కొరియాపై సంచలన విజయం.. తొలిసారి నాకౌట్లలోకి
మెక్సికో సిటీ: ప్రపంచకప్లో దక్షిణాఫ్రికా చరిత్ర సృష్టించింది. ఆసియా దిగ్గజం దక్షిణ కొరియాపై 1-0 తేడాతో సంచలన విజయం సాధించిన దక్షిణాఫ్రికా, తొలిసారిగా ప్రపంచకప్ నాకౌట్ దశకు అర్హత సాధించింది. గురువారం గ్రూప్-ఎలో జరిగిన కీలక మ్యాచ్లో టపెలో మసేకో చేసిన ఏకైక గోల్ జట్టు విజయాన్ని ఖాయం చేసింది. 1998, 2010, 2022 ప్రపంచకప్లలో గ్రూప్ దశకే పరిమితమైన దక్షిణాఫ్రికా, ఈసారి చరిత్ర తిరగరాసింది. గ్రూప్-ఎలో మెక్సికో మూడు విజయాలతో అగ్రస్థానంలో నిలవగా, దక్షిణాఫ్రికా నాలుగు పాయింట్లతో రెండో స్థానాన్ని దక్కించుకుని నాకౌట్ బెర్త్ ఖాయం చేసుకుంది.
మ్యాచ్లో బంతిని 69 శాతం సమయం తమ ఆధీనంలో ఉంచుకున్న దక్షిణ కొరియా ఆధిపత్యం ప్రదర్శించినా, అవకాశాలను గోల్స్గా మలచడంలో విఫలమైంది. తొలి అర్ధభాగం గోల్స్ లేకుండానే ముగిసింది. అయితే 63వ నిమిషంలో షెపాంగ్ మోరెమి ఇచ్చిన పాస్ను మసేకో గోల్గా మలిచి దక్షిణాఫ్రికాకు ఆధిక్యం అందించాడు. ఆ తర్వాత కొరియా సమం చేసేందుకు తీవ్రంగా ప్రయత్నించినా ఫలితం లేకపోయింది. గణాంకాల పరంగా దక్షిణాఫ్రికా మరింత దూకుడుగా ఆడుతూ 14 షాట్లు లక్ష్యంపైకి సంధించగా, కొరియా కేవలం ఏడు ప్రయత్నాలకే పరిమితమైంది.
టోర్నీలో తొలి మ్యాచ్లో మెక్సికో చేతిలో 2-0తో ఓడిన దక్షిణాఫ్రికా, చెక్ రిపబ్లిక్తో 1-1 డ్రా చేసుకుంది. ఇప్పుడు కొరియాపై సాధించిన చారిత్రాత్మక విజయంతో నాలుగు పాయింట్లు సాధించి నాకౌట్ దశకు చేరుకుంది.
ఇక కొరియా పరిస్థితి మాత్రం అనిశ్చితంగా మారింది. చెక్ రిపబ్లిక్పై 2-1 విజయంతో టోర్నీని ప్రారంభించిన కొరియా, తర్వాత మెక్సికో చేతిలో 1-0తో ఓడింది. ప్రస్తుతం మూడో స్థానంలో ఉన్న ఆ జట్టు నాకౌట్ అవకాశాలు ఇతర గ్రూపుల ఫలితాలపై ఆధారపడి ఉన్నాయి. 2002 ప్రపంచకప్లో సెమీఫైనల్ చేరి సంచలనం సృష్టించిన కొరియా, ఈసారి ఆ ఘనతను పునరావృతం చేయగలదా అన్నది ఆసక్తికరంగా మారింది.
కామెంట్లు (0)