ఉదయం తీసుకునే అల్పాహారం రోజంతా శరీరానికి శక్తినిచ్చే తొలి ఆహారం. అందుకే అది కేవలం కడుపు నింపేదిగా కాకుండా, శరీరానికి అవసరమైన పోషకాలను అందించేదిగా ఉండాలి. మన తెలుగు వారి సంప్రదాయ అల్పాహారాలైన ఇడ్లీ, దోసె, ఉప్మా, పూరీ వంటివి ప్రధానంగా కార్బోహైడ్రేట్లతో కూడి ఉంటాయి. ఇవి శరీరానికి తక్షణ శక్తిని అందించినప్పటికీ త్వరగా జీర్ణమవుతాయి. దీంతో కొద్దిసేపటికే మళ్లీ ఆకలి వేయడం, మధ్యాహ్నానికి ముందే నీరసం, అలసట అనిపించడం వంటి సమస్యలు ఎదురవుతాయి. అందుకే పోషకాహార నిపుణులు ఉదయపు టిఫిన్లో చిన్న మార్పు చేయాలని సూచిస్తున్నారు. టిఫిన్ను మార్చాల్సిన అవసరం లేదు. దానికి ప్రోటీన్ను జోడిస్తే సరిపోతుంది.
ప్రోటీన్ అవసరం
ప్రోటీన్ శరీరంలో కండరాల నిర్మాణానికి, కణాల మరమ్మతుకు, ఎంజైమ్లు, హార్మోన్ల తయారీకి అత్యంత అవసరమైన పోషకం. కార్బోహైడ్రేట్లతో పోలిస్తే ఇది నెమ్మదిగా జీర్ణమవుతుంది. అందువల్ల ఎక్కువసేపు కడుపు నిండిన భావన కలిగి, తరచూ ఆకలి వేయకుండా చేస్తుంది. అలాగే రక్తంలో చక్కెర స్థాయులు ఒక్కసారిగా పెరగకుండా సహాయపడుతుంది. ముఖ్యంగా నలభై ఏళ్ల తర్వాత సహజంగానే కండరాల బలం తగ్గడం ప్రారంభమవుతుంది. ఈ మార్పును తగ్గించడానికి ప్రతిరోజూ తగిన మోతాదులో ప్రోటీన్ తీసుకోవడం అవసరమని నిపుణులు సూచిస్తున్నారు. పిల్లలు, యువత, ఉద్యోగులు, వృద్ధులు ఇలా ప్రతి వయసు వారికి కూడా ఉదయపు అల్పాహారంలో ప్రోటీన్ ఉండటం ఆరోగ్యానికి మేలు చేస్తుంది.
చిన్న మార్పు చేయండి!
సంప్రదాయ అల్పాహారాన్ని పూర్తిగా మార్చాల్సిన అవసరం లేదు. ఇడ్లీ, దోసె లేదా ఉప్మాతో పాటు ఒకటి లేదా రెండు ఉడకబెట్టిన గుడ్లు, పప్పుతో చేసిన సాంబారు, పల్లీల చట్నీ, పెరుగు, మొలకెత్తిన శనగలు, పెసలు వంటి ప్రోటీన్ ఎక్కువగా ఉండే పదార్థాలను చేర్చడం ద్వారా అల్పాహారం మరింత సమతుల్యంగా మారుతుంది. దీంతో శరీరానికి వెంటనే కావాల్సిన శక్తితో పాటు ఎక్కువసేపు నిలిచే శక్తి కూడా లభిస్తుంది. మధ్యలో చిరుతిళ్లపై ఆధారపడాల్సిన అవసరం తగ్గుతుంది. ఆరోగ్యకరమైన ఆహారపు అలవాట్లలో పెద్ద మార్పులు చేయడం కంటే, రోజూ తినే టిఫిన్లో ఇలాంటి చిన్న మార్పులు చేయడం సులభమే కాదు, దీర్ఘకాలిక ఆరోగ్యానికి కూడా ఎంతో ప్రయోజనకరంగా ఉంటుంది.
కామెంట్లు (0)