లాస్ ఏంజెల్స్: ప్రముఖ నటి జీన్ స్మార్ట్ ఎమ్మి అవార్డ్స్ (Emmy Awards) చరిత్రలో అరుదైన ఘనత సాధించారు. ఒకే టెలివిజన్ షోలోని అన్ని సీజన్లకు గాను ఉత్తమ నటిగా అవార్డు అందుకున్న తొలి మహిళా నటిగా ఆమె రికార్డు సృష్టించారు. ‘హ్యాక్స్’ (Hacks) సిరీస్లో డెబోరా వాన్స్ పాత్రలో అద్భుత నటనకు గాను ఆమె ‘ఉత్తమ కామెడీ సిరీస్ నటి’ (Best Actress in a Comedy Series) విభాగంలో ఈ అవార్డును గెలుచుకున్నారు. ఎచ్బీఓ మాక్స్ (HBO Max) లో ప్రసారమైన ‘హ్యాక్స్’ ఐదో సీజన్కు గాను ఆమెకు ఈ పురస్కారం లభించింది.
నటి జెండాయా చేతుల మీదుగా జీన్ స్మార్ట్ ఈ అవార్డును అందుకున్నారు. ఈ సందర్భంగా ఆమెకు సభలో ఉన్నవారంతా లేచి నిలబడి (స్టాండింగ్ ఒవేషన్) శుభాకాంక్షలు తెలిపారు. అవార్డును స్వీకరించిన అనంతరం జీన్ స్మార్ట్ మాట్లాడుతూ తనదైన శైలిలో నవ్వులు పూయించారు. పోటీలో ఉన్న తోటి నటీమణుల ఇబ్బందులను సరదాగా ప్రస్తావిస్తూ.. "కేవలం పురుషులు మాత్రమే నిలబడండి, మహిళలు కూర్చోవచ్చు. ప్రతిసారీ ఇది జరిగినప్పుడు నటీమణులు తమ డ్రెస్లు, షూల వల్ల పడే ఇబ్బందులను గుర్తుచేసుకుంటాను. 'ఆమెకేం అంత గొప్పగా నటించలేదు, వయసు పెరిగినందుకే అందరూ లేచి నిలబడ్డారు' అని వారు అనుకుంటూ ఉంటారు" అని సరదాగా వ్యాఖ్యానించారు. అలాగే ‘హ్యాక్స్’ రూపకర్తలు లూసియా అనియెల్లో, జెన్ స్టాట్స్కీ, పాల్ డబ్ల్యూ. డౌన్స్లకు తన విజయాన్ని అంకితం ఇస్తున్నట్లు ప్రకటించారు.
బిల్ కాస్బీ రికార్డు సమం.. అత్యధిక అవార్డుల జాబితాలో అగ్రస్థానం
ఇంతకుముందు 1966-1968 మధ్య కాలంలో 'ఐ స్పై' సిరీస్ మూడు సీజన్లకు గాను నటుడు బిల్ కాస్బీ మాత్రమే వరుసగా ఎమ్మి అవార్డులను గెలుచుకున్నారు. ఇప్పుడు జీన్ స్మార్ట్ 'హ్యాక్స్' ఐదు సీజన్లకు గాను అవార్డులు సాధించి, ఈ రికార్డు సాధించిన తొలి మహిళగా నిలిచారు.
ఈ గెలుపుతో జీన్ స్మార్ట్ తన కెరీర్లో మొత్తం 8వ ఎమ్మి అవార్డును తన ఖాతాలో వేసుకున్నారు. దీనితో అత్యధిక ఎమ్మి అవార్డులు గెలుచుకున్న నటీనటులు జూలియా లూయిస్-డ్రెఫస్, క్లోరిస్ లీచ్మన్ల సరసన ఆమె నిలిచారు. నామినేషన్ల రేసులో ఈ విభాగంలో లిసా కుడ్రో (‘ది కమ్బ్యాక్’), క్వింటా బ్రన్సన్ (‘యాబట్ ఎలిమెంటరీ’), ఎల్ ఫాన్నింగ్ (‘మార్గోస్ గాట్ మనీ ట్రబుల్స్’), ఆయో ఎడెబిరి (‘ది బేర్’) పోటీపడ్డారు. ఐదు సీజన్ల పాటు అలరించిన 'హ్యాక్స్' సిరీస్ ఈ ఏడాదితో పూర్తయింది.
కామెంట్లు (0)