పిల్లలు గది శుభ్రపరుచుకుంటూ, వంటలు చేసుకుంటే- తల్లిదండ్రులు విశ్రాంతి తీసుకుంటున్నారా ? అవును, మీరు వింది నిజమే. చైనాలోని యువ తల్లిదండ్రులు పిల్లల పెంపకంలో ఒక విప్లవాత్మకమైన మార్గాన్ని ప్రవేశపెడుతున్నారు .‘‘రివర్స్ పేరెంటింగ్’’. సాంప్రదాయకంగా పిల్లల్ని కాపాడుకోవాల్సిన, వారి ప్రతి అడుగూ నియంత్రించాల్సిన తల్లిదండ్రులు ఇక్కడ ఒక అడుగు వెనక్కి వేసి, పిల్లలు తమ స్వంత నిర్ణయాలు తాము తీసుకోడానికి, బాధ్యతలు నేర్చుకోడానికి అనుమతిస్తున్నారు. ఈ నూతన పోకడ ప్రస్తుతం అక్కడి యువతరం తల్లిదండ్రుల్లో మంచి ప్రాచుర్యాన్ని పొందుతోంది. ముందుగా ఈ కొత్త ట్రెండ్ వెనుక సంగతులు తెలుసుకుందాం.
నవంబర్ 2022లో, చైనాలోని హీలోంగ్జియాంగ్ ప్రావిన్స్ లో ఓ అమ్మ తన కూతురి మూర్ఖపు పట్టుదలను ఎదుర్కొంది. మూడేళ్ల బుజ్జి చలిలో చిన్న ప్రిన్సెస్ డ్రెస్ వేసుకుని బయటకి వెళ్లాలని పట్టుబట్టింది. బలవంతంగా కోటు తొడిగించాలా లేదా శాంతంగా వివరించాలా?, చాలామంది ఏం చేస్తారు? బలవంతంగా బట్టలు తొడిగించడమో, చివరికి అరిచి భయపెట్టడమో జరుగుతుంది. కానీ ఈ తల్లి వేరే మార్గం తీసుకుంది. ఆమె కూతుర్ని విడిచిపెట్టలేదు.. కానీ ఆమెతోపాటే వచ్చింది - వెనుకే అనుసరిస్తూ చలిలో చిన్న దుస్తులతో విహరించడానికి అనుమతించింది! ఈ ఘటన సోషల్ మీడియాలో వైరల్ అయింది. ప్రేక్షకులు ఈ తల్లి బుద్ధిని మెచ్చుకుంటూ "వందసార్లు బోధించడం కంటే ఒకసారి అనుభవించడం చాలా ప్రభావవంతం" అని వ్యాఖ్యానించారు. ఇలా "రివర్స్ పేరెంటింగ్" ఉద్యమం మొదలయింది.
అంటే ఏమిటి?
సాధారణంగా తల్లిదండ్రులు ఏం చేస్తారు? కష్టపడి సంపాదించి, పిల్లలకు అన్నీ తాము ఏర్పాటుచేస్తారు. అలవాట్లలో తప్పొప్పులు చెప్పి వారికి ఏది మంచో తెలియజేస్తారు. కానీ రివర్స్ పేరెంటింగ్ లో ఈ పాత్రలు తారుమారవుతాయి.
"రివర్స్ పేరెంటింగ్ అనేది తల్లిదండ్రులు తమ స్వంత బాధ్యతను వదులుకోవడం కాదు.. అది దాన్ని ఒక కొత్త రూపంలో ఉపయోగించడం. దీని ఉద్దేశ్యం పిల్లలలో బాధ్యతాయుతమైన సంభాషణను నిర్మించడమే" అని టైమ్స్ ఆఫ్ ఇండియా నివేదించింది.
ఈ ప్రక్రియలో మూడు ప్రధాన పద్ధతులు..
రోల్ రివర్సల్ (పాత్ర మార్పు) : ఇందులో తల్లిదండ్రులు తమ దుర్బలతను ప్రదర్శిస్తారు. ఉదాహరణకు "నేను అలసిపోయాను.. నీవు నాకు సహాయం చేయగలవా?" అని పిల్లల్ని అడగడం. ఇలా చేయడం వలన పిల్లల్లో సహాయం చేసే భావం, జాలి, సానుభూతి మెరుగవుతుంది.
కాన్సీక్వెన్స్ ఎక్స్పీరియన్స్ (ఫలితానుభవం) : మనం ఎంత చెప్పినా పిల్లలు వినరు కదా. "వేడినీళ్లు కాలుతాయి" అని వేలసార్లు చెప్పడం కంటే, వేలు కొద్దిగా దగ్గర చేసి, ఒక్కసారి చూడనివ్వడం ఎంత సులభం. ఇదే ఫలితానుభవ పద్ధతి. ఒక సురక్షిత వాతావరణంలో, వారి నిర్ణయాల ఫలితాన్ని పిల్లలు తాము అనుభవించేలా అనుమతించాలి.
మిర్రర్డ్ రెస్పాన్స్ (అద్దం ప్రతిబింబం): పిల్లవాడు ఏడుస్తున్నాడు, అరుస్తున్నాడు, నేలమీద పడుతున్నాడు? తల్లిదండ్రులు కూడా అదే చేస్తారు. వారి చర్యలను అద్దం ద్వారా వారికి చూపిస్తారు. ఇలా చేస్తే పిల్లవాడు చాలా అబ్బురపడిపోతాడు. "నేను ఇలా చేస్తే నాన్న ఇంకా ఎక్కువగా చేస్తున్నారు" అనే థాట్ ఏర్పడుతుంది. అతని మొండి పట్టుదల తగ్గిపోతుంది.
ఎక్కడైనా ప్రయోగం చేయొచ్చా ? అస్సలు కుదరదు !
ఈ పద్ధతి ప్రభావం ఎంతగా ఉంది అంటే, ఈ ట్రెండ్ సంబంధిత వీడియోలను చూస్తూ చైనాలో ఇప్పటికే 23 కోట్ల వ్యూస్ కలెక్ట్ అయ్యాయి. అంటే ప్రతి ఇంటిలో ఏదో కొత్తది ప్రయత్నిస్తున్నారు. కానీ ఎప్పటిలాగే, దీనికి సానుకూలత ఉంది.. కొన్ని ప్రతికూల విమర్శలు కూడా ఉన్నాయి.
సానుకూల కోణం :
స్వతంత్రత : పిల్లలు స్వంత బాధ్యతలు నేర్చుకుంటారు. వారి జీవితంలో ఎదురయ్యే సమస్యలను తాము పరిష్కరించుకోవడం నేర్చుకుంటారు. బయటి సహాయం లేకుండానే జీవించగలరు.
సహానుభూతి : తల్లిదండ్రుల ఇబ్బందులు అర్థంచేసుకుంటారు. తల్లి ఎంత శ్రమించి వంట చేస్తుందో, అన్ని పనులు ఎంత కష్టమో తెలిసివస్తుంది.
సమానత్వం : తల్లిదండ్రులకు పిల్లలు భయపడని, ఓపెన్ కమ్యూనికేషన్ ఉండే సంబంధం. చిన్న చిన్న విషయాలు కూడా చెప్పుకోగలిగే స్థితి.
ఆత్మవిశ్వాసం: చిన్న వయసులోనే ఇలా చిన్న చిన్న సవాళ్లను ఎదుర్కొన్న పిల్లల్లో ఆత్మవిశ్వాసం పెరుగుతుంది. తాము కూడా ఏదైనా చేయగలం అనే నమ్మకం వస్తుంది.
బుద్ధిశక్తి పెంపు: ఒక సమస్య వచ్చినప్పుడు దాన్ని స్వతంత్రంగా ఎలా పరిష్కరించుకోవాలనే సృజనాత్మకత వస్తుంది.
ప్రతికూల కోణం
తగినంత పరిపక్వత లేదు: చిన్న వయసు పిల్లలకు భావోద్వేగాల్ని నియంత్రించే శక్తి తక్కువ. వారు కొన్ని సంఘటనలను వేరే విధంగా అర్థం చేసుకోవచ్చు.
మానసిక కుంగుదాటు: కొన్నిసార్లు సహాయం పొందలేని పరిస్థితుల్లో పిల్లవాడు మానసికంగా చాలా నొప్పిని అనుభవించవచ్చు.
బాధ్యతలు ఎక్కువ: పిల్లలు చాలా చిన్న వయసులోనే ఎక్కువ బాధ్యతలు మోయవలసి వస్తే వారు సరదా, విద్య, అభిరుచులు వంటి వాటికి దూరమవుతారు.
ప్రేమను గుర్తించలేరు: తల్లిదండ్రులు చూపించే ఈ ప్రవర్తనను నిజమైన బంధంగా గుర్తించలేని ప్రమాదం ఉంది.
తిరస్కారం: చాలామంది సంప్రదాయవాద తల్లిదండ్రులు ఈ పద్ధతిని పూర్తిగా తిరస్కరిస్తారు.
ప్రతిదానిలో మంచీ చెడూ ఉంటాయి. ఇది నేరుగా ప్రయత్నించడానికి 100% సేఫ్ అని చెప్పలేం. కానీ ఇది పూర్తిగా నిరుపయోగమూ కాదు. ఈ విధానం మనకు ఒక కొత్త ప్రశ్నను వేస్తుంది.. మనం పిల్లల్ని పెంచే విధానంలో ఎంత స్వేచ్ఛ ఇవ్వాలి ?
సంప్రదాయకంగా "తల్లిదండ్రులకు భయపడే" పిల్లలు ఇంకా ఉన్నారు. కానీ మరోవైపు తల్లిదండ్రులతో "స్నేహం" చేసే పిల్లలు కూడా చాలామంది ఉన్నారు. మనం ఆరోగ్యకరమైన బ్యాలెన్స్ ను కనుగొనాలి. బాధ్యతలు నేర్పించాలి. కానీ వారి చిన్నతనాన్ని దొంగిలించకూడదు. అదీ ఈ నూతన రివర్స్ పేరెంటింగ్ ట్రెండ్ యొక్క సారాంశం.
నేటి తల్లిదండ్రులు గతంలో తాము అనుభవించిన కఠినమైన క్రమశిక్షణకు ప్రతిస్పందనగా ఈ కొత్త మార్గాన్ని ఎంచుకుంటున్నారు. వారు తమ పిల్లలతో సమాన స్థాయిలో మాట్లాడాలని, నిజమైన సంబంధాన్ని పెంపొందించుకోవాలని కోరుకుంటున్నారు.
కొన్నిసార్లు తల్లిదండ్రులు కొంచెం 'బలహీనంగా' కనిపించినా, అది పిల్లలు మరింత బాధ్యత వహించడానికి, మెరుగైన భవిష్యత్తును నిర్మించుకోవడానికి సహాయపడుతుంది. మీ ప్రియమైన పిల్లలను స్వతంత్రంగా, బలంగా పెంచే పద్ధతిని మీరూ ఎంచుకోండి.
కామెంట్లు (0)