- గ్రీన్‌కార్డ్‌ దరఖాస్తులపై తాత్కాలిక నిషేధం!
వాషింగ్టన్‌: అమెరికాలో పనిచేస్తున్న భారత ఐటీ కంపెనీలకు అక్కడి ప్రభుత్వం షాక్‌ ఇచ్చింది. శాశ్వత కార్మిక ధ్రువీకరణ కార్యక్రమం (పర్మనెంట్‌ లేబర్‌ సర్టిఫికేషన్‌ ప్రోగ్రామ్‌) కింద దరఖాస్తులపై తాత్కాలిక నిషేధం విధించారు. ఈ నిర్ణయం కాగ్నిజెంట్‌, ఇన్ఫోసిస్‌, టాటా కన్సల్టెన్సీ సర్వీసెస్‌ (టీసీఎస్‌), విప్రో, హెచ్‌సీఎల్‌ వంటి సంస్థలపై ప్రభావం చూపనుంది. అమెరికా కార్మికుల ఉద్యోగాలకు ముప్పు ఏర్పడుతోందన్న ఆరోపణల నేపథ్యంలో ఈ చర్య తీసుకున్నట్లు కథనంలో పేర్కొన్నారు. అమెరికా కార్మిక శాఖ కార్యదర్శి కీత్‌ సోండర్లింగ్‌ ఈ నిర్ణయాన్ని ప్రకటించారు. ఈ కంపెనీల నుంచి కొత్త దరఖాస్తులను స్వీకరించబోమని, ఇప్పటికే దాఖలైన దరఖాస్తులపైనా చర్యలు తీసుకోబోమని ఆయన వెల్లడించినట్లు పేర్కొన్నారు. 2009 నుంచి ఈ కంపెనీలు విదేశీ ఉద్యోగుల కోసం భారీ సంఖ్యలో దరఖాస్తులు చేసుకున్నాయని సోండర్లింగ్‌ ఆరోపించారు. అమెరికా 2.30 లక్షల హెచ్‌-1బీ వీసాలను ఆమోదించిందని, లక్ష శాశ్వత కార్మిక ధ్రువీకరణ పత్రాలను కూడా జారీ చేసిందని తెలిపారు. ఈ కంపెనీలు అమెరికా కార్మికుల ఉద్యోగాలను దెబ్బతీశాయని ఆయన విమర్శించారు.
మైక్రోసాఫ్ట్‌పైనా సోండర్లింగ్‌ ఆరోపణలు చేశారు. సుమారు 6,000 మంది అమెరికా ఉద్యోగులను తొలగించి, వారి స్థానాల్లో వేలాది మంది విదేశీ ఉద్యోగులను నియమించడం ద్వారా అమెరికా ఉద్యోగ వ్యవస్థను దుర్వినియోగం చేసిందని పేర్కొన్నారు.
మరోవైపు, అమెరికా ఉద్యోగుల ప్రయోజనాలను కాపాడే చర్యల్లో భాగంగా హెచ్‌-1బీ నాన్‌-ఇమ్మిగ్రెంట్‌ వీసాలపై విధిస్తున్న 1,00,000 డాలర్ల రుసుమును మరో ఏడాది పాటు పొడిగించినట్లు కథనంలో పేర్కొన్నారు.
కామెంట్‌లు (0)