Print Edition​వెలుగుల వెనుక నీడ..

కాంక్రీటు అడవుల మధ్య

పచ్చని జ్ఞాపకాలు

భవనాల పునాదుల్లో సమాధి

​

రంగుల బ్రోచర్లలో

చూపించిన స్వర్గం

చెక్ రూపంలో చేతికి వచ్చాక

చిరునామా లేని నిర్బంధమై కూర్చుంది

​

సూటూ బూటూ వేసుకున్న

అభివృద్ధి సంతకం

నీ తరతరాల ఆత్మగౌరవాన్ని

వేలంలో పెట్టింది

​

ఏ రోడ్డు పక్కనో నిలబడి

నీ సొంత భూమి వైపే చూస్తూ

అనుమతి లేక అడుగుపెట్టలేని

పరదేశివి అయిపోయావు

​

అభివృద్ధి కొలిచే సూచీల్లో

నీ నవ్వుల గణాంకాలు ఉండవు

కంపెనీ బ్యాలెన్స్ షీట్‌లో

నీ ఆక్రందనలకు ఖాతా ఉండదు

​

పరిహారపు నోట్ల కట్టలు

పొలం వాసనను భర్తీ చేయలేవు

ఏసీ గదుల చల్లదనం

నేల కోల్పోయిన సెగను చల్లార్చలేదు

​

అభివృద్ధి అంటే

కొందరికి ఆకాశ హర్మ్యాలు

మరికొందరికి సొంత నేలపైనే

అనాథలుగా మిగలడం!

​

వైష్ణవి శ్రీ

8074210263