యుద్ధోన్మాదానికి చెంపపెట్టు

ట్రంప్‌నకు యువత, హిస్పానిక్ ఓటర్ల షాక్
తొలి ముస్లిం సెనేట్‌‌గా ఎన్నికైన అబ్దుల్‌ ఎల్‌ సయూద్‌

వాషింగ్టన్ : అమెరికా మధ్యంతర ఎన్నికల్లో అధ్యక్షుడు డొనాల్డ్ ట్రంప్ యుద్ధోన్మాద, భారాల మోత విధానాలను ప్రజలు తిరస్కరించారు. తనే బరిలో ఉన్నట్లు భావించి ఓటు వేయాలని ట్రంప్ పదేపదే విజ్ఞప్తి చేసినా, జార్జియా, టెక్సాస్, ఒహాయో, నార్త్ కరోలినా, న్యూ హాంప్‌షైర్ వంటి కీలక రాష్ట్రాల్లో డెమోక్రాట్లు ఘన విజయాలు సాధించి, కాంగ్రెస్ ఉభయ సభలపై పట్టు సాధించారు.

 సెనేట్‌కు ఎన్నికైన తొలి ముస్లింగా అబ్దుల్ ఎల్ సయీద్ రికార్డు

అబ్దుల్ ఎల్ సయీద్ (42) మిచిగాన్ నుంచి డెమొక్రటిక్‌ ‌పార్టీ తరపున సెనేట్‌కు ఎన్నికై, ఆ రాష్ట్రం నుంచి ఈ పదవి చేపట్టనున్న తొలి ముస్లింగా చరిత్ర సృష్టించారు. రిపబ్లికన్ అభ్యర్థి మైక్ రోజర్స్‌పై ఆయన గెలిచారు. 85 శాతం ఓట్ల లెక్కింపు సమయానికి ఎల్ సయీద్‌కు సుమారు 22.07 లక్షల ఓట్లు (51.97 శాతం) రాగా, రోజర్స్‌కు సుమారు 19.55 లక్షల ఓట్లు వచ్చాయి. ఈజిప్టు మూలాలున్న ఎల్ సయీద్ ప్రజారోగ్య కార్యకర్త. మిచిగాన్, కొలంబియా విశ్వవిద్యాలయాల్లో వైద్య విద్య అభ్యసించి, ఆక్స్‌ఫర్డ్‌లో రోడ్స్ స్కాలర్‌గా డాక్టరేట్ పూర్తి చేశారు. డెట్రాయిట్, వేన్ కౌంటీ ఆరోగ్య విభాగాలకు నాయకత్వం వహించారు. 2018లో గవర్నర్ పదవికి జరిగిన డెమోక్రటిక్ ప్రైమరీలో గ్రెచెన్ విట్మర్ చేతిలో ఓడిన ఆయన, కొంతకాలం రాజకీయాలకు దూరమై పాడ్‌కాస్ట్, పుస్తకం, యూట్యూబ్, టివి కార్యక్రమాల ద్వారా ప్రజలకు దగ్గరయ్యారు. ఈ ప్రచారంలో జీవన వ్యయం, ఆరోగ్య సంరక్షణకు ప్రాధాన్యమిస్తూ ‘‘అందరికీ మెడికేర్’’ విధానానికి మద్దతు పలికారు.

గవర్నర్ల రేసులో చారిత్రక రికార్డులు

జార్జియా: డెమోక్రాట్ కీషా లాన్స్ బాటమ్స్ (అట్లాంటా మాజీ మేయర్) గెలిచి, అమెరికా చరిత్రలో గవర్నర్‌గా ఎన్నికైన తొలి నల్లజాతి మహిళగా నిలిచారు. సొంత డబ్బు 200 మిలియన్ డాలర్లకు పైగా ఖర్చు చేసిన రిపబ్లికన్ బిలియనీర్ అభ్యర్థిని ఆమె ఓడించడం మరో విశేషం. దీంతో 24 ఏళ్ల రిపబ్లికన్ పాలనకు తెరపడింది.

న్యూ మెక్సికో: డెమోక్రాట్ డెబ్ హాలాండ్ గెలిచి, ఒక రాష్ట్రానికి నేతృత్వం వహించనున్న తొలి స్థానిక అమెరికన్ (నేటివ్ అమెరికన్) మహిళగా రికార్డు సృష్టించారు.

టెక్సాస్ : డెమోక్రాట్ జినా హినోజోసా, మూడుసార్లు గవర్నర్‌గా పనిచేసిన రిపబ్లికన్ దిగ్గజం గ్రెగ్ అబాట్‌ను ఓడించి, రాష్ట్ర తొలి లాటినా గవర్నర్‌గా నిలిచారు.

ఫ్లోరిడా : ట్రంప్ మద్దతున్న రిపబ్లికన్ బైరన్ డొనాల్డ్స్ గెలిచి, రాష్ట్ర తొలి నల్లజాతి గవర్నర్ అయ్యారు.

ఒహాయో : ట్రంప్ మద్దతుతో పోటీ చేసిన వివేక్ రామస్వామి ఓడిపోయారు. దీంతో ఒహాయో గవర్నర్ పదవి రిపబ్లికన్ల చేజారింది. పదవీకాలం ముగుస్తున్న రిపబ్లికన్ గవర్నర్ మైక్ డివైన్ స్థానంలో డెమోక్రాట్ అభ్యర్థి బాధ్యతలు చేపడతారు.

న్యూయార్క్ : గవర్నర్ కేథీ హోచుల్ తిరిగి ఎన్నికయ్యారు. న్యూయార్క్ నగర మేయర్ జోహ్రాన్ మమ్దానీ ఈ ఫలితాలను పార్టీకి ‘‘మలుపు’’గా అభివర్ణించారు. ‘‘మన పార్టీని మార్చి, మళ్లీ శ్రామిక ప్రజలకు చెందేలా చేసే పనిని ప్రారంభించాం’’ అని ఆయన అన్నారు.

యేల్ విశ్వవిద్యాలయంలో చదువుకున్న, ఇరవైలలో ఉన్న సామాజిక కార్యకర్త జ్యోత్ సింగ్, 2026 అమెరికా మధ్యంతర ఎన్నికలలో జార్జియా జనరల్ అసెంబ్లీకి ఎన్నికైన మొట్టమొదటి సిక్కు అమెరికన్ మరియు మొట్టమొదటి భారతీయ అమెరికన్‌గా చరిత్ర సృష్టించారు. డెమొక్రాట్ అయిన సింగ్, నవంబర్ 3న జరిగిన ఎన్నికలలో రిపబ్లికన్ యాసిన్ మొఘాజీని ఓడించి, గ్విన్నెట్ కౌంటీలోని డల్త్, పీచ్‌ట్రీ కార్నర్స్, నార్‌క్రాస్ ప్రాంతాలు మరియు బర్కిలీ లేక్ మొత్తాన్ని కవర్ చేసే డిస్ట్రిక్ట్ 97 నుండి జార్జియా హౌస్ ఆఫ్ రిప్రజెంటేటివ్స్ సీటును గెలుచుకున్నారు. ‘‘మనం గెలిచాం!!! జార్జియాకు ధన్యవాదాలు! హెచ్‌డి-97లో మీ ప్రతినిధిగా ఎన్నికైనందుకు నేను గౌరవంగా భావిస్తున్నాను,’’ అని ఆయన ఎక్స్ లో ఒక పోస్ట్‌లో పేర్కొన్నారు.

భారత సంతతి నేతల విజయాలు

ఫ్లోరిడాలోని 22వ కాంగ్రెస్ జిల్లా నుంచి భారతీయ అమెరికన్ పియా దండియా (డెమోక్రాట్) గెలిచారు. మెరైన్ వెటరన్ కేసీ అస్కర్‌పై ఆమెకు 51.9 శాతం ఓట్లు రాగా, ప్రత్యర్థికి 49.1 శాతం వచ్చినట్లు నివేదికలు పేర్కొన్నాయి. భారతదేశం నుంచి వలస వచ్చిన తల్లిదండ్రులకు పుట్టిన ఆమె, హార్లెమ్‌లో హైస్కూల్ ప్రిన్సిపాల్‌గా పనిచేశారు. 28 ఏళ్లకే పాఠశాల వ్యవస్థాపక ప్రిన్సిపాల్ అయ్యారు. ఆమె స్థాపించిన పాఠశాలలో 86 శాతం మంది విద్యార్థులు తక్కువ ఆదాయ కుటుంబాల వారైనా, గ్రాడ్యుయేట్లందరూ కాలేజీ ప్రవేశం పొందారు. అలాగే, వర్జీనియా 10వ జిల్లా నుంచి మరోసారి ఎన్నికయ్యారు. రిపబ్లికన్ డేవ్ బెక్‌విత్‌పై 61.5 శాతం ఓట్లు సాధించారు. 40 ఏళ్ల సుహాస్ గతంలో అధ్యక్షుడు బరాక్ ఒబామాకు సలహాదారుగా పనిచేశారు. న్యూయార్క్ అటార్నీ జనరల్ పదవికి ట్రంప్ మద్దతుతో పోటీ చేసిన రిపబ్లికన్ అభ్యర్థి సరిత కోమటిరెడ్డి, డెమోక్రాట్ అభ్యర్థి లెటీషియా జేమ్స్ చేతిలో ఓటమిని అంగీకరించారు. ప్రజాసేవ అంటే ప్రజలకు సేవ చేయడమే తప్ప, ప్రచారం లేదా వ్యక్తిగత లాభం కాదని ఆమె వ్యాఖ్యానించారు.

అంతరిక్షం నుండి ఓటు..

నాసా ఆస్ట్రోనాట్లు భూమికి సుమారు 400 కిలోమీట‌ర్ల ఎత్తు నుంచి త‌మ ఓటు హ‌క్కును వినియోగిం చుకున్నారు. అమెరికా మ‌ధ్యంత‌ర ఎన్నిక‌ల్లో ముగ్గురు వ్యోమ‌గాములు అంత‌ర్జాతీయ అంత‌రిక్ష కేంద్రం నుంచి త‌మ ఓటు వేశారు. మైక్రో గ్రావిటీలో ఓటేసిన తీరుపై భార‌త సంత‌తి ఆస్ట్రోనాట్ అనిల్ మీన‌న్ త‌న ఎక్స్ అకౌంట్‌లో ఓ వీడియో పోస్టు చేశారు. మీన‌న్‌తో పాటు మ‌రో ఇద్ద‌రు అమెరిక‌న్ సిబ్బంది కూడా ఓటింగ్‌లో పాల్గొన్న‌ది. అయితే డిజిట‌ల్ రూపంలో వ్యోమ‌గాములు ఓటేశారు. ఎల‌క్ట్రానిక్ బ్యాలెట్ ద్వార ఓటేసిన‌ట్లు మీన‌న్ త‌న వీడియోలో తెలిపారు. స్పేస్ స్టేష‌న్‌లో ఉన్న ల్యాప్‌టాప్ ద్వారా ఎల‌క్ట్రానిక్ ఓటును వినియోగించుకున్నారు. నాసా క‌మ్యూనికేష‌న్ వ్య‌వ‌స్థ ద్వారా ఆ డిజిట‌ల్ ఓట్లు భూమికి చేరుతాయి. టెక్సాస్ మ‌ధ్యంత‌ర ఎన్నిక‌ల్లో తాను ఓటు వేస్తున్న‌ట్లు మీన‌న్ తెలిపారు. ఆకాశం నుంచి కూడా ఓటు వేయ‌వ‌చ్చు అని, స్పేస్ స్టేష‌న్ నుంచి ముగ్గురం ఓటు వేశామ‌ని, ఎల‌క్ట్రానిక్ బ్యాలెట్ నింపి, దాన్ని భ‌ద్రంగా ఎల‌క్ష‌న్ అధికారుల‌కు పంపిన‌ట్లు అనిల్ మీన‌న్ తెలిపారు. ప్ర‌స్తుతం మీన‌న్ వీడియో వైర‌ల్ అవుతోంది.

హెచ్-1బి వీసాదారులకు ఊరట లభిస్తుందా?

అమెరికాలో పనిచేస్తున్న భారత నిపుణులపై కూడా ఎన్నికల ఫలితాలు ప్రభావం చూపే అవకాశం ఉంది. ముఖ్యంగా హెచ్-1బి వీసాదారులకు సంబంధించి భవిష్యత్తులో వలస విధానాలపై కాంగ్రెస్‌లో చర్చలు, పర్యవేక్షణ పెరగవచ్చు. అయితే తక్షణమే వీసా నిబంధనలు మారిపోతాయని చెప్పలేం. కొత్త హెచ్-1బి దరఖాస్తులపై లక్ష డాలర్ల ఫీజు విధిస్తూ ట్రంప్ గత సెప్టెంబర్‌లో ప్రకటించిన నిర్ణయం కూడా ఆటోమేటిక్‌గా రద్దు కాదు. కాంగ్రెస్‌లో డెమోక్రాట్ల బలం పెరగడంతో భారత్‌కు సంబంధించిన అంశాలపై చర్చలు, నిర్ణయాల పరిశీలనకు మరింత ప్రాధాన్యం లభించవచ్చు. ముఖ్యంగా వాణిజ్యం, రక్షణ సహకారం, వలస విధానాలపై చట్టసభల్లో చర్చలు పెరిగే అవకాశం ఉంది. అయితే విదేశాంగ విధానంలో ట్రంప్ అధికారాలు కొనసాగుతాయి. అధ్యక్షుడి వీటో, సెనేట్‌లో ఫిలిబస్టర్ వంటి నిబంధనలు డెమోక్రాట్ల నిర్ణయాలకు పరిమితులు విధించవచ్చు. అందువల్ల ఈ ఎన్నికలతో భారత్-అమెరికా సంబంధాల్లో తక్షణ మార్పులు వస్తాయని భావించలేం.