గాఢాంధకారంలో ఒక ఆకారం కదలడం, అకస్మాత్తుగా మెల్లగా వచ్చే సంగీతం, ఒక్కసారిగా పెద్ద శబ్దం, గాలిలో తేలియాడే తెల్లని దుస్తులు, మెల్లగా తిరిగే తల.. ఇవి హర్రర్ సినిమాల ముఖ్య లక్షణాలు. పెద్దలకు ఇవి ఉత్తేజాన్నిస్తూ వినోదంగా ఉండొచ్చు. కానీ పిల్లల మనస్సుపై వీటి ప్రభావం చాలా భిన్నంగా ఉంటుంది. ఒక సన్నివేశం వారి నిద్రను హరించవచ్చు.. ఒక భయంకరమైన ముఖం వారి ఆటపాటలను ఆపేయవచ్చు. ఒక దెయ్యం రూపం వారి ఊహల్లో స్థిరపడిపోవచ్చు. అందుకే హర్రర్, దెయ్యం సినిమాల విషయంలో తల్లిదండ్రులు తీసుకునే నిర్ణయాలు, వారి పర్యవేక్షణ విధానం చాలా కీలకం.
ముందుగా తల్లిదండ్రులు గుర్తించాల్సిన విషయం ఏమిటంటే, ప్రతి పిల్లవాడి మానసిక స్థితి ఒకటి కాదు. కొందరు పిల్లలు ఊహాజనిత భయాలను సులభంగా అధిగమిస్తారు. మరికొందరు చిన్న భయాన్ని కూడా చాలాకాలం మనస్సులో పెట్టుకుంటారు. ఐదేళ్ల పిల్లవాడికి, పదేళ్ల పిల్లవాడికి మధ్య ఉన్న తేడా ఇక్కడ ముఖ్యం. అలాగే పిల్లల వయస్సు, వారి స్వభావం, గతంలో ఏదైనా భయానక అనుభవం ఉందా అనే విషయాలను బట్టి నిర్ణయం తీసుకోవాలి. కొందరు పిల్లలు చీకటి అంటే భయపడతారు.. మరికొందరు ఒంటరిగా ఉండటానికి భయపడతారు. ఇలాంటి పిల్లలకు దెయ్యం సినిమాలు చూపించడం వారి భయాన్ని మరింత పెంచవచ్చు.
జాగ్రత్త అవసరం..
హర్రర్ సినిమాలు అనేక రకాలు. కొన్ని కేవలం ఉత్తేజం కలిగించే థ్రిల్లర్లు. మరికొన్ని రక్తం, హింసతో కూడిన స్లాషర్ సినిమాలు. ఇంకొన్ని దెయ్యం, ఆత్మ, భూతం వంటి అతీంద్రియ అంశాలతో అభూతికల్పనతో కూడిన సినిమాలు. దెయ్యం సినిమాలు పిల్లలపై ప్రత్యేకంగా ప్రభావం చూపుతాయి. ఎందుకంటే అవి నిజ జీవితంలో జరగవు అని పెద్దలకు తెలుసు.. కానీ పిల్లలు వాటిని నిజమని నమ్మే అవకాశం ఎక్కువ. రాత్రి నిద్రలో వారు ఆ దృశ్యాలను కలలుగా చూడవచ్చు. ఇంట్లో ఏదో కదులుతుందని, ఎవరో నిఘా పెడుతున్నారని అనుకోవచ్చు. అందుకే దెయ్యం సినిమాల విషయంలో మరింత జాగ్రత్త అవసరం.
ప్రత్యామ్నాయం చూడాలి..
హర్రర్ సినిమా చూడాలని పిల్లలు పట్టుబట్టినప్పుడు వెంటనే "వద్దు" అని చెప్పడం పరిష్కారం కాదు. బదులుగా వారితో మాట్లాడాలి. ఆ సినిమా ఎందుకు చూడాలనుకుంటున్నారో అడగాలి. స్నేహితులు చెప్పారా, టీవీలో ప్రచారం చూశారా, లేక కుటుంబంలో ఎవరో చూస్తున్నారా అనేది తెలుసుకోవాలి. ఈ సంభాషణ ద్వారా పిల్లల భావోద్వేగాలను అర్థం చేసుకోవచ్చు. కొన్నిసార్లు వారు చూడాలనుకునేది సినిమా కోసం కాదు, స్నేహితుల్లో భాగం కావడం కోసం. అలాంటప్పుడు వారికి ప్రత్యామ్నాయ మార్గాలు చూపవచ్చు. ఉదాహరణకు, స్నేహితులతో కలిసి ఆడుకోవడం, లేదా వేరే వినోద కార్యక్రమాల్లో పాల్గొనడం. మంచి కథల పుస్తకాలు చదవడం కూడా మంచి ప్రత్యామ్నాయం.
వాస్తవాలు చెప్పాలి..
ఒకవేళ సినిమా చూడాలని నిర్ణయించుకుంటే, దాన్ని పిల్లలతో కలిసి చూడటం మంచిది. వారిని ఒంటరిగా వదిలేయకూడదు. చూసే సమయంలో భయంకరమైన సన్నివేశం వచ్చినప్పుడు, అది నటన అని, నిజం కాదని చెప్పడం ద్వారా వారి భయాన్ని తగ్గించవచ్చు. సినిమా మధ్యలో ఆపి, వారి భావాలను అడగడమూ ఉపయోగకరం. "భయంగా ఉందా? లేదా ఇది బాగుందా?" అనే ప్రశ్నలు వారి మనస్సులో ఏం జరుగుతుందో తెలుసుకోవడానికి సహాయపడతాయి. దెయ్యం సినిమాల్లో వచ్చే అతీంద్రియ దృశ్యాల గురించి మాట్లాడేటప్పుడు "ఇవి కథలో భాగం, నిజ జీవితంలో ఇలా జరగదు" అని స్పష్టంగా చెప్పాలి. కానీ ఎగతాళిగా కాకుండా, ప్రశాంతంగా, నమ్మకంగా చెప్పాలి.
వారితో గడపండి...
సినిమా చూసిన తర్వాత కూడా తల్లిదండ్రుల పాత్ర ముగియదు. పిల్లలు ఆ సన్నివేశాల గురించి మాట్లాడాలను కోవచ్చు. వారు చెప్పేది ఓపికగా వినాలి. వారి భయాలను ఎగతాళి చేయకూడదు. "అది నిజం కాదు" అని చెప్పడం కంటే, "నీకు భయంగా అనిపించింది కదా, అది సహజం" అని అంగీకరించడం మంచిది. రాత్రి నిద్రపోయే ముందు ప్రశాంతమైన కథలు చెప్పడం, లేదా హాయిగా ఉండే సంగీతం వినడం వారి మనస్సును శాంతపరుస్తుంది. పిల్లల గదిలో కాస్త వెలుతురు ఉంచడం, వారి ప్రియమైన బొమ్మను పక్కన పెట్టడం వంటివి కూడా ఉపయోగకరం. కొన్ని రోజులు వారితో ఎక్కువ సమయం గడపడం, వారి భయాన్ని తగ్గించడానికి సహాయపడుతుంది.
నియంత్రణ అవసరం..
మరో ముఖ్యమైన అంశం ఏమిటంటే, ఇంట్లో పెద్దలు హర్రర్, దెయ్యం సినిమాలు చూసేటప్పుడు పిల్లలు ఆ సన్నివేశాలను చూడకుండా జాగ్రత్త పడాలి. టీవీ ముందు పిల్లలు ఆడుకుంటూ ఉంటే, వారు గమనించకుండా ఛానల్ మార్చడం లేదా వాల్యూమ్ తగ్గించడం వంటివి చేయాలి. ఇంటర్నెట్లో హర్రర్ కంటెంట్ చూసే అవకాశం ఉన్నందున, పిల్లలు ఉపయోగించే పరికరాల్లో పేరెంటల్ కంట్రోల్ ఉంచడం అవసరం. వారి వయస్సుకు తగిన కంటెంట్ మాత్రమే చూడాలని నిర్దేశించడం మంచిది. యూట్యూబ్, ఓటీటీ ప్లాట్‌ ఫారముల్లో వయస్సు ఆధారిత ఫిల్టర్లు ఉపయోగించడం, పిల్లలు ఒంటరిగా ఫోన్ లేదా టాబ్లెట్ వాడేటప్పుడు ఎప్పుడూ గమనిస్తూ ఉండటం చాలా అవసరం. దెయ్యం సినిమాల ట్రైలర్లు, షార్ట్ వీడియోలు కూడా భయాన్ని కలిగించవచ్చు, కాబట్టి వాటిని కూడా నియంత్రించాలి.
సృజనవైపు మళ్లించాలి..
కొన్ని సందర్భాల్లో పిల్లలు హర్రర్ లేదా దెయ్యం సినిమా చూసిన తర్వాత దీర్ఘకాలం భయంతో ఉండిపోవచ్చు. రాత్రి ఒంటరిగా నిద్రపోవడానికి భయపడటం, చీకటిలో ఏదో ఉందని అనుకోవడం, పాఠశాలకు వెళ్లడానికి ఇష్టపడకపోవడం, ఒక్కసారిగా ఏదైనా శబ్దం వినిపిస్తే భయపడటం, తినడం, నిద్రపోవడం వంటి దినచర్యలో మార్పు రావడం వంటి లక్షణాలు కనిపిస్తే వెంటనే నిపుణుల సలహా తీసుకోవాలి. ఇది అతిగా భయపడే స్వభావం కావచ్చు, లేదా మానసిక ఆందోళన కావచ్చు. నిపుణుల సహాయంతో దీన్ని సరిచేయవచ్చు. కొన్నిసార్లు ఇది పిల్లల ఊహాశక్తి ఎక్కువగా ఉండటం వల్ల కూడా జరగవచ్చు. అలాంటప్పుడు వారి ఊహాశక్తిని సృజనాత్మక పనులవైపు మళ్లించడం మంచిది. చిత్రలేఖనం, కథలు రాయడం, సంగీతం నేర్చుకోవడం వంటివి వారి మనస్సును శాంతపరుస్తాయి.
ఆచరణ కీలకం..
తల్లిదండ్రులు తమ పిల్లలకు ఆదర్శంగా ఉండాలి. పెద్దలు భయంకరమైన సినిమాలు చూసి రాత్రి భయపడుతూ ఉంటే, పిల్లలు కూడా అదే ప్రవర్తనను అనుకరిస్తారు. కాబట్టి ఇంట్లో ప్రశాంతమైన, ధైర్యవంత మైన వాతావరణం ఉండాలి. పిల్లలతో కలిసి హర్రర్ సినిమాల గురించి మాట్లాడేటప్పుడు, భయం అనేది సహజమైన భావోద్వేగం అని, దాన్ని ఎదుర్కోవడం ఎలా అనేది నేర్పించాలి. ధైర్యం అంటే భయం లేకపోవడం కాదు, భయం ఉన్నప్పుడు ఎదుర్కోమని చెప్పాలి.
ఏదేమైనా హర్రర్, దెయ్యం సినిమాలు పిల్లలకు ఎప్పుడూ నిషేధం కావాల్సిన అవసరం లేదు. కానీ వాటిని ఎప్పుడు, ఎలా, ఎంతవరకు చూడాలి అనేది తల్లిదండ్రులే నిర్ణయించాలి. పిల్లల భావోద్వేగాలను గౌరవించడం, వారితో సంభాషించడం, వారి భయాలను తగ్గించడానికి సరైన మార్గాలు చూపడం – ఇవే ఆరోగ్యకరమైన పేరెంటింగ్ లక్షణాలు. హర్రర్ సినిమా ఒక వినోదం కావచ్చు.. కానీ పిల్లల మానసిక ఆరోగ్యం దానికంటే చాలా ముఖ్యం. ఆ సమతుల్యతను కాపాడుకోవడంలోనే తల్లిదండ్రుల విజయం ఉంది. పిల్లలు పెద్దయ్యాక, వారు తమ భయాలను ఎదుర్కోవడం నేర్చుకున్నాక, వారే సరైన నిర్ణయాలు తీసుకోగలుగుతారు. అంతవరకు తల్లిదండ్రుల మార్గదర్శకత్వం చాలా అవసరం.
కామెంట్‌లు (0)