వారూ అంతే !

నీ ప్రశ్నకు వాళ్లెప్పటికీ​

గొంతివ్వరు​

నిశ్శబ్దాన్నే ప్రేమిస్తారు వాళ్లు.

​

​నిశ్శబ్దమంటే ఇక్కడ ప్రశాంతత కాదు​

వ్యక్తిత్వాలు అమ్ముడుపోయి ​

మిన్నకుండటం​

ఎందుకలా జరుగుతుందో తెలుసా?​

వాళ్ల సుఖవంతమైన జీవితం​

వాళ్లను మాట్లాడకుండా చేస్తుంది​

వారికి కల్పించబడిన చిన్న చిన్న వసతులు​

వారి పెద్ద పెద్ద నోళ్లనూ మూయిస్తాయి.

​

​నువ్వు కోల్పోయిన వాళ్ల​

వరుసలో‌ నిలబడ్డవాడివి​

వాళ్లకు కావలసినది దాన్ని​

వాళ్లు‌ ముందే పొందియున్నారు​

విభజించి పాలించే కుట్రలో ​

పావులైన‌వాళ్లు‌ వాళ్లు.

​

ఇతరుల నోటికాడి కూడు​

అక్రమంగా‌ మాయమవుతున్న ​

తీరును ప్రశ్నించటానికి​

నిజానికి వారి నోళ్లు‌ ఖాళీగా లేవు.

​

​నోటిలో ఎముక వున్న కుక్కలు​

పొరపాటున‌ కూడా మొరగాలనుకోవు​

వారూ అంతే​

నీతో‌ ఎందుకు గొంతు కలుపుతారు!

​ - చిత్తలూరి, ​

సెల్‌: 9133832246