న్యూఢిల్లీ:
చారిత్రాత్మక నిరసన వేదిక జంతర్ మంతర్ వద్ద సిజెపి (CJP) ఆధ్వర్యంలో జరిగిన ఆకస్మిక నిరసన ఉద్రిక్తతకు దారితీసింది. సిజెపి నేతలు అశుతోష్ రాంకా, సౌరభ్ దాస్ నేతృత్వంలో సుమారు ఇరవై మంది కార్యకర్తలు జాతీయ జెండాలను చేతబూని ఈ నిరసనలో పాల్గొన్నారు. నిరసన కార్యక్రమం అనంతరం ఢిల్లీ పోలీసులు సిజెపి నేతలను అదుపులోకి తీసుకున్నారు. జెడియు (JDU) ఆఫీస్ గేట్ మార్గంగా ఈ బృందం జంతర్ మంతర్ ప్రాంతానికి చేరుకున్నట్లు సమాచారం.
జంతర్ మంతర్‌లో నిరసనకు అనుమతి కోరుతూ సిజెపి నేతలు ఇటీవలే ఢిల్లీ పోలీసులకు లేఖ సమర్పించారు. 24 గంటల్లోగా తమ విజ్ఞప్తిపై నిర్ణయం వెల్లడించకపోతే ఆందోళన చేపడతామని వారు హెచ్చరించారు. అయితే, సిజెపి దరఖాస్తు చేసుకున్న గంటల వ్యవధిలోనే.. జంతర్ మంతర్‌లో ఇకపై ఎలాంటి నిరసనలకు అనుమతి లేదని స్పష్టం చేస్తూ ఢిల్లీ పోలీసులు ఉత్తర్వులు జారీ చేశారు.
దశాబ్దాలుగా ఎన్నో చారిత్రాత్మక పోరాటాలకు, నిరసనలకు కేంద్ర బిందువుగా ఉన్న జంతర్ మంతర్‌ను ఢిల్లీ ప్రభుత్వం ఇటీవల అధికారిక నిరసన వేదికల జాబితా నుంచి పూర్తిగా తొలగించింది. దీనికి బదులుగా ఢిల్లీలోని రామ్‌లీలా మైదాన్, బురారీ గ్రౌండ్, తూర్పు ఢిల్లీలోని సిబిడి గ్రౌండ్‌లను నూతన నిరసన వేదికలుగా ప్రకటించారు. ఇకపై కేవలం ఈ నిర్దేశిత ప్రదేశాలలో మాత్రమే ప్రదర్శనలు, ఆందోళనలకు అనుమతి లభిస్తుంది. అంతేకాకుండా, ఈ నూతన వేదికలపై ఆందోళనలు నిర్వహించేందుకు ప్రత్యేక మార్గదర్శకాలను, విధివిధానాలను అధికారులు విడుదల చేశారు.
పార్లమెంటు భవనంతో పాటు పలు కీలక ప్రభుత్వ కార్యాలయాలకు అతి సమీపంలో ఉన్న జంతర్ మంతర్‌ను అధికారిక నిరసన వేదికల జాబితా నుంచి తొలగించడం పట్ల విమర్శలు వ్యక్తమవుతున్నాయి. దీనివల్ల ప్రభుత్వాల దృష్టికి నేరుగా తమ నిరసనలను, సమస్యలను తీసుకువెళ్లే అవకాశాలు మరింత పరిమితం కానున్నాయని విశ్లేষకులు భావిస్తున్నారు. మరోవైపు, జ్ఞానేష్ కుమార్ రాజీనామా డిమాండ్ చేస్తూ జరుగుతున్న ఆందోళనల నేపథ్యంలో పోలీసులు భద్రతను కట్టుదిట్టం చేసి, చర్యలను మరింత తీవ్రతరం చేశారు.
కామెంట్‌లు (0)