చాలామంది నెలసరి ఒకటి రెండు నెలలు ఆలస్యమైనా, తేదీలు మారినా ‘ఇది సహజమే’ అనుకుని నిర్లక్ష్యం చేస్తుంటారు. ఒత్తిడి, చదువు, ఉద్యోగం, ప్రయాణం, ఆహారపు అలవాట్ల మార్పు, బరువు పెరగడం లేదా తగ్గడం వంటి కారణాలతో అప్పుడప్పుడు రుతుచక్రంలో మార్పులు రావడం సహజమే. అయితే నెలసరి తరచూ క్రమం తప్పడం, రెండు మూడు నెలలకు ఒకసారి మాత్రమే రావడం, అధికంగా లేదా చాలా తక్కువగా రక్తస్రావం కావడం వంటి లక్షణాలను మాత్రం నిర్లక్ష్యం చేయకూడదని తాజా వైద్య మార్గదర్శకాలు హెచ్చరిస్తున్నాయి. ఇలాంటి లక్షణాలు ఉంటే వెంటనే పాలీసిస్టిక్ ఓవరీ సిండ్రోమ్ (పీసీఓఎస్) కోసం పరీక్షించాలని నిపుణులు సూచిస్తున్నారు.
పీసీఓఎస్ అనేది మహిళల్లో అత్యంత సాధారణంగా కనిపించే హార్మోన్ల అసమతుల్యత సమస్యల్లో ఒకటి. ప్రపంచవ్యాప్తంగా ప్రతి పది మంది మహిళల్లో ఒకరి నుంచి ముగ్గురు వరకు ఈ సమస్యతో బాధపడుతున్నారని అంచనా. భారతదేశంలో కూడా దీని ప్రభావం క్రమంగా పెరుగుతోంది. యుక్తవయసు నుంచి 40 ఏళ్లలోపు మహిళల్లో ఇది ఎక్కువగా కనిపిస్తోంది. ఈ సమస్యలో అండాశయాల్లో చిన్న చిన్న ద్రవంతో నిండిన తిత్తులు ఏర్పడతాయి. శరీరంలోని హార్మోన్ల సమతుల్యత దెబ్బతింటుంది. ఫలితంగా నెలసరి క్రమం తప్పడం, ముఖంపై వెంట్రుకలు పెరగడం, మొటిమలు, జుట్టు రాలిపోవడం, బరువు పెరగడం, గర్భం దాల్చడంలో ఇబ్బందులు వంటి లక్షణాలు కనిపించవచ్చు. అయితే ప్రతి మహిళలో ఒకే లక్షణాలు ఉండవు.
ఇటీవలి వైద్య మార్గదర్శకాలు ఒక ముఖ్యమైన విషయాన్ని స్పష్టం చేస్తున్నాయి. పీసీఓఎస్ను కేవలం సంతానోత్పత్తి సమస్యగా చూడకూడదు. ఇది శరీర జీవక్రియపై కూడా ప్రభావం చూపుతుంది. ఈ సమస్య ఉన్న మహిళల్లో మధుమేహం, అధిక రక్తపోటు, గుండెజబ్బులు, కొవ్వు కాలేయం, నిద్రలో శ్వాస ఆగే సమస్య, మానసిక ఆందోళన వంటి సమస్యలు వచ్చే ప్రమాదం ఎక్కువగా ఉంటుందని పరిశోధనలు చెబుతున్నాయి. అందుకే దీనిని ఎంత త్వరగా గుర్తిస్తే అంత మంచిదని వైద్యులు సూచిస్తున్నారు.
పీసీఓఎస్ను గుర్తించడానికి వైద్యులు రుతుచక్ర వివరాలు, శారీరక లక్షణాలు, రక్త పరీక్షలు, అవసరమైతే అల్ట్రాసౌండ్ పరీక్షలు చేస్తారు. ప్రతి నెలసరి సమస్యకు పీసీఓఎస్ ఒక్కటే కారణం కాకపోయినా, దాన్ని తొలిదశలోనే గుర్తించడం వల్ల చికిత్స సులభమవుతుంది. జీవనశైలిలో మార్పులు, సమతుల ఆహారం, క్రమం తప్పకుండా వ్యాయామం, బరువు నియంత్రణ, అవసరమైతే మందులతో ఈ సమస్యను చాలా వరకు అదుపులో ఉంచవచ్చు. నెలసరి తరచూ ఆలస్యం అవుతుంటే, మూడు నెలలకు మించి రాకపోతే లేదా ఇతర అసాధారణ లక్షణాలు కనిపిస్తే స్వయంగా మందులు వాడకుండా స్త్రీరోగ నిపుణులను సంప్రదించడం ఉత్తమం. ముందుగానే గుర్తిస్తే పీసీఓఎస్ వల్ల వచ్చే దీర్ఘకాలిక ఆరోగ్య సమస్యలను గణనీయంగా తగ్గించే అవకాశం ఉంటుందని నిపుణులు చెబుతున్నారు.
కామెంట్లు (0)