Print Editionవేకువ కువకువలు

ఉషోదయ కిరణాలు

సుప్రభాత గీతాలు

శుభోదయ వందనాలు

అలుపుదీర్చు జానపదాలు

గోధూళివేళలో కెంజాయ వర్ణాలు

లేగదూడల పరుగుల అరుపులు

నండూరి ఎంకిపాటలు

అన్నమయ్య సంకీర్తనలు

త్యాగరాజ కీర్తనలు

జయదేవుని అష్టపదులు

అమృతం_ కురిసిన రాత్రులు

పంచతంత్ర కథలు తోలుబొమ్మలాటలు

వీధి నాటకాలు హరికథా కాలక్షేపాలు

భారత రామాయణ గాథలు

జాతీయాలు నానుడులు సామెతలు

పొడుపు కథలు

ఉగాదులు సంక్రాతులు

వేదాలు పురాణాలు ఇతిహాసాలు

సంస్కృతులు సాంప్రదాయాలు

నమస్కారాల సంస్కారాలు

పలుకబడులు పద్దతులు

పంచెకట్టు చీరకట్టుల అలంకరణలు

పెళ్ళిల్లల్లో బంతిభోజనాలు

వేదపండితుల ఆశీర్వచనాలు

గోంగూర నెయ్యి పిండివంటకాలు

రూకటి పచ్చళ్ళ రుచులు

పల్లె వారి వావి వరుసలు ప్రేమలు

తూనీగలతో ఆటలు

కోకిల కూజితాలకు బదిలిచ్చిన కూతలు

కొంగా కొంగా పాలుపొయ్యి అంటూ పాడి

గోళ్ళు చూసుకున్న బాల్యపు గురుతులు

మేకపొదుగులోని పచ్చిపాలు

ఆవులిచ్చిన జున్నుపాలు

పనసలు చెరుకులు కొమ్మతేనెలు

తంగేడుపూలు ఎలక్కాయలు నేరేడుపళ్ళు

ఏటిగట్టున పరుగులు చెరువులోని చేపలు

చిలకమ్మ పలుకులు కందిచేను కులుకులు

సెలయేటి పరవళ్ళు గుడిలోని జేగంటలు

మధుర స్వప్నాలు వెన్నెల రాత్రులు

మరచిపోతే ఎలా

తెలుగులోని తేనె చుక్కలు

మాతృభాష మధురం

తెలుగుభాష మధురాతిమధురం !

- సురేంద్ర రొడ్డ

9491523570