భారత నౌకాదళంలో చేరిన ‘ఐఎన్ఎస్ మంగ్రోల్’

న్యూఢిల్లీ : భారత నౌకాదళం తన సముద్ర రక్షణ సామర్థ్యాలను మరింత బలోపేతం చేసుకునే దిశగా మరో ముందడుగు వేసింది. జలాంతర్గామి నిరోధక నిస్సార జల నౌకల (ఏఎస్‌డబ్ల్యు-ఎస్‌డబ్ల్యుసి) శ్రేణిలో మూడవ నౌక అయిన ఐఎన్ఎస్ మంగ్రోల్‌ను సోమవారం ముంబయి తీరంలో సముద్ర జలాల్లోకి ప్రవేశపెట్టింది. వెస్ట్రన్ నేవల్ కమాండ్ ఫ్లాగ్ ఆఫీసర్ కమాండింగ్-ఇన్-చీఫ్ వైస్ అడ్మిరల్ సంజయ్ వత్సాయన్ సమక్షంలో ఈ కార్యక్రమం జరిగింది. కొచ్చిన్ షిప్‌యార్డ్ లిమిటెడ్ (సీఎస్ఎల్) స్వదేశీ పరిజ్ఞానంతో నిర్మించిన ఎనిమిది జలాంతర్గామి నిరోధక నిస్సార జల నౌకల్లో ఐఎన్ఎస్ మంగ్రోల్ మూడవది. 2026 ఆగస్టు 22న ఈ నౌకను భారత నౌకాదళానికి అప్పగించారు. అప్పగింత పత్రాలపై సీఎస్ఎల్ డైరెక్టర్ (ఆపరేషన్స్) హరికృష్ణన్ ఎస్., ఐఎన్ఎస్ మంగ్రోల్ నియమిత కమాండింగ్ ఆఫీసర్ కమాండర్ యు. శరణ్ కుమార్ సంతకాలు చేశారు. 80 శాతానికి పైగా స్వదేశీ భాగాలతో రూపొందిన ఈ నౌక భారతదేశ రక్షణ రంగంలో స్వావలంబన దిశగా సాధిస్తున్న పురోగతికి నిదర్శనంగా నిలుస్తుందని నేవీ అధికారులు తెలిపారు. స్వదేశీ యుద్ధనౌకల నిర్మాణం, ఆయుధ వ్యవస్థలు, సెన్సార్ల అనుసంధానంలో దేశం సాధిస్తున్న సాంకేతిక సామర్థ్యాలను ఇది ప్రతిబింబిస్తోందని అన్నారు.