తరుణ్‌ తేజ్‌‌పాల్‌ అభ్యర్ధనపై గోవా సర్కార్‌‌కు సుప్రీం నోటీసులు

న్యూఢిల్లీ : 13ఏళ్ళ నాటి అత్యాచారం కేసులో తనకు పదేళ్ళ జైలు శిక్ష విధిస్తూ బాంబే హైకోర్టు ఇచ్చిన తీర్పుకు వ్యతిరేకంగా తెహెల్కా మాజీ సంపాదకులు తరుణ్‌ ‌తేజ్‌‌పాల్‌ ‌చేసిన అభ్యర్ధనపై సుప్రీం కోర్టు శుక్రవారం గోవా ప్రభుత్వానికి నోటీసులు జారీ చేసింది. తరుణ్‌ ‌తేజ్‌‌పాల్‌ ‌చేసిన విజ్ఞప్తిపై జస్టిస్‌ ఎం.ఎం.సుందరేశ్‌ ‌నేతృత్వంలోని బెంచ్‌ ‌స్వల్ప విచారణ జరిపింది. తేజ్‌‌పాల్‌ ‌తరపున సీనియర్‌ ‌న్యాయవాది కపిల్‌ ‌సిబల్‌ ‌మాట్లాడుతూ, తన క్లయింట్‌ ఇప్పటికే లొంగిపోయినందున జైలు శిక్షను రద్దు చేయడానికి సంబంధించిన కేసు ఇదని అన్నారు. మూడు వారాల్లోగా లొంగిపోవాలని తేజ్‌‌పాల్‌‌ను ఆదేశిస్తూ సుప్రీం కోర్టు ఆగస్టు 25న ఉత్తర్వులు జారీ చేసింది. ఆయన లొంగుబాటు సర్టిఫికెట్‌‌ను సుప్రీంలో దాఖలు చేసిన తర్వాత ఆయన అప్పీల్‌‌ను విచారించడం జరుగుతుందని కూడా సింగిల్‌ ‌జడ్జి బెంచ్‌ ‌వ్యాఖ్యానించింది. తేజ్‌‌పాల్‌ ‌శిక్షను యావజ్జీవంగా పెంచాలని కోరుతూ గోవా ప్రభుత్వం విడిగా దాఖలు చేసిన పిటిషన్‌‌ నేపథ్యంలో తేజ్‌‌పాల్‌ ‌అప్పీల్‌ ‌వెలువడింది. ఆయనకు విధించిన శిక్ష సరిపోదని ప్రభుత్వం భావిస్తోందని పేర్కొంది. అయితే దాన్ని సవాలు చేయాలనుకోవడం లేదని కూడా స్పష్టం చేసింది.