అమెరికన్-చైనీస్ రుచుల కలయిక
అమెరికా : అమెరికా పర్యటనకు వచ్చిన చైనా అధ్యక్షుడు షీ జిన్పింగ్ కు అమెరికా అధ్యక్షుడు డొనాల్డ్ ట్రంప్ దంపతులు ప్రత్యేక అధికారిక విందును ఇచ్చారు. శ్వేతసౌధంలోని ఈస్ట్ రూమ్లో ఈ కార్యక్రమం వైభవంగా జరిగింది. జిన్పింగ్ కోసం అమెరికన్, చైనీస్ రుచుల కలయికతో ప్రత్యేక మెనూను సిద్ధం చేశారు.
ఈ విందుకు సంబంధించిన మెనూను వైట్హౌస్ విడుదల చేసింది. విందులో ప్రధాన వంటకాలుగా నువ్వులతో తయారు చేసిన బాస్ చేప, క్రిస్పీ బాక్ చోయ్, పసుపు గుమ్మడితో చేసిన వెలౌట్, అడవి పుట్టగొడుగులతో తయారు చేసిన ఫ్రికాసీ, క్రిస్పీ పాన్సెట్టా, రోస్టెడ్ గార్డెన్ ఎగ్ప్లాండ్ వంటకాలను అందించారు. బాక్ చోయ్ అనేది చైనీస్ క్యాబేజీకి చెందిన ఒక రకం. డెజర్ట్లలోనూ ప్రత్యేకత కనిపించింది. వెనీలా క్రిమెక్స్, వైట్హౌస్ హనీ క్రీమ్, వాల్నట్ ఫ్రాంగీపేన్, చెర్రీ కాన్ఫిట్ వంటి తీపి వంటకాలను అతిథులకు వడ్డించారు. ఇలా రెండు దేశాల వంటకాల ప్రత్యేకతలను కలిపి జిన్పింగ్ కోసం ఈ మెనూను రూపొందించారు.
జిన్పింగ్కు అరుదైన కానుక ...
విందు సందర్భంగా ట్రంప్ .. జిన్పింగ్కు ప్రత్యేక బహుమతిని అందించారు. అమెరికా జాతీయ పక్షి అయిన బాల్డ్ ఈగల్ విగ్రహాన్ని కానుకగా ఇచ్చారు. సుమారు మూడు అడుగుల ఎత్తున్న ఈ విగ్రహాన్ని విందు సమయంలో అతిథుల సమక్షంలో ప్రదర్శించారు. బాల్డ్ ఈగల్ విగ్రహం స్వేచ్ఛ, స్ఫూర్తికి ప్రతీకగా నిలుస్తుందని ట్రంప్ పేర్కొన్నారు. ఈ విగ్రహం చైనాలోనూ ప్రత్యేక గుర్తింపును పొందుతుందని ఆయన ఆకాంక్షించారు.
విందు తర్వాత మరో ప్రత్యేకత ....
విందు అనంతరం ట్రంప్.. శ్వేతసౌధంలో నూతనంగా నిర్మిస్తున్న బాల్రూమ్ను జిన్పింగ్కు చూపించారు. ఈ సందర్భంగా ''ఈ గదిలోకి వచ్చిన తొలి విదేశీ నేత మీరే'' అని ట్రంప్ జిన్పింగ్తో అన్నారు. దీంతో ఈ పర్యటనలోని అధికారిక కార్యక్రమాల్లో బాల్రూమ్ సందర్శన కూడా ప్రత్యేకంగా నిలిచింది.
హాజరైన టెక్ దిగ్గజాలు ....
జిన్పింగ్ గౌరవార్థం నిర్వహించిన ఈ విందుకు అమెరికా టెక్నాలజీ రంగానికి చెందిన పలువురు ప్రముఖులు హాజరయ్యారు. టెస్లా అధినేత ఎలాన్ మస్క్, యాపిల్ సీఈఓ టిమ్ కుక్, ఎన్విడియా సీఈఓ జెన్సెన్ హువాంగ్, ఓపెన్ఏఐకి చెందిన శామ్ ఆల్ట్మన్ తదితరులు కార్యక్రమంలో పాల్గొన్నారు. మొత్తంగా జిన్పింగ్ అమెరికా పర్యటన సందర్భంగా శ్వేతసౌధంలో ఏర్పాటు చేసిన ఈ ప్రత్యేక విందు.. రెండు దేశాల వంటకాల కలయిక, అరుదైన బహుమతి, ప్రముఖ టెక్ దిగ్గజాల హాజరుతో ప్రత్యేకంగా నిలిచింది.
కామెంట్లు (0)