ఆశ్వయుజం

ముంగిట్లోకి రాగానే

మేము పూలు ఏరుకోము

మా తరాల్ని ఏరుకుంటాం

తంగేడు -

ఎండకు ఎదురొడ్డి పూసిన

మా పసుపు ధైర్యం

గునుగు -

ఎంత చిదిమినా

తెల్లగా మిగిలే మా

అంతరంగం

బంతి -

ఒక పువ్వు కాదు

వందల చేతులు ఒక్కటై

కట్టిన పసిడి ముడి

చామంతి -

వాడిపోవడాన్ని కూడా

పండుగలా మార్చే మా

జీవన మెలకువ

గుమ్మడి పువ్వు -

నేల గర్భంలోంచి

ఆకాశాన్ని చూసే

విస్తరించిన మా కల

మా చేతుల్లో

పూలు పేర్చబడవు

ఒక్కో పువ్వు

ఒక జీవితపు జ్ఞాపకమై

బతుకమ్మ గా ఎదుగుతుంది

దాని చుట్టూ

కాలాన్ని తిప్పేది మా గొంతులే

ఈ తొమ్మిది సంధ్యలు

పూల పొరలు కావు

స్త్రీల సామూహిక జీవనోత్సవం

బతుకమ్మ ను

చెరువుకు అప్పగిస్తాం

పూలు నీటిలో కరిగి

మట్టిలో విత్తనమై

తరువాతి ఆశ్వయుజం కోసం

మళ్ళీ పూస్తాయి .

మండాది గోపీనాథ్ ,

9885045344