హోర్ముజ్ : పశ్చిమాసియాలో యుద్ధ ఉద్రిక్తతలు కొనసాగుతున్న వేళ హోర్ముజ్ జలసంధిలో మరోసారి కలకలం రేగింది. సముద్రంలో ఏర్పాటు చేసిన మందుపాతర (మైన్) పేలడంతో రెండు ఆయిల్ ట్యాంకర్లకు మంటలు అంటుకున్నాయని ఇరాన్ రివల్యూషనరీ గార్డ్ నేవీ ప్రకటించింది. మరోవైపు ఖతార్‌కు చెందిన సహజవాయువు నౌకపై జరిగిన దాడిని గల్ఫ్ దేశాలు తీవ్రంగా ఖండించాయి. ఇరాన్ అనుమతి లేకుండా సముద్ర మార్గంలో ప్రయాణిస్తున్న నౌకలు మైన్‌ను ఢీకొన్నాయని, దీంతో వాటికి మంటలు అంటుకున్నాయని ఇరాన్ వెల్లడించింది. అయితే ప్రమాదానికి గురైన నౌకల పేర్లు, వాటి జాతీయత, సిబ్బంది పరిస్థితిపై వివరాలు వెల్లడించలేదు. ఇరాన్ చేసిన ఈ వాదనలను స్వతంత్రంగా ధ్రువీకరించాల్సి ఉంది.
హోర్ముజ్‌లో నౌకాయానంపై ఇరాన్ విధించిన ఆంక్షలే ఈ వివాదానికి ప్రధాన కారణాలలో ఒకటి. ఆంక్షలను ఉల్లంఘించే నౌకలపై ఇరాన్ కఠిన చర్యలు కొనసాగిస్తోంది. అదే సమయంలో, అంతర్జాతీయ నౌకా మార్గాల్లోని మందుపాతరలను తొలగించినట్లు అమెరికా సైన్యం స్పష్టం చేసింది. నౌకలు మందుపాతరలను ఢీకొన్నాయన్న ఇరాన్ మునుపటి వాదనలను కూడా అమెరికా ఖండించింది.
సౌదీ అరేబియా, ఖతార్‌ల చమురు ట్యాంకర్లపై జరిగిన దాడులను గల్ఫ్ సహకార మండలి తీవ్రంగా ఖండించింది. బహ్రెయిన్, కువైట్‌తో సహా పలు దేశాల్లోని జనావాస కేంద్రాలు, మౌలిక సదుపాయాలపై ఇరాన్ జరిపిన దాడులను కూడా ఈ మండలి విమర్శించింది.
ఇదిలా ఉండగా, ఘర్షణలకు ముగింపు పలికేందుకు ఖతార్ మధ్యవర్తిత్వంతో అమెరికా, ఇరాన్ మధ్య పరోక్ష చర్చలు కొనసాగుతున్నాయి. ఇరాన్‌పై ఆంక్షల ఎత్తివేత, స్తంభింపజేసిన ఆస్తుల విడుదల, హోర్ముజ్ జలసంధిని తిరిగి తెరవడం వంటి అంశాలు చర్చల్లో ప్రధానంగా ఉన్నాయి. అయితే దౌత్యపరమైన ప్రయత్నాలు కొనసాగుతున్నప్పటికీ, సైనిక చర్యను ముగించేందుకు ఎలాంటి ఒప్పందం కుదరలేదు.
కామెంట్‌లు (0)