‘ఓరి నాయనో’ షూటింగ్‌ ప్రారంభం

యువ నటీనటులు మహేష్‌ దత్తా, గాయత్రి చాగంటి జంటగా నటిస్తున్న చిత్రం ‘ఓరి నాయనో’. శుక్రవారం హైదరాబాద్‌లో ఈ సినిమా షూటింగ్‌ ప్రారంభమైంది. ముహూర్తపు షాట్‌కు ప్రముఖ నిర్మాత వంశీ నందిపాటి క్లాప్‌ కొట్టగా, తొలి సన్నివేశానికి డా. అనిల్‌ విశ్వనాథ్‌ దర్శకత్వం వహించారు. ఈ సందర్భంగా వంశీ నందిపాటి మాట్లాడుతూ.. ఆసక్తికరమైన కథాంశాలతో రూపొందే సినిమాలు ప్రేక్షకుల ఆదరణ పొందుతాయని, ‘ఓరి నాయనో’ కూడా మంచి విజయం సాధించాలని ఆకాంక్షించారు. చిత్రానికి అవసరమైన సందర్భాల్లో తన సహాయ సహకారాలు అందిస్తానని తెలిపారు. తన హృదయానికి దగ్గరైన కథను ఈ సినిమా ద్వారా ప్రేక్షకుల ముందుకు తీసుకొస్తున్నానని దర్శకుడు మణి తేజ గొంది పేర్కొన్నారు. సాయి అభిషేక్‌ ఈ చిత్రాన్ని నిర్మిస్తున్నారు.