- జైపూర్లో విద్యార్థులు, తల్లిదండ్రుల ఆందోళన
జైపూర్: జైపూర్లోని సత్య సాయి పీజీ గర్ల్స్ కాలేజీలో ఆల్ ఇండియా ఆయుష్ పోస్ట్ గ్రాడ్యుయేట్ ఎంట్రన్స్ టెస్ట్ (AIAPGET) 2026 మొదటి షిఫ్ట్ పరీక్ష సాంకేతిక లోపం కారణంగా రద్దయింది. ఉదయం 10 గంటలకు ప్రారంభమైన పరీక్ష కేవలం 15 నిమిషాలకే కంప్యూటర్ సిస్టమ్లు స్తంభించడంతో అభ్యర్థులు దాదాపు గంటన్నరపాటు తీవ్ర అనిశ్చితిలో వేచి చూడాల్సి వచ్చింది. సమస్య పరిష్కారం కాకపోవడంతో పరీక్షా కేంద్రం వద్ద ఉద్రిక్త పరిస్థితులు నెలకొన్నాయి. సరైన సమాచారం అందకపోవడంతో పలువురు అభ్యర్థులు తీవ్ర ఆందోళనకు గురయ్యారని, కొందరు అస్వస్థతకు కూడా లోనయ్యారని సమాచారం. దీంతో విద్యార్థులు, వారి తల్లిదండ్రులు కేంద్రం వెలుపల గుమిగూడి నిర్వాహకుల తీరుపై నిరసన వ్యక్తం చేశారు. పరిస్థితిని సమీక్షించేందుకు జైపూర్ ఏడీఎం నరేంద్ర కుమార్ కళాశాలకు చేరుకుని విద్యార్థులు, వారి తల్లిదండ్రులు, సంరక్షకులతో మాట్లాడారు. అనంతరం కళాశాల అబ్జర్వర్ హర్షిత శర్మ మొదటి షిఫ్ట్ను రద్దు చేస్తున్నట్లు అధికారికంగా ప్రకటించారు. ప్రభావిత అభ్యర్థుల కోసం పరీక్షను తిరిగి నిర్వహిస్తామని తెలిపారు.
నిర్వాహకుల వైఫల్యంపై సమగ్ర విచారణ జరిపించాలని అభ్యర్థులు, తల్లిదండ్రులు డిమాండ్ చేశారు. ఇతర ప్రాంతాల నుంచి వచ్చిన విద్యార్థులకు ప్రయాణం, వసతి తదితరాలపై అదనపు ఆర్థిక భారం పడిందని వారు ఆవేదన వ్యక్తం చేశారు. పరిస్థితి అదుపులో ఉండేలా పోలీసులు, పరిపాలనా అధికారులు కళాశాల ప్రాంగణంలో మోహరించారు.
నెలల తరబడి సిద్ధమైన జాతీయ స్థాయి ప్రవేశ పరీక్ష చివరి నిమిషంలో సాంకేతిక సమస్య కారణంగా రద్దు కావడం తమకు తీవ్ర నిరాశ, మానసిక ఒత్తిడిని కలిగించిందని విద్యార్థులు పేర్కొన్నారు. తమ పిల్లలతో పాటు పరీక్షా కేంద్రానికి వచ్చిన తల్లిదండ్రులు కూడా ఈ నిర్వహణ లోపంపై తీవ్ర నిరాశ వ్యక్తం చేశారు. ఇతర ప్రాంతాల అభ్యర్థులపై పడిన ఆర్థిక, రవాణా భారాన్ని వారు ఎత్తి చూపారు.
కామెంట్లు (0)