న్యూఢిల్లీ : నీట్ పరీక్షల్లో అవకతవకలు, ప్రశ్నపత్రాల లీకేజీలపై కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలని డిమాండ్ చేస్తూ ఢిల్లీలోని జంతర్మంతర్ వద్ద కొనసాగుతున్న సీజేపీ (కొక్రోచ్ జనతా పార్టీ) నిరసనకు ప్రముఖుల మద్దతు లభిస్తోంది. కేరళ మాజీ ఆర్థిక మంత్రి థామస్ ఐజాక్, సినీ నటుడు ప్రకాష్ రాజ్ శనివారం నిరసన వేదికను సందర్శించి తమ సంఘీభావాన్ని ప్రకటించారు. సమరపంథల్లో నిరాహార దీక్ష చేస్తున్న పర్యావరణవేత్త, విద్యా సంస్కర్త సోనమ్ వాంగ్చుక్ను పరామర్శించి ఆయన ఆరోగ్య పరిస్థితిని అడిగి తెలుసుకున్నారు. త్రిపుర ప్రతిపక్ష నాయకుడు జితేంద్ర చౌదరి కూడా నిరసనకు మద్దతు తెలిపారు.
ఈ సందర్భంగా సీజేపీ వ్యవస్థాపకుడు అభిజీత్ దీప్కే మాట్లాడుతూ, కేరళ విద్యా వ్యవస్థ దేశానికి ఆదర్శమని పేర్కొన్నారు. దేశ యువత చేపట్టిన ఈ ఉద్యమం అత్యంత శక్తివంతమైనదని ప్రకాష్ రాజ్ అన్నారు. పార్లమెంట్ వర్షాకాల సమావేశాలు ప్రారంభమయ్యే జూలై 20న పార్లమెంట్ వరకు సీజేపీ చేపట్టనున్న పాదయాత్రలో తాను కూడా పాల్గొంటానని ప్రకటించారు. కేంద్రీకృత సంస్థాగత నిర్మాణం లేకుండానే 21 రోజులుగా సమ్మె కొనసాగడం యువతలోని అసంతృప్తికి నిదర్శనమని థామస్ ఐజాక్ అన్నారు. నిరసన చేస్తున్న విద్యార్థులను 'ఉగ్రవాదులు'గా అభివర్ణించడం సరికాదని ఆయన విమర్శించారు. ఈ 'ఉగ్రవాదులు' ఏమి చేస్తున్నారో స్వయంగా చూడటానికే వచ్చాను" అంటూ కేంద్ర ప్రభుత్వ తీరును ఎద్దేవా చేశారు.
ప్రభుత్వం స్పందించకపోవడంతో, సమ్మెకు నెల పూర్తయ్యే జూలై 20న పార్లమెంట్ వరకు పాదయాత్ర నిర్వహించాలని సీజేపీ నిర్ణయించింది. పరీక్షల నిర్వహణలో పారదర్శకత కల్పించడం, కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయడమే తమ ప్రధాన డిమాండ్లని నిర్వాహకులు తెలిపారు.
కామెంట్లు (0)