హైదరాబాద్‌ : అమెరికాలో జరిగిన ఘోర రోడ్డు ప్రమాదంలో మహబూబాబాద్‌ జిల్లాకు చెందిన మహిళ దుర్మరణం చెందారు. మిస్సోరిలో ఉద్యోగం చేస్తున్న దారం సుప్రియ (31) ప్రయాణిస్తున్న కారును వెనుక నుంచి ట్రక్‌ ఢీకొనడంతో ఈ విషాద ఘటన చోటుచేసుకుంది. మహబూబాబాద్‌ జిల్లా మరిపెడ మండల కేంద్రానికి చెందిన సుప్రియ వివాహిత. ఉద్యోగరీత్యా కొంతకాలంగా అమెరికాలోని మిస్సోరిలో నివాసం ఉంటున్నారు. భారత కాలమానం ప్రకారం ఆదివారం తెల్లవారుజామున 2 గంటల ప్రాంతంలో ఆమె ప్రయాణిస్తున్న కారును వెనుక నుంచి ఓ ట్రక్‌ బలంగా ఢీకొట్టింది.
ఈ ప్రమాదంలో సుప్రియ తీవ్రంగా గాయపడి అక్కడికక్కడే మృతి చెందినట్లు సమాచారం. అదే కారులో ప్రయాణిస్తున్న భారత్‌కు చెందిన మరో యువతికి తీవ్ర గాయాలైనట్లు తెలుస్తోంది. ప్రమాదానికి సంబంధించిన పూర్తి వివరాలు తెలియాల్సి ఉంది. సుప్రియ మృతితో మరిపెడలోని ఆమె కుటుంబ సభ్యులు, బంధువులు తీవ్ర విషాదంలో మునిగిపోయారు.
కామెంట్‌లు (0)