- ఇంగ్లాండ్ మాజీ స్పిన్నర్ ప్రశంసలు
గురువారం నుంచి ధర్మశాల వేదికగా ఇంగ్లాండ్ తో ఐదో టెస్ట్ మ్యాచ్ జరగనున్న విషయం తెలిసిందే. ఈ మ్యాచ్ రవిచంద్రన్ అశ్విన్ కు వందో టెస్ట్ మ్యాచ్.. ఈ క్రమంలో అశ్విన్ పై ఇంగ్లాండ్ మాజీ స్పిన్నర్ మాంటీ పనెసర్ ప్రశంసల జల్లు కురిపించాడు. స్పిన్ బౌలింగ్ లో అశ్విన్ ఇంజనీర్ అంటూ మెచ్చుకున్నాడు. బంతి యాంగిల్ ను మార్చుతూ, విభిన్న బంతులు వేస్తూ బ్యాట్స్ మెన్ ను బోల్తా కొట్టిస్తాడంటూ కొనియాడాడు. తొలిసారి 2012లో అశ్విన్ ఆటను చూశానని, బౌలింగ్ విధానం చూసి గొప్ప బౌలర్ అవుతాడని అప్పుడే అనిపించిందని చెప్పాడు. ఈమేరకు ఓ మీడియా సంస్థకు ఇచ్చిన టెలిఫోన్ ఇంటర్వ్యూలో పనెసర్ ఈ వ్యాఖ్యలు చేశాడు. కాగా ఇప్పటి వరకు ఆడిన 99 టెస్టుల్లో సగటున 23.9 తో అశ్విన్ 507 వికెట్లు తీశాడు. టెస్టుల్లో అత్యధిక వికెట్లు తీసిన ఆటగాళ్ల జాబితాలో మూడో స్థానంలో నిలిచాడు. టీమిండియా రెండో ఆటగాడిగా రికార్డ్ సృష్టించాడు.
