ఆందోళనకరంగా ప్రపంచ పరిస్థితులు : మంత్రి జై శంకర్‌

న్యూఢిల్లీ : ప్రపంచ పరిస్థితులు ఆందోళనకరంగా మారుతున్నాయని విదేశాంగ మంత్రి ఎస్‌.జైశంకర్‌ అన్నారు. ఆర్థిక వ్యవస్థ, మార్కెట్‌ ప్రవేశం, సరఫరా గొలుసులు, సాంకేతికత వంటివి ఆయుధాలుగా మారుతున్నాయని హెచ్చరించారు. శాంతి, భద్రత, స్థిరత్వం కోసం దేశాలు బాధ్యతాయుతంగా వ్యవహరించాలని సూచించారు. ఐక్యరాజ్యసమితి 81వ సర్వసభ్య సమావేశంలో జై శంకర్ మాట్లాడుతూ .... అభివృద్ధి చెందుతున్న దేశాలు ఆహారం, ఇంధనం, ఎరువులు, ఆర్థిక వనరుల కొరత వంటి నాలుగు సంక్షోభాలను ఎదుర్కొంటున్నాయని తెలిపారు. ఎల్‌నినో ప్రభావం, ఎరువుల కొరత, ధాన్యం రవాణాలో అవరోధాలు పరిస్థితిని మరింత క్లిష్టం చేస్తున్నాయని చెప్పారు. ఉగ్రవాదాన్ని ప్రోత్సహించే వారు వాస్తవాలను వక్రీకరించి దానిని సాధారణీకరించేందుకు ప్రయత్నిస్తున్నారని జైశంకర్‌ విమర్శించారు. స్నేహం, సౌహార్దం, ఉగ్రవాదం ఏకకాలంలో కొనసాగలేవని స్పష్టం చేశారు. సరిహద్దులు దాటి జరిగే ప్రభుత్వ ప్రోత్సాహిత ఉగ్రవాదానికి పాల్పడే ప్రభుత్వాలను బాధ్యులను చేయాలని అన్నారు.