నీట్ పేపర్ లీక్ బాధిత విద్యార్థులకు న్యాయం చేయాలి: సీఐటీయూ

ప్రజాశక్తి-అచ్యుతాపురం: నీట్ ప్రశ్నపత్రాల లీక్ వ్యవహారంలో మనస్తాపానికి గురై ఆత్మహత్యలకు పాల్పడిన విద్యార్థుల కుటుంబాలకు న్యాయం చేయాలని, కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలని సీఐటీయూ నాయకులు డిమాండ్ చేశారు. విద్యావేత్త సోనమ్ వాంగ్‌చుక్ ఢిల్లీలో గత 20 రోజులుగా ఆమరణ నిరాహార దీక్ష చేపట్టిన నేపథ్యంలో, దీక్షను సమస్య పరిష్కారం చేయకుండా ఢిల్లీ పోలీసులు భగ్నం చేయడాన్ని నిరసిస్తూ దేశవ్యాప్తంగా ప్రజాసంఘాలు, అభ్యుదయవాదులు ఇచ్చిన పిలుపు మేరకు అచ్యుతాపురంలో కార్మికులు, విద్యార్థులు నిరసన కార్యక్రమం నిర్వహించారు. ఈ సందర్భంగా సీఐటీయూ జిల్లా కార్యదర్శి ఆర్. రాము, మండల కన్వీనర్ కే. సోము నాయుడు మాట్లాడుతూ, నీట్ పరీక్షల పేపర్ లీక్ వ్యవహారంలో బాధ్యులపై కఠిన చర్యలు తీసుకోవాలని, విద్యార్థుల భవిష్యత్తుతో చెలగాటం ఆడిన వారిని శిక్షించాలని డిమాండ్ చేశారు. పేపర్ లీక్ కారణంగా పలువురు విద్యార్థులు తీవ్ర మనస్తాపానికి గురై ఆత్మహత్యలకు పాల్పడ్డారని, వారి కుటుంబాలకు ప్రభుత్వం తక్షణమే న్యాయం చేయాలని కోరారు. సోనమ్ వాంగ్‌చుక్ చేపట్టిన శాంతియుత ఆమరణ నిరాహార దీక్ష పట్ల కేంద్ర ప్రభుత్వం నిర్లక్ష్యంగా వ్యవహరించడమే కాకుండా, ఢిల్లీ పోలీసులతో దీక్షను భగ్నం చేయించడం ప్రజాస్వామ్య విరుద్ధ చర్య అని విమర్శించారు. సమస్యలను అణచివేయడం కాకుండా చర్చల ద్వారా పరిష్కరించాలని, లేనిపక్షంలో పెద్దఎత్తున ప్రజలను సమీకరించి ఆందోళనలను ఉధృతం చేస్తామని హెచ్చరించారు. ఈ నిరసన కార్యక్రమంలో ప్రభాకర్, ఉమాశంకర్‌తో పాటు విద్యార్థులు, కార్మికులు పాల్గొన్నారు.