సంక్రాంతి శతకం

రైతు పంటలన్ని రాశులు పండించి

పొలము నుంచి తెచ్చి పూర్తి జేసి

పంటచేతి కొచ్చి పరవశమ్మును పొంది

సంబరాలు తెచ్చె సంకురాత్రి

ముచ్చట గొలిపేటి ముంగిట ముగ్గులు

ముగ్గులందు గొబ్బి పూల సొబగు

రంగు రంగులొలుకు రంగవల్లుల శోభ

సంబరాలు తెచ్చె సంకురాత్రి

పనికి రానివన్ని పాత వస్తువులన్ని

తెల్లవారుజాము తెచ్చి వేసి

పోటి పడుతు ప్రజలు భోగిమంటలు వేయ

సంబరాలు తెచ్చె సంకురాత్రి

పైరు పంటలన్ని పచ్చగా పండించ

పశువు కష్టపడుతు బరువు మోసె

పశువు పూజ జేయు పశువుల పండుగ

సంబరాలు తెచ్చె సంకురాత్రి

గంగిరెద్దు వచ్చి గడపలన్ని తిరిగి

కొత్త ధాన్యపు రుచి కొరకి జూచి

పరవశించి యాడు పండుగ రోజున

సంబరాలు తెచ్చె సంకురాత్రి

హరి హరి యని వచ్చి హరిదాసు పాడంగ

చిడతలు కొడుతున్న చెవులకింపు

కొత్త ధాన్యములను కొత్త కోడలు వేయ

సంబరాలు తెచ్చె సంకురాత్రి

దేశమును విడిచి విదేశమ్ము వెళ్ళిన

పిల్లలంత వచ్చి ఇల్లు నిండు

సంకురాత్రి కలిపె సకుటుంబమును జూడ

సంబరాలు తెచ్చె సంకురాత్రి

పిల్లలంత జేరి అల్లరి జేయుచు

పైకెగురు పతంగు పైకెగురని

గాలి పటము వదిలి గంతులు వేయగ

సంబరాలు తెచ్చె సంకురాత్రి

పేద వాడు జూడ పేగులు మాడ్చుచు

మంచి భోజనమ్ము మరచిపోవు

పంచభక్ష్యములను పండుగ తినమని

సంబరాలు తెచ్చె సంకురాత్రి

గూడు లేని భిక్ష గాడు పంటను జూచి

భిక్ష మెత్తుకొనగ బింకమిడుచు

తిండికి తిన లేని దీనుల బ్రతుకున

సంబరాలు తెచ్చె సంకురాత్రి

మారునర్కుని కక్ష్య ఆగమనంలో

ఉత్తరాయణమ్ము కొత్త కాంతి

మకర సంక్రమణము మార్చును స్థితులను

సంబరాలు తెచ్చె సంకురాత్రి

ఆంధ్ర రాష్ట్రమందు నాచార వ్యవహార

సంప్రదాయ మనగ సంస్కృతియన

పండుగలను చూసి పసిగట్టు పిల్లలు

సంబరాలు తెచ్చె సంకురాత్రి

– ఆవుల చక్రపాణి యాదవ్‌, 99633 50973.