దసరా పండుగ అంటేనే అందరూ ఎంజాయ్ చేయడం. పండుగకి మన ఇంట్లోని వారు మాత్రమే కాదు. మన బంధువులు, ఫ్రెండ్స్ అందరూ కూడా ఇంటికి వస్తారు. వారికోసం రకరకాల పిండి వంటలు చేస్తాం. అయితే, అవన్నీ కూడా ఎంజాయ్ చేస్తారు. వీటిలో రుచిగా ఉండే వంటలే కాదు.. హెల్త్‌కి కూడా మేలు చేసే వంటలైతే మరీ మంచిది కదా. ఇప్పుడు మేము చెప్పబోయే వంటకాలన్నీ ఎంత రుచిగా ఉంటాయో అంత హెల్దీ కూడా. అవి ఎలా తయారుచేయాలో తెలుసుకుందాం.
కొబ్బరి బూరెలు..
కావలసినవి: బియ్యం: కేజీ (కనీసం 24 గంటలు నానబెట్టినవి), బెల్లం: 1/2 కేజీ, పచ్చి కొబ్బరి తురుము: కప్పు, యాలకుల పొడి: టీస్పూన్, నువ్వులు: 2-3 టేబుల్ స్పూన్లు , నెయ్యి: 2 టేబుల్ స్పూన్లు, నూనె: వేయించడానికి సరిపడా
తయారీ : బియ్యం పిండి తయారీ: ముందుగా బియ్యాన్ని బాగా కడిగి ఒక రోజు (24 గంటలు) నానబెట్టాలి. తర్వాత నీళ్లన్నీ వంపేసి, బియ్యాన్ని ఒక పొడి గుడ్డపై ఆరబెట్టాలి. బియ్యం పూర్తిగా ఆరిపోకుండా కొద్దిగా తడి ఉండగానే మిల్లులో లేదా మిక్సీలో మెత్తగా గ్రైండ్ చేసి, జల్లెడ పట్టుకుని పక్కన పెట్టుకోవాలి (తడి బియ్యం పిండి ఆరిపోకుండా గట్టిగా నొక్కి ఉంచాలి).
పాకం పట్టుకోవడం: ఒక మందపాటి గిన్నెలో బెల్లం ముక్కలు మరియు కొద్దిగా నీళ్లు పోసి కరిగించాలి. బెల్లం కరిగాక వడకట్టి, మళ్లీ స్టవ్ మీద పెట్టి ముదురు పాకం (తీగ పాకం కంటే కొంచెం గట్టిగా, నీళ్లలో వేస్తే ఉండ కట్టేలా) వచ్చే వరకు మరిగించాలి.
మిశ్రమం తయారీ: పాకం వచ్చాక స్టవ్ ఆపేసి.. అందులో యాలకుల పొడి, పచ్చి కొబ్బరి తురుము, నువ్వులు మరియు నెయ్యి వేసి బాగా కలపాలి.
పిండి కలపడం: ఇప్పుడు ఈ వేడి పాకంలో మనం ముందుగా సిద్ధం చేసుకున్న తడి బియ్యం పిండిని కొద్దికొద్దిగా వేస్తూ ఉండలు కట్టకుండా చపాతీ పిండి కంటే కొంచెం సాఫ్ట్‌గా ఉండేలా బాగా కలుపుకోవాలి (దీనిని చలిమిడి అంటారు). పిండి ఆరిపోకుండా మూత పెట్టాలి.
బూరెలు ఒత్తడం & వేయించడం: స్టవ్ మీద కడాయి పెట్టి వేయించడానికి సరిపడా నూనె పోసి వేడి చేయాలి. ఒక ప్లాస్టిక్ కవర్ లేదా అరటి ఆకుపై కొద్దిగా నూనె రాసి, కొద్దిగా పిండి ముద్దను తీసుకుని చిన్న పూరీల్లా (మరీ పల్చగా కాకుండా, మందంగా కాకుండా) ఒత్తుకోవాలి. నూనె బాగా కాగాక, ఒత్తుకున్న బూరెలను ఒక్కొక్కటిగా వేస్తూ రెండు వైపులా గోల్డెన్ బ్రౌన్ కలర్ వచ్చే వరకు మీడియం ఫ్లేమ్ మీద వేయించుకుని పక్కకు తీసుకోవాలి. ఇలా చేస్తే కొబ్బరి బూరెలు చక్కగా పొంగుతూ, మెత్తగా వస్తాయి.
బూందీ లడ్డు
కావలసినవి: శనగపిండి: కప్పు, పంచదార: 1.5 కప్పులు, నీళ్లు: పాకం కోసం కప్పు, పిండి కలపడానికి అర కప్పు పైగా, యాలకుల పొడి: 1/2 టీస్పూన్, జీడిపప్పు, కిస్మిస్: సరిపడా, నెయ్యి: టేబుల్ స్పూన్ (లడ్డూలు చుట్టడానికి, డ్రై ఫ్రూట్స్ వేయించడానికి), నూనె: బూందీ వేయించడానికి సరిపడా,
పచ్చకర్పూరం లేదా కుంకుమపువ్వు: చిటికెడు (రుచి మరియు సువాసన కోసం - ఆప్షనల్)
తయారీ : పిండి తయారీ: ఒక గిన్నెలో శనగపిండి తీసుకొని, తగినన్ని నీళ్లు పోస్తూ జారుగా (దోశ పిండి కన్నా కొద్దిగా పల్చగా) ఉండలు లేకుండా కలుపుకోవాలి. కావాలంటే చిటికెడు పసుపు లేదా రంగు కలుపుకోవచ్చు.
బూందీ చేయడం: బాణలిలో నూనె వేడి చేసి, రంధ్రాల గంటె సహాయంతో పిండిని నూనెలో పోస్తూ చిన్న చిన్న బూందీలుగా వేయించుకోవాలి. బూందీలు మరీ గట్టిగా కాకుండా మెత్తగా ఉండేలా చూసుకోవాలి.
పాకం పట్టడం: వేరొక గిన్నెలో పంచదార, నీళ్లు పోసి తీగ పాకం వచ్చే వరకు మరిగించాలి. అందులో యాలకుల పొడి కలపాలి.
కలపడం: వేయించిన బూందీలను నేరుగా గోరువెచ్చని పంచదార పాకంలో వేసి బాగా కలపాలి. ఇందులో నేతిలో వేయించిన జీడిపప్పు, కిస్మిస్ వేసుకోవాలి.
లడ్డూ చుట్టడం: కొద్దిగా నెయ్యి చేతికి రాసుకొని, ఈ మిశ్రమం గోరువెచ్చగా ఉన్నప్పుడే నచ్చిన పరిమాణంలో లడ్డూలుగా చుట్టుకోవాలి.
సకినాలు
కావలసినవి: బియ్యం: కిలో (నానబెట్టి, ఆరబోసి కొట్టిన తడి బియ్యం పిండి), నువ్వులు: 1/2 కిలో (లేదా మీ రుచికి తగినట్లు 4-5 టేబుల్ స్పూన్లు), వాము (ఓమ): 2 పెద్ద చెంచాలు, జీలకర్ర: 2 చెంచాలు (ఐచ్ఛికం), ఉప్పు: రుచికి సరిపడినంత, నూనె: వేయించడానికి సరిపడినంత
తయారీ : బియ్యం పిండి సిద్ధం చేయడం: బియ్యాన్ని రాత్రంతా లేదా కనీసం 3-4 గంటల పాటు నానబెట్టి, శుభ్రంగా కడిగి నీరు వడకట్టాలి. ఆ తర్వాత ఒక కాటన్ బట్టపై 10-15 నిమిషాలు ఆరనిచ్చి, మరీ పొడిగా కాకముందే గ్రైండర్‌లో మెత్తటి పిండిలా పట్టుకుని జల్లించుకోవాలి.
పిండి కలపడం: ఈ తడి బియ్యం పిండిలో నువ్వులు, వాము, జీలకర్ర మరియు ఉప్పు వేసి బాగా కలపాలి. అవసరమైన వంటకాల్లో కొద్దిగా కారం కూడా దట్టించుకోవచ్చు (కారం సకినాలు).
చుట్లు చుట్టడం: పిండిని అంతా ఒకేసారి కాకుండా కొద్దికొద్ది భాగాల్లో తీసుకుంటూ తగినన్ని నీళ్లు పోసి ముద్దలా కలుపుకోవాలి. ఒక కాటన్ వస్త్రంపై పిండి ముద్దను చేతివేళ్లతో తాడులా సాగదీస్తూ వృత్తాకారంలో 3 చుట్లు లేదా అంతకంటే ఎక్కువ చుట్లుగా చుట్టాలి. చేత్తో చేయడం రానివారు ప్లాస్టిక్ కవర్ లేదా మురుకుల గొట్టం సాయంతో కూడా చేయవచ్చు.
ఆరనివ్వడం: చుట్టిన సకినాలను బట్టపై కొద్దిసేపు ఆరనివ్వాలి.
నూనెలో వేయించడం: బాణలిలో నూనె వేడి చేసి, ఆరిన సకినాలను ఒక చిల్లుల గరిటె లేదా అట్లకాడ సహాయంతో జాగ్రత్తగా తీసి నూనెలో వేయాలి. రెండు వైపులా మంచి రంగు వచ్చి, కరకరలాడే వరకు మీడియం-హై ఫ్లేమ్‌పై వేయించి పక్కకు తీసుకోవాలి.
కామెంట్‌లు (0)