన్నారు.ఇపిఎఫ్, హయ్యర్ పెన్షన్‌కు సంబంధించిన పెండింగ్ అంశాలపై సంబంధిత అధికారులతో నిరంతరం సంప్రదింపులు జరుపుతున్నామని తెలిపారు.ఉద్యోగుల ఇపిఎఫ్ హయ్యర్ పెన్సన్ సమస్య పరిష్కారానికి చర్యలు తీసుకుంటామన్నారు. ప్రయాణికులకు సురక్షితమైన, సౌకర్యవంతమైన, అందుబాటు ధరల్లో రవాణా సేవలు అందించడమే లక్ష్యమని తెలిపారు. ఈ సమావేశంలోఎగ్జిక్యూటివ్ డైరెక్టర్ (అడ్మినిస్ట్రేషన్) కె ఎస్ బ్రహ్మానంద రెడ్డి, ఎగ్జిక్యూటివ్ డైరెక్టర్ (ఆపరేషన్స్) రాఘవ కుమార్, ఎగ్జిక్యూటివ్ డైరెక్టర్ (ఇంజినీరింగ్) జివి రవి వర్మ, ఎఫ్ఎ,సిఎఒ ఎన్ సుధాకర్ ఇతర ఉన్నతాధికారులు పాల్గొన్నారు.
కామెంట్‌లు (0)