స్వల్పంగా పుంజుకున్న భారత రూపాయి

ముంబై:

అంతర్జాతీయ మార్కెట్లో ముడిచమురు (క్రూడాయిల్) ధరలు తగ్గడం, అమెరికా డాలర్ ఇండెక్స్ క్షీణించడంతో బుధవారం భారత రూపాయి బలం పుంజుకుంది. అమెరికన్ డాలర్‌తో పోలిస్తే రూపాయి విలువ 13 పైసలు పెరిగి 95.81 (తాత్కాలికం) వద్ద ముగిసింది.

అమెరికా ట్రెజరీ ఈల్డ్స్ తగ్గడం కూడా రూపాయికి కలిసివచ్చిందని ఫారెక్స్ వ్యాపారులు తెలిపారు. అయితే, దేశీయ స్టాక్ మార్కెట్ల బలహీనత రూపాయి భారీ లాభాలను అడ్డుకుంది.

ఇంటర్ బ్యాంక్ విదేశీ మార్కెట్లో ఉదయం రూపాయి 95.87 వద్ద ప్రారంభమైంది. ఒకానొక దశలో ఇంట్రాడే కనిష్ట స్థాయి 95.98కి చేరినప్పటికీ, ట్రేడింగ్ ముగిసే సమయానికి గత సెషన్ ముగింపు (95.94) కంటే 13 పైసలు పుంజుకొని 95.81 వద్ద స్థిరపడింది.

మరోవైపు, ప్రపంచంలోని ఆరు ప్రధాన కరెన్సీలతో డాలర్ బలాన్ని కొలిచే డాలర్ ఇండెక్స్ 0.14 శాతం తగ్గి 101.23 వద్ద ట్రేడవుతోంది. అంతర్జాతీయ బెంచ్ మార్క్ బ్రెంట్ క్రూడ్ ఆయిల్ ధర ఫ్యూచర్స్ ట్రేడింగ్‌లో 0.58 శాతం పెరిగినప్పటికీ, గత 10 రోజులలో ఇది కనిష్ట స్థాయిలోనే (బ్యారెల్‌‌కు 103.18 డాలర్లు) ఉంది.

రిజర్వ్ బ్యాంక్ ఆఫ్ ఇండియా (ఆర్‌‌బిఐ) తరఫున ప్రభుత్వ రంగ బ్యాంకులు డాలర్లను విక్రయించడం వల్ల రూపాయి 96.00 స్థాయి దాటకుండా ఒకే పరిధిలో ట్రేడవుతోందని నిపుణులు విశ్లేషించారు. కాగా, ఈ నెలలో ఇప్పటివరకు విదేశీ పోర్ట్‌ఫోలియో పెట్టుబడిదారులు సుమారు 2.2 బిలియన్ డాలర్ల నిధులను ఉపసంహరించుకోవడం రూపాయిపై ఒత్తిడి పెంచుతోంది.

స్టాక్ మార్కెట్లు డౌన్:

దేశీయ ఈక్విటీ మార్కెట్లలో బుధవారం నష్టాలు నమోదయ్యాయి. సెన్సెక్స్ 48.78 పాయింట్లు క్షీణించి 72,480.29 వద్ద, నిఫ్టీ 95.75 పాయింట్లు తగ్గి 22,620.45 వద్ద ముగిశాయి. ఎక్స్ఛేంజ్ డేటా ప్రకారం.. విదేశీ ప్రాతినిధ్య రంగానికి చెందిన సంస్థాగత పెట్టుబడిదారులు (FIIs) మంగళవారం రూ.9,980.22 కోట్ల విలువైన షేర్లను విక్రయించారు.