Print Editionనియంతలకు మరో పాఠం

ఏదో ఒక రోజు

నువ్వు ఓడిపోక తప్పదు

చరిత్ర చెప్పిన సత్యం

నీలాంటి మూర్ఖులకు అర్థంకాదు

అవమానాన్నైనా భరిస్తారు కానీ

అహంకారాన్ని

ప్రపంచ ప్రజలు క్షమించరు

మరణాల వ్యాపారికి

పరువు నిలబడుతుందని

ఎలా అనుకుంటావు!

విపక్షానిదైనా

స్వపక్షానిదైనా

చావు నీకొక బేరం

​

మహా శబ్దమై కూలిన ఆవాసాలు

దేహాన్ని వీడిన అవయవాలు

ఆకాశాన్నంటిన

తల్లుల కడుపు మంటలు

చల్లారిపోయిన కేరింతలు

సమాధుల్లో...

భవిష్యత్తును పునర్నిర్మించుకునే

విషాధ ముఖాలు

నీ పేరును తొక్కుకుంటూ వెళతాయి

నీ స్థాయిని ఆయిల్ బావుల కంటే లోతున

పూడ్చి పెడతాయి

​

నీ చెవికెక్కకపోయినా

నీ పతనం

భవిష్యత్తు నియంతలకు

మరో పాఠమై నిలుస్తుంది

​పాణిరావు యర్రగుంట్ల

62817 19414

​