వాషింగ్టన్‌ : అమెరికాను ఇరాన్‌తో అనవసరమైన యుద్ధంలోకి ట్రంప్‌ ప్రభుత్వం నెట్టిందని మాజీ అధ్యక్షుడు బరాక్‌ ఒబామా విమర్శించారు. నవంబర్‌ 3న జరగనున్న మధ్యంతర ఎన్నికల నేపథ్యంలో ఒహాయో, మిచిగాన్‌ రాష్ట్రాల్లో శనివారం డెమోక్రటిక్‌ పార్టీ అభ్యర్థులకు మద్దతుగా ఆయన ప్రచారం నిర్వహించారు. ఒహాయోలోని క్లీవ్‌ల్యాండ్‌లో మాజీ డెమోక్రటిక్‌ సెనేటర్‌ షెరాడ్‌ బ్రౌన్‌కు మద్దతుగా జరిగిన ర్యాలీలో మాట్లాడుతూ ట్రంప్‌ పాలనపై తీవ్ర విమర్శలు చేశారు. ట్రంప్‌ ప్రభుత్వం అరాచకం, అవినీతికి పాల్పడుతోందని ఆరోపిస్తూ, రిపబ్లికన్‌ పార్టీని తిరస్కరించాలని ఓటర్లకు పిలుపునిచ్చారు. ట్రంప్‌ వరుసగా తప్పుడు నిర్ణయాలు తీసుకుంటున్నారని ఒబామా ఆరోపించారు. ఎవరికీ ప్రయోజనం చేకూర్చని అనవసరమైన యుద్ధాన్ని ప్రారంభించడం వాటిలో అత్యంత కీలకమైనదని విమర్శించారు. తన హయాంలో 2015లో కుదిరిన ఇరాన్‌ అణు ఒప్పందాన్ని ఈ సందర్భంగా సమర్థించారు. ఆ ఒప్పందం ద్వారా ఇరాన్‌ అణ్వాయుధాలను పొందకుండా నిరోధించేందుకు దౌత్యపరమైన మార్గాన్ని అనుసరించామని పేర్కొన్నారు. ట్రంప్‌ ఆ ఒప్పందం నుంచి వైదొలిగి, ఇప్పుడు యుద్ధానికి దిగారని విమర్శించారు. ఈ సంఘర్షణ కారణంగా అమెరికా, దాని మిత్రదేశాల సైనిక స్థావరాలపై దాడులు, అమెరికన్ల ప్రాణనష్టం, హార్ముజ్‌ జలసంధి మీదుగా నౌకాయానానికి అంతరాయాలు ఏర్పడుతున్నాయని ఒబామా ఆరోపించారు. వీటి ప్రభావంతో చమురు, డీజిల్‌ ధరలు పెరుగుతున్నాయని పేర్కొన్నారు. సైనిక సంస్కృతిపై రక్షణ మంత్రి పీట్‌ హెగ్సెత్‌ దృష్టి సారించడాన్ని కూడా ఒబామా విమర్శించారు. 2009లో ఫోర్ట్‌ హుడ్‌లో 13 మందిని హత్య చేసిన కేసులో దోషిగా తేలిన నిడాల్‌ హసన్‌కు ఉరిశిక్ష అమలును ప్రత్యక్ష ప్రసారం చేయాలన్న పెంటగాన్‌ ప్రణాళికలపై ఎద్దేవా చేశారు.
జీవన వ్యయాన్ని పెంచిన సుంకాలు
ట్రంప్‌ విధించిన దిగుమతి సుంకాలు అమెరికన్లపై అదనపు ఆర్థిక భారాన్ని మోపుతున్నాయని ఒబామా విమర్శించారు. దిగుమతి చేసుకున్న భాగాలతో అమెరికాలో తయారైన ఉత్పత్తులు సహా అనేక వస్తువుల ధరలు పెరిగాయని, సుంకాల భారాన్ని చివరకు వినియోగదారులే భరిస్తున్నారని అన్నారు. అమెరికాకు కీలక వాణిజ్య భాగస్వామి అయిన కెనడాతో ట్రంప్‌ ప్రభుత్వం వాణిజ్య వివాదాలకు దిగడాన్ని ఆయన ప్రశ్నించారు. సుంకాల ద్వారా ప్రభుత్వ బడ్జెట్‌ లోటును తగ్గిస్తామని ట్రంప్‌ చెప్పినప్పటికీ, అమెరికా జాతీయ అప్పు 40 ట్రిలియన్‌ డాలర్లకు చేరుకుందని ఒబామా పేర్కొన్నారు. ఈ మొత్తం దేశ ఫెడరల్‌ ప్రభుత్వానికి పేరుకుపోయిన అప్పును సూచిస్తుందని, ఇది ఒక్క ఏడాది బడ్జెట్‌ లోటుకు మాత్రమే పరిమితం కాదని వివరించారు.
ధనవంతులకు ప్రయోజనం చేకూర్చే విధానాలు
సాధారణ కుటుంబాలు పెరుగుతున్న జీవన వ్యయంతో ఇబ్బందులు పడుతుండగా, ట్రంప్‌ ప్రభుత్వం సంపన్న అమెరికన్లకు ప్రయోజనం చేకూర్చే విధానాలను అమలు చేస్తోందని ఒబామా ఆరోపించారు. మెడికేడ్‌ ఆరోగ్య పథకం, ఆహార సహాయం వంటి కార్యక్రమాలకు సంబంధించిన ప్రభుత్వ వ్యయాన్ని తగ్గిస్తూ, పన్ను కోతలను పొడిగించడాన్ని ఆయన తప్పుబట్టారు. ట్రంప్‌ ప్రభుత్వం 2025లో తీసుకొచ్చిన పన్నులు, వ్యయాలకు సంబంధించిన చట్టాన్ని ప్రస్తావిస్తూ, గత రెండేళ్లలో ఆమోదించిన ప్రధాన చట్టాల్లో అత్యంత సంపన్న అమెరికన్లకు ప్రయోజనం చేకూర్చే భారీ పన్ను మినహాయింపులకే ప్రాధాన్యం ఇచ్చారని విమర్శించారు. సాధారణ ప్రజల ఆర్థిక ఇబ్బందులను పరిష్కరించడంలో ప్రభుత్వం విఫలమైందని ఆరోపించారు.
కామెంట్‌లు (0)