కొండపర్వలో అగ్ని ప్రమాదం

ప్రజాశక్తి-విస్సన్నపేట: ఎన్టీఆర్‌ జిల్లా విస్సన్నపేట మండలం కొండపర్వలో నూతనంగా ఏర్పాటు చేసిన అవంటల్‌ కంపెనీలో శనివారం ఉదయం అగ్ని ప్రమాదం చోటుచేసుకుంది. ఈ ప్రమాదంలో కంపెనీలోని ఎలక్ట్రానిక్‌ సామగ్రి దగ్ధమైనట్లు సమాచారం. ప్రమాదంపై సమాచారం అందుకున్న అగ్నిమాపక సిబ్బంది వెంటనే ఘటనాస్థలానికి చేరుకుని మంటలను అదుపులోకి తీసుకువచ్చేందుకు చర్యలు చేపట్టారు. అగ్ని ప్రమాదం కారణంగా భారీ మొత్తంలో ఆర్థిక నష్టం వాటిల్లినట్లు తెలుస్తోంది. అయితే, ప్రమాదానికి గల కారణాలు, జరిగిన నష్టానికి సంబంధించిన పూర్తి వివరాలు తెలియాల్సి ఉంది.