తమిళ మూలాలున్న దక్షిణాఫ్రికా మహిళకు శాంతి పురస్కారం
మానవహక్కుల కోసం విశేష కృషి
స్టాక్‌హౌమ్‌: ఈ ఏడాది ప్రతిష్ఠాత్మక నోబెల్‌ శాంతి పురస్కారం భారత్ మూలాలున్న దక్షిణాఫ్రికా వాసి నవనీతమ్‌ ‘నవీ’ పిళ్లైను వరించింది. నార్వే రాజధాని ఓస్లోలో నోబెల్‌ కమిటీ ఈ పురస్కారాన్ని ప్రకటించింది. అంతర్జాతీయ న్యాయం, శాంతిని పెంపొందించేందుకు నవీ చేసిన విశేష కృషికి గుర్తింపుగా ఈ అవార్డు దక్కింది. మానవ హక్కుల కోసం ఆమె విశేష కృషి చేశారని నోబెల్‌ కమిటీ కొనియాడింది.
నోబెల్‌ శాంతి పురస్కారం కోసం నోబెల్‌ కమిటీకి 287 నామినేషన్లు
ఈ ఏడాది నోబెల్‌ శాంతి పురస్కారం కోసం నోబెల్‌ కమిటీకి 287 నామినేషన్లు అందాయి. సూడాన్‌లోని ఎమర్జెన్సీ బృందాలు, ఉక్రెయిన్‌లోని పిల్లల హక్కుల కార్యకర్తలు, రెండు అంతర్జాతీయ న్యాయస్థానాలతో పాటు కెనడా ప్రధాని మార్క్‌ కార్నీ ఈ అవార్డు రేసులో నిలిచారు. శాంతి స్థాపన, సోదరభావాన్ని పెంపొందించడం వంటి లక్ష్యాల కోసం విశేష కృషి చేసిన నవీ పిళ్లై వైపే నోబెల్‌ కమిటీ మొగ్గుచూపింది. మరింత శాంతియుత ప్రపంచానికి అంతర్జాతీయ చట్టం ఓ పునాది అని, ప్రస్తుతం అనేక సంఘర్షణలు, సవాళ్లు ఎదుర్కొంటున్న సమయంలో ఇది అత్యంత అవసరమని అభిప్రాయపడింది.''అసాధారణ ధైర్యం, నిజాయితీతో సమగ్రమైన ప్రపంచ న్యాయ వ్యవస్థకు మార్గం చూపిన వ్యక్తికి 2026 నోబెల్‌ శాంతి బహుమతి లభించింది. యుద్ధ నేరాలు, మానవత్వానికి వ్యతిరేక నేరాలు, జాతి నిర్మూలనపై విచారణ జరిగేలా చూడటంలో నవీ పిళ్లై కీలక పాత్ర పోషించారు. శాంతి, అంతర్జాతీయ చట్టాన్ని ప్రోత్సహించడానికి చేసిన కృషికి గాను ఆమెకు 2026 నోబెల్‌ శాంతి బహుమతిని ప్రదానం చేస్తున్నాం. దక్షిణాఫ్రికాలోని డర్బన్‌లో వర్ణవివక్ష పాలనలో భారతీయ తమిళ మూలాలున్న కుటుంబంలో జన్మించిన పిళ్ళై, లోతైన వ్యవస్థాగత వివక్ష, వేర్పాటు, బహిష్కరణను ఎదుర్కొంటూ న్యాయవాదిగా, న్యాయరంగ మార్గదర్శకురాలిగా ఎదిగారు.'' అని నోబెల్‌ కమిటీ పేర్కొంది.
కామెంట్‌లు (0)