మోడీ ప్రభుత్వానికి వ్యతిరేకంగా దేశవ్యాప్తంగా నిరసనలు వ్యాపిస్తున్న తరుణంలో... వాటిలో పాల్గొని అరెస్టయిన నా లాంటి వారికి ఉత్సాహాన్ని, ఆశను కలిగించే సంఘటనలు... ప్రపంచవ్యాప్తంగా జరుగుతున్నాయి. ఓటు హక్కును నిరాకరిస్తున్న, ధరల పెరుగుదలను నియంత్రించలేకపోయిన, సామ్రాజ్యవాద యుద్ధానికి మద్దతు ఇస్తున్న మోడీ ప్రభుత్వానికి వ్యతిరేకంగా జెన్‌ జి నుంచి రైతులు, కార్మికుల వరకు ప్రజలు ప్రతిరోజూ నిరసన తెలుపుతుండగా...ఐరోపా, అమెరికాలలో అక్కడి మితవాద, ప్రజా వ్యతిరేక ప్రభుత్వాలపై తీవ్ర ఆగ్రహం వ్యక్తమవుతోంది. ఐరోపా లోని సుమారు పది దేశాలలో ఇప్పటికే పెద్ద ఎత్తున నిరసనలు జరిగాయి. విప్లవాల భూమి అయిన ఫ్రాన్స్ ఈ నిరసనలకు కేంద్ర బిందువుగా ఉంది. ఫ్రాన్స్‌లోని ఉన్నత పాఠశాల విద్యార్థులు విద్యా వ్యవస్థలోని దుస్థితిని చక్కదిద్దాలని, తగినంత మంది ఉపాధ్యాయులను నియమించాలని డిమాండ్ చేస్తూ తమ నిరసనను ప్రారంభించారు. ఈ న్యాయమైన డిమాండ్‌కు మద్దతుగా ఉపాధ్యాయులు, కార్మిక సంఘాలు, యువజన సంస్థలు ముందుకొచ్చాయి. ఫ్రాన్స్‌లోని అతి పెద్ద ప్రతిపక్ష పార్టీ అయిన లా ఫ్రాన్స్ ఇన్సౌమిస్, కమ్యూనిస్ట్ పార్టీల మద్దతుతో ఇది దేశాన్ని కుదిపివేసే ఉద్యమంగా ఎదిగింది. మాక్రాన్ ప్రభుత్వం ఈ నిరసనలపై గ్రెనేడ్లు, బాష్ప వాయువు, నీటి ఫిరంగులతో స్పందించింది. అంతేగాక ప్రధాన నగరాల్లో కర్ఫ్యూ విధించారు.
పొరుగు దేశమైన బెల్జియంలో విశ్వవిద్యాలయ రిజిస్ట్రేషన్ ఫీజులు పెంచడాన్ని... బ్రస్సెల్స్, లిగురియాలో ట్యూషన్ ఫీజులు పెంచడాన్ని వ్యతిరేకిస్తూ నిరసనలు జరుగుతున్నాయి. తూర్పు ఐరోపా దేశమైన అల్బేనియాలో కూడా ట్యూషన్ ఫీజుల పెరుగుదల కారణంగానే నిరసనలు చోటు చేసుకుంటున్నాయి. అమెరికా అధ్యక్షుడు డొనాల్డ్ ట్రంప్ అల్లుడికి ఒక సరస్సు తీరాన్ని, ఒక ద్వీపాన్ని అవినీతి మార్గంలో అప్పగించాలన్న నిర్ణయానికి వ్యతిరేకంగా మే నెల నుండి కొనసాగుతున్న ఫ్లెమింగో ఉద్యమానికి కొనసాగింపుగా రాజధాని టిరానాలో విద్యార్థుల నిరసనలు జరిగాయి. స్పెయిన్, పొరుగు దేశమైన పోర్చుగల్‌లో ప్రజలు నివసించడానికి ఒక చోటు కావాలని డిమాండ్ చేస్తూ వీధుల్లోకి వచ్చారు. తమ జీతమంతా అద్దె చెల్లించడానికే సరిపోతున్న దుస్థితికి పరిష్కారం కోరుతూ వారు వరుసగా మాడ్రిడ్, లిస్బన్ రాజధానులలో నిరసనల ఉధృతిని పెంచారు. స్పెయిన్‌లో సాంచెజ్ నేతృత్వంలోని సోషలిస్ట్ పార్టీ ప్రభుత్వం, 2030 వరకు ప్రస్తుత అద్దెదారులను ఖాళీ చేయించకుండా నిరోధించే చట్టాన్ని ముందుకు తెచ్చినప్పుడు, ఆ ప్రగతిశీల చట్టాన్ని ఓడించడానికి సంప్రదాయవాద పార్టీలు, తీవ్ర మితవాద పార్టీలు ఏకమయ్యాయి. దీని తరువాత, సాంచెజ్ ప్రభుత్వం రాజీనామా చేసి, నవంబర్ 29న ఎన్నికలు జరుగుతాయని ప్రకటించింది.
నవంబర్ 11న స్పెయిన్‌లో కూడా సార్వత్రిక సమ్మె జరగనుంది. ఆకాశాన్నంటుతున్న జీవన వ్యయం, ఏళ్ల తరబడి స్తంభించిపోయిన వేతనాల వల్ల జీవితం కష్టంగా మారడంతో ఇటలీ, గ్రీస్, జర్మనీలలో ప్రజలు వీధుల్లోకి వచ్చారు. ఇటలీ ఆర్థిక, ఫ్యాషన్ రాజధాని అయిన మిలన్‌లో నిరసనకారులను ఎదుర్కోవడానికి మితవాద అధ్యక్షురాలు జార్జియో మెలోని సైన్యాన్ని మోహరించారు. ఆస్ట్రియా, సెర్బియా, గ్రీస్ వంటి దేశాల్లో కూడా విద్యార్థుల నిరసనలు కొనసాగుతున్నాయి. అమెరికాలో ఎన్నికల నేపథ్యంలో ట్రంప్‌నకు వ్యతిరేకంగా జరుగుతున్న "నో కింగ్స్" నిరసనలో వేలాది మంది పాల్గొంటున్నారు. లాటిన్ అమెరికాలోని అర్జెంటీనా, చిలీ, కొలంబియా, బొలీవియాలలో నిరసనలు తీవ్రంగా ఉన్నాయి. ట్రంప్ తొత్తు నిరంకుశ పాలన సాగిస్తున్న కొలంబియాలో 14వ తేదీన, అర్జెంటీనాలో 15వ తేదీన సమ్మెలు జరిగాయి.
పెరుగుతున్న ఈ ప్రజాగ్రహం పెట్టుబడిదారీ విధానానికి, ముఖ్యంగా నయా ఉదారవాద విధానాలను అమలు చేస్తున్న పెట్టుబడిదారీ ప్రభుత్వాలకు వ్యతిరేకంగా ఉన్నది. నయా ఉదారవాద విధానాల ప్రతిపాదకులు, ప్రభుత్వాలు కార్పొరేట్ పెట్టుబడిదారీ విధానాల ప్రయోజనాలను కాపాడాలంటారు. ఫలితంగా, అనేక దేశాలు ధనికులపై పన్నులు తగ్గించి, సంపద పన్నులు, కార్పొరేట్ పన్నులను రద్దు చేశాయి. అంతేకాకుండా, కార్మికులు, ఉద్యోగులు, పెన్షనర్లకు అందించే ప్రయోజనాలను ఉపసంహరించుకున్నారు. సంక్షేమ చర్యలను పూర్తిగా విస్మరించారు. ఆర్థిక శక్తులను సంతోషపెట్టడానికి, ప్రైవేట్ పెట్టుబడిని ప్రోత్సహించడానికి బడ్జెట్ లోటును పూడ్చే పేరుతో ఆరోగ్యం, విద్యపై ప్రభుత్వ పెట్టుబడిని తగ్గిస్తున్నారు. అదే సమయంలో, బేరసారాల హక్కుతో సహా కార్మికుల హక్కులను ఒక్కొక్కటిగా తొలగించారు.
అంటే, ఆర్థిక శక్తులు లాభాలను ఆర్జించడానికి సహకరించే ఆర్థిక, రాజకీయ విధానాలకు వ్యతిరేకంగా ఇప్పుడు ప్రపంచవ్యాప్తంగా నిరసనలు వెల్లువెత్తుతున్నాయి. దీనితో పాటు, పెరుగుతున్న నిరుద్యోగం, యువతలో భవిష్యత్తుపై నెలకొన్న ఆందోళనలు ఈ నిరసనలకు ఆజ్యం పోశాయి. రష్యాపై నాటో యుద్ధం కోసం ఫ్రాన్స్, జర్మనీ, ఇటలీ వంటి ఇతర దేశాలు బిలియన్ల యూరోలను కేటాయించడం కూడా యూరప్‌ లోని సంక్షోభానికి ఒక ప్రధాన కారణం. ఖర్చులను తగ్గించే విధానాన్ని అవలంబించడానికి ఈ యుద్ధ నిధి మరో కారణంగా వుంది. దీనికి మరో కోణం కూడా ఉంది. ఇరాన్ పై దాడి, ఉక్రెయిన్‌ రష్యా ఘర్షణ కారణంగా, యూరోపియన్ దేశాలు పెట్రోల్, గ్యాస్, విద్యుత్ ధరలను విపరీతంగా పెంచాల్సి వచ్చింది. ఇది ప్రజల జీవితాలను కష్టతరం చేసింది.
మరో మాటలో చెప్పాలంటే, నిరసనకారులు లేవనెత్తిన డిమాండ్లు నయా ఉదారవాద పెట్టుబడిదారీ విధానాలపై ఉన్న ఆగ్రహం నుండి పుట్టినవే. కొనుగోలు శక్తి క్షీణించడం, పొదుపుపై దృష్టి సారించే బడ్జెట్, ఆకాశాన్నంటుతున్న ఇంధన ధరలు, తీవ్రమైన పోటీ, రియల్ ఎస్టేట్ రంగంలో ఊహాగానాలు వారిని వీధుల్లోకి నడిపించాయి. వారు లేవనెత్తుతున్న డిమాండ్లను చూసినపుడు ఇది స్పష్టమవుతోంది. ద్రవ్యోల్బణానికి అనుగుణంగా వేతనాల పెంపు, ఆరోగ్య, విద్యా రంగాలలో ప్రభుత్వ పెట్టుబడులు పెంచడం, విద్యుత్, పెట్రోల్ వంటి నిత్యావసర వస్తువులపై ధరల నియంత్రణ, గరిష్ట పరిమితులు, అందుబాటు ధరలలో గృహ వసతి కల్పించడం, అద్దెలపై గరిష్ట పరిమితులు విధించడం, ఐదేళ్ల తర్వాత మాత్రమే పెంపునకు అనుమతించడం, కార్మిక సంఘాల హక్కులను పునరుద్ధరించడం వంటివి ఈ నిరసనలలో ప్రధానంగా లేవనెత్తిన డిమాండ్లు. ఈ నిరసనలలో అమెరికా వ్యతిరేకత కూడా స్పష్టంగా కనిపిస్తోంది. అల్బేనియాలో ఇది ప్రస్ఫుటంగా ఉంది. అర్జెంటీనాలో అమెరికా జాతీయ పతాకాన్ని తగలబెట్టడమనేది ఆగ్రహ తీవ్రతను తెలియజేస్తుంది.
ఈ విధంగా ప్రపంచవ్యాప్తంగా ప్రజలు తాము ఎదుర్కొంటున్న తీవ్ర సమస్యలను లేవనెత్తుతూ నిరసనలకు దిగారు. ట్రంప్ మొదలుకొని మోహన్ భగవత్ వరకు తీవ్ర మితవాద నాయకులు ఈ ప్రజలను మత, జాతి ప్రాతిపదికన విభజించి, పెట్టుబడిదారీ దోపిడీ నిరాటంకంగా కొనసాగడానికి మార్గం సుగమం చేయడానికి సిద్ధమవుతున్నారు. ఈ నిరసనల వెనుక వలసదారులు, ముస్లింలు ఉన్నారని, అందువల్ల సరిహద్దులను పూర్తిగా మూసివేసి, నిరసనలను నిర్దాక్షిణ్యంగా అణచివేయాలని ట్రంప్ అంటున్నారు. వైవిధ్యం, సమ్మిళితత్వం పేరుతో వలసదారులను, ముస్లింలను ప్రధాన స్రవంతిలోకి తీసుకురావడం వల్లే ఐరోపా విపత్తు సంభవించిందని ట్రంప్ దీనికి వివరణ ఇస్తున్నారు. అసలు సమస్య ఇస్లాం తప్ప పాఠశాలలు కాదని ఆయన ఉపదేశిస్తున్నారు.
ఆర్‌ఎస్‌ఎస్ అధిపతి మోహన్ భగవత్ తమ సంస్థ వ్యవస్థాపక దినమైన విజయదశమి నాడు చేసిన ప్రసంగంలో, భారతదేశంలోని ప్రభుత్వ వ్యతిరేక నిరసనల వెనుక ప్రపంచ కుట్ర ఉందన్నారు. ఈ నిరసనల తుఫాను పశ్చిమ దేశాల నుండి భారత్‌కు వస్తోందని, 'భారత దేశాన్ని కూల్చివేయడానికి' కొన్ని శక్తులు దీని వెనుక ఉన్నాయని ఆయన చెప్తున్నారు.
దేశంలో ప్రభుత్వ మార్పునకు ఆస్కారం లేదని, మోడీకి పూర్తి మద్దతు ఇస్తున్నామని భగవత్ అన్నారు. మరో మాటలో చెప్పాలంటే, ప్రజల బతుకు పోరాటాన్ని మతం, కులం ప్రాతిపదికన విభజించడం ద్వారా, కార్పొరేట్ పెట్టుబడిదారీ దోపిడీ నిరాటంకంగా కొనసాగడానికి ట్రంప్, భగవత్ తదితరులు మార్గం సుగమం చేస్తున్నారు. ఈ పోరాటం వెనుక వామపక్షాలు ఉన్నాయని ఆరోపిస్తూ, వారు కమ్యూనిస్టులను వేటాడేందుకు కూడా సిద్ధమవుతున్నారు. ఈ సమయంలో ప్రజలతో కలిసి నిలబడి, పోరాట పతాకాన్ని ఎగురవేయడం ప్రతి ఒక్కరి కర్తవ్యం. ప్రపంచవ్యాప్తంగా కమ్యూనిస్టులు, వామపక్షవాదులు, ప్రగతివాదులు ఆ కర్తవ్యాన్ని నెరవేరుస్తున్నారు. భారతదేశంలో మేం చేస్తున్నది అదే. విజయం సాధించే వరకు సిపిఎం, వామపక్షాలు ప్రజలతో కలిసి పోరాడతాయి.
వ్యాసకర్త-సిపిఎం కేరళ రాష్ట్ర కార్యదర్శి ఎం. వి. గోవిందన్
(‘దేశాభిమాని’ సౌజన్యంతో)
కామెంట్‌లు (0)