- పోరాట విజయంతో 17 రోజుల నిరాహార దీక్ష విరమించిన విద్యార్థులు
- ఎఫ్‌ఐఆర్‌ల ఉపసంహరణకు అంగీకారం
ప్ర‌జాశ‌క్తి-న్యూఢిల్లీ బ్యూరో: విద్యార్థుల ఐక్య పోరాటం ఢిల్లీలోని జవహర్‌లాల్‌ నెహ్రూ విశ్వవిద్యాలయం (జెఎన్‌యు)లో విజయం సాధించింది. విద్యార్థి సంఘం నాయకులతో సహా ఐదుగురిపై విధించిన బహిష్కరణ వేటు చర్యలను విశ్వవిద్యాలయ యాజమాన్యం ఉపసంహరించుకోవడంతో 17 రోజులుగా కొనసాగుతున్న నిరవధిక నిరాహార దీక్షను నేత‌లు విర‌మించారు. విద్యార్థుల ఇతర ప్రధాన డిమాండ్లను ఆమోదించడానికి అధికారులు అంగీకరించారు. ఈ నెల 3న ప్రారంభమైన ఈ దీక్షలో జెఎన్‌యు విద్యార్థి సంఘం ఉపాధ్యక్షురాలు, ఎస్ఎఫ్ఐ నాయ‌కురాలు కె. గోపికబాబు, విద్యార్థి సంఘం అధ్యక్షురాలు అదితి మిశ్రా, ప్రధాన కార్యదర్శి సునీల్‌ యాదవ్‌ తదితరులు పాల్గొన్నారు. విద్యార్థి సంఘం ప్రతినిధులు అదితి మిశ్రా, కె. గోపిక బాబు, సునీల్‌ యాదవ్‌, డానిష్‌ అలీ, నితీశ్‌ కుమార్‌లపై విధించిన బహిష్కరణను తక్షణమే రద్దు చేస్తూ విశ్వవిద్యాలయం ఉత్తర్వులు జారీ చేసింది. విద్యార్థులపై నమోదైన ఎఫ్‌ఐఆర్‌లను ఉపసంహరించుకోవడానికి, నిరసనల సందర్భంగా ప్రారంభించిన క్రమశిక్షణ విచారణలను నిలిపివేయడానికి కూడా అంగీకారం కుదిరింది.
13 డిమాండ్లతో పోరాటం
విద్యార్థుల ప్రజాస్వామిక హక్కులను పరిరక్షించాలని, చీఫ్‌ ప్రాక్టర్‌ కార్యాలయ నిబంధనల్లోని వివాదాస్పద అంశాలను తొలగించాలని, లైంగిక వేధింపుల ఫిర్యాదుల పరిష్కారానికి గతంలో ఉన్న జెండర్‌ సెన్సిటైజేషన్‌ కమిటీ ఎగైనెస్ట్‌ సెక్సువల్‌ హరాస్‌మెంట్ (జిఎస్‌క్యాష్‌)ను పునరుద్ధరించాలని విద్యార్థులు డిమాండ్‌ చేశారు. జెఎన్‌యు ప్రవేశ పరీక్షను తిరిగి ప్రవేశపెట్టడం, హాస్టళ్లలో మౌలిక సదుపాయాలను మెరుగుపరచడం సహా 13 డిమాండ్లతో నిరాహార దీక్ష చేపట్టారు. చీఫ్‌ ప్రాక్టర్‌ కార్యాలయ నిబంధనలపై విద్యార్థి సంఘం ప్రతినిధితో కూడిన కమిటీ సమీక్ష జరిపి, వివాదాస్పద నిబంధనల తొలగింపునకు సిఫారసులు చేయనుంది. జెఎన్‌యు ప్రవేశ పరీక్ష పునరుద్ధరణ అంశాన్ని పరిశీలించేందుకు కమిటీ ఏర్పాటు చేయాలని నిర్ణయించారు. హాస్టళ్లలో వసతుల మెరుగుదల, గ్రంథాలయాల పనివేళల పొడిగింపు, ఇతర విద్యార్థి సమస్యల పరిష్కారానికి యాజమాన్యం అంగీకారం తెలిపింది.
విద్యార్థుల ఐక్యతతో సాధించిన ఈ విజయం హామీల అమలుతోనే సంపూర్ణమవుతుందని విద్యార్థి సంఘం స్పష్టం చేసింది. తమ డిమాండ్ల అమలును పర్యవేక్షిస్తామని, ఒప్పందాలు కేవలం కాగితాలకే పరిమితం కాకుండా చూసుకుంటామని తెలిపింది.
ఆరోగ్యం క్షీణించినా వెనక్కి తగ్గని విద్యార్థులు
17 రోజులుగా దీక్ష చేస్తుండటంతో విద్యార్థుల ఆరోగ్యం తీవ్రంగా క్షీణించింది. అయినప్పటికీ విశ్వవిద్యాలయ ఉపకులపతి శాంతిశ్రీ ధూళిపూడి పండిట్‌ నిరంకుశ వైఖరిపై విద్యార్థులు నిరసన కొనసాగించారు. విద్యార్థుల ఆరోగ్య పరిస్థితి విషమిస్తున్నా సమస్యలను పరిష్కరించడంలో యాజమాన్యం జాప్యం చేయడంపై దేశంలోని పలు ప్రాంతాల విద్యార్థి సంఘాలు, ప్రజాస్వామికవాదులు ఆగ్రహం వ్యక్తం చేశారు. సిపిఎం ప్రధాన కార్యదర్శి ఎంఎ బేబీ, రాజ్యసభ సభ్యుడు వి.శివ‌దాస‌న్ జెఎన్‌యు విద్యార్థుల పోరాటానికి సంఘీభావం తెలిపారు. రాజ్యసభ సభ్యుడు జాన్‌ బ్రిట్టాస్‌ విద్యార్థుల ఆరోగ్యంపై ఆందోళన వ్యక్తం చేస్తూ రాష్ట్రపతి ద్రౌపది ముర్ము, కేంద్ర విద్యాశాఖ మంత్రి జోక్యం చేసుకోవాలని కోరారు.
ఎయిమ్స్కు గోపికబాబు సహా ముగ్గురి త‌ర‌లింపు
ఆరోగ్య పరిస్థితి విష‌మించిన ఎస్ఎఫ్ఐ నేత, జెఎన్‌యుఎస్‌యు ఉపాధ్యక్షురాలు గోపిక బాబు, ఎస్ఎఫ్ఐ జెఎన్‌యు నేత అభిన‌య్‌, ఎఐఎస్ఎ నేత గులాంల‌ను ఎయిమ్స్కు త‌ర‌లించి, వైద్యసేవలందించారు. వారిని ఎస్ఎఫ్ఐ అఖిల భార‌త అధ్య‌క్షుడు ఆద‌ర్శ్ ఎం. సాజి, ఎస్ఎఫ్ఐ ఢిల్లీ రాష్ట్ర కార్యదర్శి సూర‌జ్ ఎలామ‌న్‌ ప‌రామ‌ర్శించారు.
కామెంట్‌లు (0)