చైల్డ్ ట్రాఫికింగ్ నుంచి 19మంది పిల్లల్ని రక్ష‍ించిన పోలీసులు

గౌహతి : పిల్లల అక్రమ రవాణా నెట్‌వర్క్‌పై జరిపిన దాడుల్లో అరుణాచల్ ప్రదేశ్‌లోని వివిధ ప్రాంతాల నుంచి 19 మంది పిల్లలను రక్షించి, ముగ్గురు అనుమానిత బ్రోకర్లను అరెస్టు చేసినట్లు పోలీసులు తెలిపారు. జిల్లా బాలల సంక్షేమ కమిటీ దాఖలు చేసిన ఫిర్యాదు మేరకు ఆగస్టు 17వ తేదీన నమ్సాయి పోలీస్ స్టేషన్‌లో కేసు నమోదైంది. రక్షించబడిన పిల్లలు మెచుకా, ఆలో, పాసిఘాట్, నహర్‌లగన్, ఇటానగర్, లాంగ్‌డింగ్‌లలో ఉన్నట్లు గుర్తించారు. మెరుగైన విద్య, సంరక్షణ కల్పిస్తామని మధ్యవర్తులు హామీలు ఇచ్చి ఆర్థికంగా వెనుకబడిన కుటుంబాలను నమ్మించినట్లు ప్రాథమిక విచారణలో తేలిందని పోలీసులు తెలిపారు. ఆ తర్వాత పిల్లలను వారి కుటుంబాల నుండి వేరు చేసి సుదూర ప్రాంతాల్లోని వ్యక్తుల వద్ద ఉంచినట్లు ఆరోపణలు ఉన్నాయి. రక్షించబడిన పిల్లలలో ఎక్కువ మంది ఎనిమిదేళ్లలోపు వారేనని, వారిలో అతి చిన్న వయస్సు సుమారు మూడేళ్లు ఉంటుందని నమ్సాయి సూపరింటెండెంట్ ఆఫ్ పోలీస్ సాంగే థిన్లే తెలిపారు. ఒక్కో బిడ్డకు రూ. 10,000 నుంచి రూ. 50,000 వరకు చెల్లించినట్లు అనుమానిస్తున్నారు.