అదే పొద్దు
అదే గది, అదే గోడ !
అదే మేకుకు ఇంకా తీయని పాత క్యాలెండర్ !
అవునూ
ఎవరు మార్చుతారు ..?!
నా ఆలోచనలను మార్చుతూ
చకా చకా కదులుతున్న
సెకన్ల ముల్లు శబ్దం !
బాధ్యతల నిర్వహణలో ఒంటరితనమనే
మాటే లేని దాని స్వభావం !!
తదేకంగా చూస్తేఆచీ తూచీ సమయానికి అనుకూలంగా
స్థిరంగా అడుగులు వేస్తున్న
‘పెద్ద’ ముల్లు కదలిక !
అడుగడుగునా
అనుభవాన్ని మిళితం చేసుకోవాలనే
ఓ ముఖ్య సూచిక !
ఏ హంగూ ఆర్భాటం లేకుండానే
ఏ శబ్దమూ చేయకుండానే
ముందుకు కదిలిపోతున్న
‘చిన్న’ ముల్లు వైనం!
గెలుపు ఎవరినైనా వరిస్తుంది అనే పెద్ద పాఠం !
కాసేపటికి అదే నిశీధి కానీ నాలో కొత్త వైఖరి !
అదే ఉషోదయం
కానీ నాదో నూతన ఆరంభం
తెలియని శక్తి సంరంభం!
- తిప్పాన హరిరెడ్డి, 9493832412