* పూండి జమీందారీ ఆచారాల కొనసాగింపు
ప్రజాశక్తి- శ్రీకాకుళం అర్బన్
శ్రీకాకుళం నగరం నడిబొడ్డున, చారిత్రక మున్సిపల్ హైస్కూల్ మైదానానికి ఎదురుగా ఉన్న ‘వరదా నాగావళి హోటల్’ 1991 నుంచి ఆత్మీయ ఆతిథ్యానికి, నమ్మకమైన సేవలకు మారుపేరుగా నిలుస్తోంది. మూడు దశాబ్దాలకు పైగా ఈ హోటల్ వ్యాపార ప్రయాణికులకు, ప్రముఖులకు, కుటుంబాలకు, ఉత్తర కోస్తా ప్రాంతాన్ని సందర్శించే పర్యాటకులకు అత్యంత ఇష్టమైన బస వేదికగా విరాజిల్లుతోంది. ఇప్పుడు ఈ అపూర్వ వారసత్వాన్ని మూడవ తరం యువ నాయకుడు వరదా వెంకట్ ఆశిష్ ముందుకు తీసుకువెళుతున్నారు. పూండి జమీందారీ వారసత్వంలో పాతుకుపోయిన చరిత్రను కాపాడుతూ, ఆధునిక హంగులతో దీనిని తదుపరి అభివృద్ధి దశలోకి నడిపిస్తున్నారు.
మహాత్మాగాంధీతో ముడిపడిన చారిత్రక బంధం
ఈ హోటల్, కుటుంబ మూలాల గురించి ఆశిష్ కొన్ని చారిత్రక విషయాలను పంచుకున్నారు. "మా కుటుంబం ఆతిథ్యానికి ప్రసిద్ధి చెందిన పూండి జమీందారీకి చెందినది. ఉప్పు సత్యాగ్రహ సమయంలో మహాత్మా గాంధీజీ శ్రీకాకుళం జిల్లాను సందర్శించినప్పుడు, తమ పూర్వీకులు ఆయనకు ఆతిథ్యం ఇచ్చారు. ప్రస్తుత హోటల్కు ఎదురుగా ఉన్న మున్సిపల్ హైస్కూల్ మైదానంలో జరిగిన బహిరంగ సభలో గాంధీజీ పాల్గొన్నప్పుడు ఈ ప్రాంగణంలోనే ఆయన అడుగు పెట్టారని ఆయన గుర్తు చేసుకున్నారు. తన ముత్తాత బ్రిటిష్ వారు ప్రదానం చేసిన ప్రతిష్టాత్మకమైన 'రావు బహదూర్' బిరుదును కూడా వదులుకుని, పూండిలోని తమ ఇంట్లో గాంధీజీకి ఘనస్వాగతం పలికారని, ఇది తమ కుటుంబ నిబద్ధతకు నిదర్శనమని తెలిపారు.
మూడు తరాల అంకితభావం
వరదా నాగావళి హోటల్ పునాదిని ఆశిష్ నానమ్మ, మాజీ ఎమ్మెల్యే (టెక్కలి), మాజీ టిటిడి బోర్డు సభ్యురాలైన వరదా సరోజ, వారి తాతగారితో కలిసి వేశారు. ఆ తర్వాత ఈ బాధ్యతను వారి కుమారుడైన వరదా వెంకట్ ఆనంద్ స్వీకరించారు. హోటల్ మేనేజ్మెంట్లో ఉన్నత విద్యనభ్యసించిన ఆయన, మూడు దశాబ్దాలకుపైగా ఈ హోటల్ను ఎంతో అంకితభావంతో నడిపించి, శ్రీకాకుళం ఆతిథ్య రంగంలో దీనిని ఒక మైలురాయిగా నిలిపారు. తన తండ్రి 30 ఏళ్ల పాటు ఈ హోటల్ను విజయవంతంగా నడిపారు. ఇప్పుడు ఆ బాధ్యతను తానకు అప్పగించారు. ఈ పేరు ప్రఖ్యాతులను ఆతిథ్య రంగంలో మరింత ముందుకు తీసుకెళ్లడమే తన లక్ష్యమని ఆశిష్ పేర్కొన్నారు.
దిగ్గజాలు నడయాడిన నేల
ఈ హోటల్కు క్రికెట్ ప్రపంచంతోనూ, దిగ్గజాలతోనూ విడదీయరాని అనుబంధం ఉంది. మెహర్ బాబా టోర్నమెంట్లో భాగంగా ఇండియన్ క్రికెట్ టీమ్ ఇక్కడ బస చేసింది. అప్పట్లో హోటల్లో భారత క్రికెట్ జట్టుకు, సునీల్ గవాస్కర్, కపిల్ దేవ్, రవిశాస్త్రి, మహమ్మద్ అజారుద్దీన్, వెంకటపతి రాజు తదితరులకు అప్పటి కలెక్టర్ ఎస్.పి. సింగ్ ఘనంగా ఆతిథ్యం ఇచ్చారు. అంతేకాకుండా, తెలుగు చలనచిత్ర పరిశ్రమ దిగ్గజం, నందమూరి తారక రామారావు, ప్రస్తుత సిఎం నారా చంద్రబాబు నాయుడు (మూడుసార్లు) ఈ హోటల్ను సందర్శించారు. నటవిరాట్ రావు గోపాలరావు చేతులమీదుగా ఈ హోటల్ ప్రారంభించబడగా... నటులు నందమూరి బాలకృష్ణ, సుమన్, రమేష్, జయప్రద, తనికెళ్ల భరణి, ప్రముఖ గాయకుడు ఎస్.పి. బాలసుబ్రహ్మణ్యం తదితరులు ఇక్కడ అతిథులుగా విచ్చేశారు. ప్రముఖ గాయకుడు శంకర్ మహదేవన్, ప్రసిద్ధ డ్రమ్మర్ శివమణి వంటి ప్రముఖులు ఒక సంగీత పోటీ నిమిత్తం ఇక్కడ బస చేశారు. పలు ప్రతిష్టాత్మక బిసిసిఐ పద్మశ్రీ కాంటెస్ట్లు, అవార్డు గ్రహీతల కార్యక్రమాలు కూడా ఇక్కడే నిర్వహించబడటం విశేషం.
నోరూరించే రుచులు – ప్రత్యేక వంటకాలు
వరదా నాగావళి హోటల్ అనగానే ముందుగా గుర్తుకువచ్చేది ఇక్కడి వెజిటేరియన్ తాళి. అప్పట్లో గణపతి సచ్చిదానంద స్వామి వారి చేతులమీదుగా ఇక్కడి కిచెన్ రూమ్ ప్రారంభించబడింది. ఆ నాటి నుండి నేటి వరకు ఎవరైనా సరే ప్రత్యేకంగా ఇక్కడికి వచ్చి ఈ రుచులను ఆస్వాదిస్తుంటారు. మంచి రుచితో పాటు ఆరోగ్యకరమైన భోజనాన్ని అందించడం వెనుక ఇక్కడి వంట నిపుణుల చేతి గుణమే అసలైన రహస్యం అని నిర్వాహకులు తెలిపారు.
ఆధునిక ప్రయాణికుల కోసం సకల సౌకర్యాలు
నగరం నడిబొడ్డున, ప్రధాన వ్యాపార, షాపింగ్ కేంద్రాలకు అత్యంత సమీపంలో ఉన్న ఈ హోటల్ సౌకర్యానికి, సౌలభ్యానికి మారుపేరుగా నిలుస్తోంది.
ఇక్కడ లభించే ప్రధాన వసతులు
విశాలమైన కార్ పార్కింగ్ సౌకర్యం. అన్ని ఆధునిక హంగులతో కూడిన లగ్జరీ ఎసి రూమ్స్. నిరంతరం అందుబాటులో ఉండే 24/7 ఫ్రంట్ ఆఫీస్ అండ్ రిసెప్షన్ డెస్క్. విభిన్న రుచులతో కూడిన మల్టీ-క్యూజిన్ రెస్టారెంట్ మరియు రూమ్ సర్వీస్. 50 నుంచి 500 మంది సామర్థ్యంతో పెళ్లిళ్లు, సమావేశాలు, కార్పొరేట్ మీటింగ్లకు సరిపోయే అత్యాధునిక బాంక్వెట్ హాల్స్ అందుబాటులో వున్నాయి.
అతిథి దేవోభవ నినాదంతో
తాతా-నానమ్మలు, తండ్రి నిర్మించిన బలమైన పునాదులపై నిలబడి... సాంప్రదాయ జమీందారీ ఆతిథ్యాన్ని, ఆధునిక ఆతిథ్య ధోరణులతో మేళవిస్తున్నారు వరదా వెంకట్ ఆశిష్. "మా నినాదం ఎల్లప్పుడూ 'అతిథి దేవో భవ'. మా పూర్వీకులు గాంధీజీని ఏ ఆతిథ్యంతో ఆహ్వానించారో, అదే ఆప్యాయతను తమ హోటల్కి వచ్చే ప్రతీ అతిథికి అందిస్తాం. తమ వారసత్వాన్ని, విలువలను కాపాడుకుంటూనే వసతులను ఎప్పటికప్పుడు ఆధునీకరిస్తున్నామన్నారు. 33 ఏళ్ల ప్రయాణంలో వరదా నాగావళి హోటల్ కేవలం బస చేసే ప్రదేశం మాత్రమే కాదు... శ్రీకాకుళం చరిత్రలో, గర్వకారణమైన సంస్కృతిలో ఒక సజీవ భాగం. మూడవ తరం యువ నాయకత్వంలో ఈ ప్రయాణం మరింత వైభవంగా సాగిపోతోంది.
ఫోటో: హోటల్ నాగావళి
కామెంట్లు (0)