పనామాను వణికించిన భారీ భూకంపం

- కుప్పకూలిన భవనాలు, పలు ప్రాంతాల్లో విద్యుత్ అంతరాయం

పనామా: మధ్య అమెరికా దేశమైన పనామాలో శుక్రవారం (అక్టోబర్ 9) భారీ భూకంపం సంభవించింది. తొలుత 8.0 తీవ్రతగా నమోదైన ఈ భూకంపాన్ని అమెరికా భూగర్భ పరిశోధన సంస్థ (యూఎస్‌జీఎస్‌) అనంతరం 7.7 తీవ్రతగా సవరించింది. దక్షిణ పనామా ప్రాంతంలో భూకంప కేంద్రం నమోదైంది. భూమికి సుమారు 12.6 కిలోమీటర్ల లోతులో ప్రకంపనలు సంభవించినట్లు నివేదికలు వెల్లడించాయి. రాజధాని పనామా సిటీలోనూ భూకంప ప్రభావం కనిపించడంతో ప్రజలు భయాందోళనలకు గురయ్యారు. కార్యాలయాలు, భవనాల నుంచి వేలాది మంది బయటకు పరుగులు తీశారు. కొన్ని ప్రాంతాల్లో భవనాలు కూలిపోగా, చర్చికి నష్టం వాటిల్లింది. రహదారులపై పగుళ్లు ఏర్పడ్డాయి. ఆరు ప్రావిన్సుల్లో విద్యుత్ సరఫరాకు అంతరాయం ఏర్పడింది. భూకంపం అనంతరం 40కి పైగా ప్రకంపనలు సంభవించడంతో ప్రజలు మరింత ఆందోళనకు గురయ్యారు. తొలుత సునామీ హెచ్చరికలు జారీ చేసినప్పటికీ, అనంతరం వాటిని ఉపసంహరించారు. భూకంపం కారణంగా టోకుమెన్ అంతర్జాతీయ విమానాశ్రయంలో విమాన కార్యకలాపాలను తాత్కాలికంగా నిలిపివేసి, తరువాత పునరుద్ధరించారు. పనామా కాలువ కార్యకలాపాలు యథావిధిగా కొనసాగుతున్నట్లు అధికారులు తెలిపారు. పనామా అధ్యక్షుడు రౌల్ ములినో ప్రభావిత ప్రాంతాలను సందర్శించి పరిస్థితిని సమీక్షించారు. తొలుత అందిన సమాచారం ప్రకారం, భారీ ప్రాణనష్టం జరిగినట్లు అధికారికంగా వెల్లడికాలేదు. అయితే, నష్టంపై అంచనాలు కొనసాగుతున్నాయి. భూకంపం కారణంగా పనామా ఆర్థిక వ్యవస్థపై గణనీయమైన ప్రభావం పడే అవకాశం ఉందని యూఎస్‌జీఎస్‌ అంచనా వేసింది.