- సుప్రియా సూలే
ముంబయి : మహారాష్ట్ర రాజకీయాల్లో కొంతకాలంగా చర్చనీయాంశమైన నేషనలిస్ట్‌ కాంగ్రెస్‌ పార్టీ (ఎన్సిపి) రెండు గ్రూపుల విలీనానికి తెరపడింది. ఈ అంశంపై ఎన్సిపి (శరద్‌పవార్‌) వర్కింగ్‌ ప్రెసిడెంట్‌, ఎంపి సుప్రియా సూలే శనివారం నాడు కీలక ప్రకటన చేశారు. తన సోదరుడు, మాజీ ఉప ముఖ్యమంత్రి అజిత్‌ పవార్ జీవించి ఉన్నంతవరకే రెండు గ్రూపుల విలీనంపై చర్చలు జరిగాయని, ఆయన మరణంతో ఆ చర్చలకు పూర్తిగా ముగింపు పడిందని ఆమె స్పష్టం చేశారు. ఇదే అంశంపై శివసేన (యుబిటి) ఎంపీ సంజయ్ రౌత్ స్పందిస్తూ శరద్ పవార్ నాయకత్వంలోని పార్టీయే అసలైన ఎన్సిపి అని పేర్కొన్నారు. మరో వర్గం కేంద్ర హోంమంత్రి అమిత్ షా పార్టీకి చెందినదన్నారు. మరోవైపు విలీనంపై తమ పార్టీలో ఎలాంటి సంప్రదింపులు జరగడం లేదని మహారాష్ట్ర ఎన్సిపి అధ్యక్షులు సునీల్‌ తట్కరే కూడా ప్రకటించారు. తాము ఎన్డిఎలో ఉన్నామని, భవిష్యత్తులోనూ అదే కూటమిలో కొనసాగుతామని పేర్కొన్నారు. దీంతో రెండు గ్రూపులు ఒక్కటవుతాయన్న ఊహాగానాలకు తెరపడింది. అజిత్‌ పవార్ ఈ ఏడాది జనవరి 28న విమాన ప్రమాదంలో ప్రాణాలు కోల్పోయిన సంగతి విదితమే. ఆ తర్వాత ఆయన నేతృత్వలోని ఎన్సిపి గ్రూపు భవిష్యత్‌ రాజకీయ వ్యూహాలపై చర్చలు మొదలయ్యాయి. ఈ క్రమంలో రెండు ఎన్సిపి గ్రూపుల విలీనం అంశాలు తెరపైకి వచ్చాయి.
కామెంట్‌లు (0)