పచ్చని పొద్దు పొడుపు

మనమంతా నింపాదిగా

కవిత్వం రాసుకుంటున్న సమయాన

వాళ్ళు అన్నం మూట భుజానికెత్తుకుని

ప్రపంచంలోనే బలమైన

సైన్యంతో పోరాటానికి సిద్ధపడి వచ్చారు

మనమంతా నింపాదిగా

పెదాలు కదుపుతున్న సమయాన

వాళ్ళు తమకు ఉన్నదాంతో

బయల్దేరి రుతువులకెదురు

నిలిచి పోరాటానికి

సిద్ధపడి వచ్చారు!

మనమంతా నింపాదిగా

నడుచుకుంటూ అడుగులు

లెక్కలేస్తున్న సమయాన

వాళ్ళు లక్షలాదిగా

ఈ దేశ మనువుకు ఎదురు తిరిగి

రాజధానిని చుట్టుముట్టారు

వాడు దారి పొడుగునా

ముళ్ళ కంచెలు పాతి

కాంక్రీట్‌ దిమ్మలతో అడ్డుకో జూస్తే

నాగళ్ళు భుజానేసుకుని

మరోసారి ఎదురు నిలిచారు

ఈ దేశ నుదుటిపై వాళ్ళు

పచ్చని పొద్దు పొడుపులు

నువ్వింక వారి వరి పొలానికి

కాపలాదారుగా

పరుగున వస్తావా?

– కెక్యూబ్‌ వర్మ94934 36277