‘పరిశ్రమ’ పిటిషన్‌పై విచారణకు సుప్రీం అంగీకారం

న్యూఢిల్లీ : పారిశ్రామిక సంబంధాల కోడ్‌–2020లో ‘పరిశ్రమ’ నిర్వచనం అస్పష్టంగా ఉందంటూ తమిళనాడు ఆల్‌ ఇండియా ట్రేడ్‌ యూనియన్‌ కాంగ్రెస్‌ (ఎఐటియుసి) దాఖలు చేసిన పిటిషన్‌పై విచారణకు సుప్రీంకోర్టు బుధవారం అంగీకరించింది. ఈ చట్టం పరిధి నుంచి ధార్మిక, సామాజిక, పరోపకార సంస్థలతోపాటు ప్రభుత్వ సార్వభౌమ విధులకు సంబంధించిన కార్యకలాపాలకు మినహాయింపులు ఇవ్వడాన్ని కార్మిక సంఘం సవాలు చేసింది. ఐఆర్‌సీలోని సెక్షన్‌ 2(పి) ప్రకారం, మానవ అవసరాలను తీర్చేందుకు వస్తువులు లేదా సేవలను ఉత్పత్తి చేయడం, సరఫరా చేయడం, పంపిణీ చేయడం వంటి క్రమబద్ధమైన కార్యకలాపాలను ‘పరిశ్రమ’గా పరిగణిస్తారు. ఈ నిర్వచనం గతంలో సుప్రీంకోర్టు నిర్దేశించిన ప్రమాణాలకు అనుగుణంగా లేదని ఎఐటియుసి తరఫు న్యాయవాదులు వాదించారు. 1978లో బెంగళూరు వాటర్‌ సప్లై కేసులో సుప్రీంకోర్టు ఇచ్చిన తీర్పు ప్రకారం, ఆసుపత్రులు, విద్యాసంస్థలు, పురపాలక సంస్థలు వంటి వాటిని కూడా పరిశ్రమలుగా పరిగణించవచ్చు. అయితే, కొత్త చట్టంలోని నిర్వచనానికి పాత తీర్పు నేరుగా వర్తించదని 2026 ఆగస్టులో తొమ్మిది మంది న్యాయమూర్తుల ధర్మాసనం అభిప్రాయపడింది. కార్మికుల హక్కులను కాపాడేందుకు పరిశ్రమకు విస్తృత నిర్వచనం అవసరమని జస్టిస్‌ బి.వి. నాగరత్న అభిప్రాయపడ్డారు. ఎఐటియుసి పిటిషన్‌ను పరిశీలించిన ప్రధాన న్యాయమూర్తి జస్టిస్‌ సూర్యకాంత్‌, కేసును త్వరగా విచారణకు షెడ్యూల్‌ చేస్తామని తెలిపారు. ఈ కేసులో సుప్రీంకోర్టు నిర్ణయం కార్మికులకు లభించే చట్టపరమైన రక్షణలపై ప్రభావం చూపే అవకాశం ఉంది.