తవ్వకాలు జరగాలి
మెదడు చెదరకుండా
ఎముక విరగకుండా
చూపు చిట్లకుండా
చురుకు చెడకుండా
మెత్తని వేళల్లో సుతిమెత్తని పరికరాలతో
మనసు లోతుల్లో
ఇంకిన ఇష్టాల్లో
పొడిబారిన ప్రేమను తాకేదాకా
కన్నీటి జాలు ఆగిన చోట
కరిగిన కల ఆనవాళ్లు దొరికేదాకా
చెదరిన బతుకు చిరునామా కనిపించేదాకా
నిజం స్పర్శ చవిచూసేదాకా
ఎర్రని వాక్యాలు చేతికి అందేదాకా
మట్టి పొరల్లో మాట చప్పుడు వినిపించేదాకా
పూడిన ముద్రలు పలుకరించేదాకా
అడుగున చేరిన ఆశ నాడిని కనిపెట్టేదాకా
తెగిన ఇష్టపు కొస అందేదాకా
పాత రోజును వెలికి తీస్తూ
కొత్త రోజులతో ముడిని విడదీస్తూ
తవ్వకాలు జరపాలి
తరం ఓడి పోకుండా
మరో తరం చేజారకుండా
నిరంతరం నిజం స్వరం వినిపించేలా
తవ్వకాలు జరగాలి
మనిషి తప్పిదాలు తొలగాలి!
– చందలూరి నారాయణరావు,
97044 37247
