నీటి రెగ్యులేటరీ కమిషన్ ప్రతిపాదనను ఉపసంహరించుకోవాలి

• సిపిఎం రాష్ట్ర కమిటీ డిమాండ్

 ప్రజాశక్తి - అమరావతి బ్యూరో : సాగు, తాగు నీటిని ప్రయివేటీకరించి ప్రజలపై మోయలేని భారాలు వేయడమే కాక వ్యవసాయాన్ని దెబ్బకొట్టే వాటర్ రెగ్యులటరీ కమిషన్ ప్రతిపాదనను తక్షణం ఉపసంహరించుకోవాలని సిపిఎం రాష్ట్ర కమిటీ డిమాండ్ చేసింది. ఈ మేరకు ఆ పార్టీ రాష్ట్ర కార్యదర్శి వి.శ్రీనివాసరావు గురువారం ఒక ప్రకటన విడుదల చేశారు. స్థానిక సంస్థల ఎన్నికలు ముగిసిన వెంటనే ముఖ్యమంత్రి ఆదేశాలు ఇవ్వడం ప్రజలను వంచించడమేనని ఆయన పేర్కొన్నారు. ఇప్పటికే విద్యుత్ రంగంలో ఏర్పాటు చేసిన రెగ్యులటరీ కమిషన్ ప్రజలకు ఏ మాత్రమూ ఉపయోగపడకపోగా ప్రభుత్వాలు పెంచే విద్యుత్ చార్జీల భారాలకు ముసుగుగా తోడ్పడుతోందని విమర్శించారు. అక్రమ విద్యుత్ కొనుగోలు ఒప్పందాలకు ఆమోద ముద్ర వేసి ప్రజలపై భారాలు వేస్తోందని, పైగా అదనంగా ట్రూఅప్ ఛార్జీల పేరుతో ప్రజల మూల్గులు పీలుస్తున్నారని పేర్కొన్నారు. ఈ తరహా కమిషన్‌ను జలవనరుల రంగంలో ఏర్పాటు చేయడం ద్వారా తాగు, సాగు నీరు పూర్తిగా వ్యాపార సరుకుగా మారుతుందని తెలిపారు. కోకాకోలా, రిలయన్స్ లాంటి విదేశీ, స్వదేశీ కంపెనీలు ఇప్పుడే నీళ్ళ వ్యాపారంలోకి వచ్చాయని, ఇకపై నదులు, రిజర్వాయర్లు వారి ఆధీనంలోకి పోతాయని, జలవనరుల రంగంలో రెగ్యులేటరీ కమిషన్‌ను ఏర్పాటు చేయాలని చాలా కాలం నుండి ప్రపంచబ్యాంకు, కేంద్రం రాష్ట్రంపై ఒత్తిడి తెస్తున్నాయని వివరించారు. రైతుల నుండి తీవ్ర వ్యతిరేకత రావడంతో అందుకు ప్రభుత్వాలు సాహసించలేకపోయాయని, ప్రపంచబ్యాంకు ఆదేశాల్లో భాగంగా తాగు, సాగునీటి వనరులకు మీటర్లు ఏర్పాటు చేయించడం కోసం కేంద్ర ప్రభుత్వం జల జీవన్ మిషన్ పేరుతో రాష్ట్రాలపై ఒత్తిడి తెస్తోందని పేర్కొన్నారు. మోడీ విధానాలను రాష్ట్రంలో వేగంగా అమలు చేయడం గ్రామీణ ప్రాంత తాగునీటి పథకాలన్నిటికీ మీటర్లు బిగించాలని, వాడకం ప్రాతిపదికన ప్రజల నుండి యూజర్ ఛార్జీలు వసూలు చేయాలని స్థానిక ఎన్నికల మధ్యలో 160 జివోను రాష్ట్ర ప్రభుత్వం విడుదల చేసిందని తెలిపారు. దీనిపై పెద్దఎత్తున విమర్శలు రావడంతో ఆ జిఓను ప్రభుత్వ వెబ్‌సైట్‌లో కనపడకుండా దాచేసి ఎన్నికలు ముగిసిన తర్వాత గ్రామాలతో పాటు పట్టణాలు, తాగునీటితో పాటు సాగు నీటి రంగాలను కలిపి జలవనరుల కమిషన్ ఏర్పాటు చేయడానికి సిద్ధపడుతోందని విమర్శించారు. డబల్ ఇంజన్ సర్కారు అంటే ప్రజలపై బుల్డోజర్ తోలడమేనని ఈ నిర్ణయంతో మరోసారి కూటమి ప్రభుత్వం రుజువు చేసుకుందని, ప్రజాభిప్రాయానికి భిన్నంగా ఈ రకమైన నిర్ణయాలు తీసుకుంటే ప్రజలు తగిన గుణపాఠం చెబుతారని విమర్శించారు. ఒకవైపు ఎలినినో ప్రభావంతో తీవ్ర కరువు, మరోవైపు వరుస తుఫానులు, భారీగా పెరిగిన నిత్యావసర సరుకుల ధరలతో ముప్పేట కష్టాల్లో వున్న ప్రజలను ఆదుకోవాల్సిన కేంద్ర, రాష్ట్ర ప్రభుత్వాలు అందుకు విరుద్ధంగా నీటిని కూడా వ్యాపార సరుకుగా మార్చాలని రెగ్యులేటరీ కమిషన్ ఏర్పాటు చేయాలనే ప్రయత్నాన్ని ప్రజలు వ్యతిరేకించాలని సిపిఎం పిలుపునిచ్చింది.