రోళ్ళు బద్దలు కొట్టే ఎండ
రెక్కలు ముక్కలు చేసుకొంటున్న
నల్లరాతి శిల్పాలపై కరిగి నీరౌతుంది
నిత్యాగ్నిహోత్రంలా జ్వలించే కొలిమి
ఆకలి చల్లార్చే అగ్నిదేవుడు వాళ్ళకు!
కడుపులో రగిలే ఆకలి ముందు
కళ్లముందు వెలిగే కొలిమి వెలవెలబోతుంది
చిరుగుల చీర పేదరికం జెండాలా
కాలే కడుపుల్ని కళ్ల ముందే ఎగరేస్తుంది!
ధనవంతుల మనసులా కఠినమైన
ఇనుము కరిగించే కొలిమి
ఆకలి తీరాలకు చేర్చే కలిమని నమ్మి
తిత్తి రగిలిస్తుందా పిచ్చితల్లి!
ఊపిరి బిగించి స్వేదాగ్నిలో
మెత్తబడ్డ ఇనుముకు
సుత్తితో ప్రాణం పోస్తున్నాడు
ఆకలి పంచుకున్నోడు!
చింపిరి జుత్తు ఆకలి వారసుడు
కళ్ళు తెరిచింది ఆలస్యం
కనిపించని ఆకలి తీర్చమని
ఏడుపు లంకించుకున్నాడు!
ఖాళీ కడుపులాంటి గుడిసెలో
ఎటు చూసినా బోసిపోయి శూన్యం తప్ప
ఆకలి తీర్చే ఆధరువొక్కటీ లేదు!
రోడ్డు పక్క అమ్మకానికి పేర్చిన
కత్తులు.. సుత్తులు..
వారి శ్రమ సంగమంలో
పునీతమై పుట్టిన కళాకృతులు
అవి మెతుకులుగా ఉడికితేనే
కడుపులో కొలిమి చల్లారేది..!
భీమవరపు పురుషోత్తమ్
9949800253
కామెంట్లు (0)