బెంగళూరు:
దేశంలోని కోట్లాది మంది ప్రజలకు డిజిటల్ గుర్తింపు కార్డు ‘ఆధార్’ను అందించిన యూనిక్ ఐడెంటిఫికేషన్ అథారిటీ ఆఫ్ ఇండియా (యుఐడిఎఐ) వ్యవస్థాపక ఛైర్మన్, ఇన్ఫోసిస్ సహ వ్యవస్థాపకుడు నందన్ నిలేకని కుటుంబానికి చేదు అనుభవం ఎదురైంది. కర్ణాటకలో కేంద్ర ఎన్నికల సంఘం చేపట్టిన ప్రత్యేక ఓటర్ల జాబితా సవరణ (ఎస్ఐఆర్) ప్రక్రియలో ఆయనతో పాటు ఆయన కుటుంబ సభ్యుల పేర్లు 'నో-మ్యాపింగ్' (Unmapped) కేటగిరీలో చేరాయి.
దేశంలో పరీక్షల అక్రమాలను అరికట్టడానికి, ఎన్టీఏ విధానాలను ప్రక్షాళన చేయడానికి ప్రధాని నరేంద్ర మోదీ ఏర్పాటు చేసిన ఉన్నత స్థాయి టాస్క్ ఫోర్స్ అధ్యక్షుడిగా కూడా నిలేకని వ్యవహరిస్తున్నారు. అలాంటి ప్రముఖ వ్యక్తికే ఇప్పుడు నివాస ఆధారాలు సమర్పించాలంటూ ఎన్నికల సంఘం నోటీసులు జారీ చేయడానికి సిద్ధపడటం తీవ్ర చర్చనీయాంశంగా మారింది.
2002 ఓటర్ల జాబితాతో లంకె కుదరకపోవడమే కారణం:
2002 నాటి ఓటర్ల జాబితా వివరాలతో సరిపోల్చినప్పుడు నందన్ నిలేకని, ఆయన భార్య రోహిణి నిలేకని, పిల్లలు నిహార్, జాహ్నవిల పేర్లను మ్యాప్ చేయడం సాధ్యపడలేదని ఎన్నికల సంఘం తెలిపింది. బెంగళూరు కోరమంగళలోని రెడ్డి జనసంఘ్ హైస్కూల్లో ఓటు హక్కు వినియోగించుకునే నిలేకని కుటుంబానికి సరైన ఆధారాలు సమర్పించాలని కోరుతూ అధికారులు నోటీసులు పంపనున్నారు.
జాబితాలో మరికొందరు ప్రముఖులు:
కేవలం నిలేకని కుటుంబమే కాకుండా, ప్రముఖ వ్యాపారవేత్త నిఖిల్ కామత్, ప్రముఖ కన్నడ నటుడు శివరాజ్ కుమార్, భారతరత్న గ్రహీత, ప్రముఖ శాస్త్రవేత్త సి.ఎన్.ఆర్. రావు, పద్మశ్రీ హరకల హాజబ్బ వంటి ఇతర దిగ్గజాల పేర్లు కూడా ఈ వ్యత్యాసాల (Discrepancy) జాబితాలో చేరాయి.
కర్ణాటక వ్యాప్తంగా దాదాపు 43.81 లక్షల మందికి పైగా ఓటర్లకు ఈ తరహా నోటీసులు వెళ్లాయి. డిజిటల్ ఇండియా, సాంకేతిక పరిజ్ఞానానికి మార్గదర్శిగా నిలిచిన నందన్ నిలేకని వంటి వారికే వోటర్ల జాబితాలో తమ నివాసాన్ని నిరూపించుకోవాల్సిన పరిస్థితి రావడం ఎన్నికల సంఘం లోపాలకు నిదర్శనమని ప్రతిపక్షాలు మండిపడుతున్నాయి. అక్టోబర్ 27న తుది ఓటర్ల జాబితా విడుదల కానున్న నేపథ్యంలో ఈ అంశం స్థానికంగా రాజకీయ దుమారం రేపుతోంది.
కామెంట్లు (0)