వాస్తవాలను పరిగణనలోకి తీసుకుంటామని సిజెఐ హామీ : జాన్‌ బ్రిట్టాస్‌

న్యూఢిల్లీ : వాస్తవాలను పరిగణనలోకి తీసుకుంటామని సుప్రీంకోర్టు ప్రధాన న్యాయమూర్తి సిజెఐ సూర్యకాంత్‌ హామీ ఇచ్చారని సిపిఐ(ఎం) ఎంపి జాన్ బ్రిట్టాస్‌ తెలిపారు. అక్టోబర్‌ 11న ఢిల్లీలో మీడియాతో శాంతియుతంగా మాట్లాడుతున్న సమయంలో తనపై పోలీసులు దాడి చేశారన్న అంశాన్ని సిజెఐ దృష్టికి తీసుకెళ్లినట్లు ఎంపి జాన్‌ బ్రిట్టాస్‌ గురువారం ఎక్స్‌ పోస్ట్‌లో వెల్లడించారు. ఈ విషయంపై స్పందించిన సిజెఐ కేసును పరిశీలించే సమయంలో సంబంధిత వాస్తవాలను కూడా పరిగణనలోకి తీసుకుంటామని స్పష్టం చేసినట్లు ఆయన తెలిపారు. ఢిల్లీ వీధుల్లో జరిగిన ఘటనపై న్యాయం కోరుతూ సుప్రీంకోర్టులోని కోర్టు నంబర్‌ 1లో సిజెఐని స్వయంగా కలిసే అవకాశం లభించిందని జాన్‌ బ్రిట్టాస్‌ పేర్కొన్నారు. ఈ విషయంలో న్యాయవాది ద్వారా కాకుండా, తానే స్వయంగా హాజరై తన వాదనను వినిపించాలని నిర్ణయించుకున్నట్లు తెలిపారు. వాస్తవాలను ఎలా పరిగణనలోకి తీసుకోకుండా ఉంటామని సిజెఐ పేర్కొన్నారని అన్నారు. తాము ఈ విషయాన్ని పరిశీలించేటపుడు, మీరు సూచించిన వాస్తవాలను తప్పకుండా పరిగణనలోకి తీసుకుంటామని సిజెఐ వెల్లడించారని జాన్ బ్రిట్టాస్‌ పేర్కొన్నారు. ఈ అంశాన్ని న్యాయస్థానం సమగ్రంగా పరిశీలిస్తున్న నేపథ్యంలో తనకు న్యాయం జరుగుతుందనే ఆశాభావాన్ని వ్యక్తం చేశారు. అయితే, ఈ ఘటన తనకు జరిగిన అన్యాయానికి మాత్రమే సంబంధించినది కాదని, ప్రజాస్వామ్యంలో భిన్నాభిప్రాయాలను వ్యక్తం చేసే ప్రతి పౌరుడి భద్రతకు సంబంధించిన కీలకమైన అంశమని జాన్‌ బ్రిట్టాస్‌ పేర్కొన్నారు. శాంతియుతంగా తమ అభిప్రాయాలను వెల్లడించే పౌరులపై పోలీసులు దాడులకు పాల్పడితే, అందుకు బాధ్యులైన వారు జవాబుదారీగా ఉండాలని ఆయన అన్నారు. చట్టాన్ని అమలు చేయాల్సిన వ్యవస్థలే పౌరుల హక్కులను ఉల్లంఘిస్తే, బాధితులకు న్యాయం జరిగేలా చూడాల్సిన బాధ్యత న్యాయవ్యవస్థపై ఉంటుందని పేర్కొన్నారు. రాజ్యాంగం పౌరులకు కల్పించిన హక్కులపై ప్రజల్లో విశ్వాసం నిలవాలంటే, ఇలాంటి ఘటనలను నిష్పాక్షికంగా పరిశీలించి బాధ్యతను నిర్ధారించడం అవసరమని జాన్‌ బ్రిట్టాస్‌ అభిప్రాయపడ్డారు. భిన్నాభిప్రాయాలను వ్యక్తం చేసే హక్కు, శాంతియుతంగా నిరసన తెలిపే స్వేచ్ఛ, పౌరుల భద్రత, పోలీసుల జవాబుదారీతనం వంటి అంశాలు ప్రజాస్వామ్య వ్యవస్థకు పునాదులని జాన్ బ్రిట్టాస్‌ పేర్కొన్నారు. ఈ అంశంపై సుప్రీంకోర్టు పరిశీలనతో రాజ్యాంగ హామీల విశ్వసనీయత మరింత బలపడుతుందని ఆశిస్తున్నట్లు తెలిపారు.