ఎంవిఆర్ స్మారక పురస్కారం ఎం.ఎ.బేబీకి ప్రదానం

కణ్ణూర్ : ఈ ఏడాదికి గాను ప్రసిద్ధ 'ఎంవిఆర్ స్మారక పురస్కారాన్ని' సిపిఐ(ఎం) జాతీయ ప్రధాన కార్యదర్శి ఎం.ఎ. బేబీకి బహుకరించారు. సోమవారం ఉదయం 10 గంటలకు కణ్ణూర్ ఛాంబర్ హాల్‌లో ఘనంగా నిర్వహించిన ఈ కార్యక్రమంలో సిపిఐ ప్రధాన కార్యదర్శి డి. రాజా వీడియో కాన్ఫరెన్స్ ద్వారా పాల్గొని కార్యక్రమాన్ని ప్రారంభించారు. అనంతరం సీనియర్ నాయకుడు పాడ్యం రాజన్ చేతుల మీదుగా ఎం.ఎ. బేబీకి ఈ అవార్డును అందజేశారు.

ఈ కార్యక్రమంలో కేకే రాగేష్, ఎం.వి. నికేష్ కుమార్, సీపీ సంతోష్ కుమార్, ఎం.హెచ్. షాలియార్, ప్రొఫెసర్ ఇ. కుంజిరామన్ తదితర ప్రముఖులు పాల్గొన్నారు.

ఎం.ఏ. బేబీ (మరియం అలెగ్జాండర్ బేబీ) రాజకీయ ప్రస్థానంలోని మైలురాళ్ళు :

* 1970ల ప్రారంభం:

కొల్లంలోని శ్రీ నారాయణ కాలేజీలో చదువుతున్న సమయంలో కేరళ స్టూడెంట్స్ ఫెడరేషన్ (KSF) ద్వారా విద్యార్థి రాజకీయాల్లోకి ప్రవేశించారు. అనంతరం స్టూడెంట్స్ ఫెడరేషన్ ఆఫ్ ఇండియా (SFI)లో చేరి చురుకైన పాత్ర పోషించారు.

* 1980 :

SFI అఖిల భారత అధ్యక్షుడిగా, అలాగే డెమోక్రటిక్ యూత్ ఫెడరేషన్ ఆఫ్ ఇండియా (DYFI) అఖిల భారత అధ్యక్షుడిగా బాధ్యతలు చేపట్టి దేశవ్యాప్తంగా యువజన ఉద్యమాలను నడిపించారు.

* 1986 – 1998:

కేవలం 32 ఏళ్ల వయస్సులో తొలిసారిగా రాజ్యసభ సభ్యుడిగా ఎన్నికయ్యారు. 1986 నుండి 1998 వరకు వరుసగా రెండు పర్యాయాలు రాజ్యసభ సభ్యుడిగా వ్యవహరించి జాతీయ స్థాయి పార్లమెంటేరియన్‌గా గుర్తింపు పొందారు.

* 1999:

సీపీఐ(ఎం) కేంద్ర కమిటీ సభ్యుడిగా ఎంపికయ్యారు.

* 2006 – 2011:

కుందర నియోజకవర్గం నుంచి ఎమ్మెల్యేగా గెలిచి, వి.ఎస్. అచ్యుతానందన్ మంత్రివర్గంలో కేరళ విద్యా, సాంస్కృతిక శాఖల మంత్రిగా కీలక బాధ్యతలు నిర్వహించారు.

* 2012:

కోజికోడ్‌లో జరిగిన 20వ పార్టీ కాంగ్రెస్‌లో సీపీఐ(ఎం) పొలిట్ బ్యూరో సభ్యుడిగా ఎన్నికయ్యారు.

* ఏప్రిల్ 6, 2025:

తమిళనాడులోని మధురైలో జరిగిన 24వ అఖిల భారత పార్టీ కాంగ్రెస్‌లో సీపీఐ(ఎం) 6వ జాతీయ ప్రధాన కార్యదర్శిగా ఏకగ్రీవంగా ఎన్నికయ్యారు.